چیمبر آف کامرس اینڈانڈسٹری کا پھلوں کو مضرصحت رنگ لگا کر فروخت کرنے والوں کے خلاف فوری کارروائی کا مطالبہ

چیمبر آف کامرس اینڈانڈسٹری کا پھلوں کو مضرصحت رنگ لگا کر فروخت کرنے ..
فیصل آباد (اُردو پوائنٹ اخبارتازہ ترین - اے پی پی۔ 11 جون2019ء) چیمبر آف کامرس اینڈانڈسٹری فیصل آباد نے پھلوں کومضرصحت رنگ لگا کر فروخت کرنے والوں کے خلاف فوری کارروائی کا مطالبہ کیا ہے۔ فیصل آباد چیمبر آف کامرس اینڈانڈسٹری کے ترجمان نے کہا کہ آج کل الیچی، آڑرو اور دیگر موسمی پھل مارکیٹ میں فروخت ہو رہے ہیں۔ انہوں نے کہا کہ بعض مقامات پر مشاہدے میں آیا ہے کہ کچھ د وکاندار کچے پھلوں کو پکے ہوئے پھل ظاہر کرنے کے لئے ان پر زہریلے رنگ کا سپرے کرتے ہیں تاکہ مارکیٹ میں ان کو دوگنی قیمت پر فروخت کر سکیں۔

انہوں نے کہا کہ سو روپے والی الیچی کو سرخ رنگ کا سپرے کر کے ساڑھے تین سو روپے میں فروخت کیا جا رہا ہے اسی طرح سبز اور کچے آڑرو کو سرخ رنگ لگا کر فروخت کیا جا رہا ہے۔

(جاری ہے)

انہوں نے کہا کہ باعث تشویش بات یہ ہے کہ ان پر جو رنگ لگایا جاتا ہے وہ کینسر سمیت مختلف خطر ناک امراض پیدا کرنے کا باعث بنتا ہے۔ اسی طرح رات کے وقت کچے آموں اور دیگر پھلوں کو فروخت کر نے کیلئے مخصوص رنگ کی لائٹ کا بھی استعمال کیا جاتا ہے جن کا مقصد صریحاً خریداروں کو دھوکہ دینا ہوتا ہے۔

انہوں نے مزید کہا کہ اسی طرح سونف اور اس قسم کے دیگر مصالحوں کی فروخت کیلئے بھی کینسر پیدا کرنے والے رنگ استعمال کئے جا رہے ہیں اور یہ کاروبار عرصہ دراز سے جاری ہے مگر پنجاب فوڈ اتھارٹی نے ابھی تک اس اہم مسئلے کی طرف توجہ ہی نہیں دی۔ انہوں نے کہا کہ اس مضر صحت طریقہ کار کو روکنے کیلئے فوری طور پرچھاپے مارے جائیں اور ایسا کرنے والوں کے خلاف سخت ترین کارروائی کی جائے تاکہ لوگوں کو لٹنے سے بچانے کے ساتھ ساتھ ان کی صحت کا بھی تحفظ کیا جا سکے۔

Your Thoughts and Comments