ایوان صنعت و تجارت فیصل ۱ٓباد کے نئے عہدیداران کے چنائو کیلئے انتخابی شیڈول کا اعلان

فیصل ۱ٓباد (اُردو پوائنٹ اخبارتازہ ترین - اے پی پی۔ 14 جولائی2020ء) :ایوان صنعت و تجارت فیصل ۱ٓباد کے نئے عہدیداران برائے سال 2020-21 ء کے چنائو کیلئے انتخابی شیڈول کا اعلان کر دیاگیاہے جو ٹریڈ آرگنائزیشن ایکٹ 2013، رول 14اور فیصل آباد چیمبر کے میمورنڈم اینڈ آرٹیکل آف ایسوسی ایشن کے آرٹیکل 49کے تحت جاری کیا گیا ہے جبکہ فیصل آباد چیمبر آف کامرس اینڈانڈسٹری کی ایگزیکٹو کمیٹی نے بھی اس کی منظوری دیدی ہے جس میں ایگزیکٹو کی خالی ہونے والی 15نشستوں کیلئے انتخابات ہوں گے جن میں 7 کارپوریٹ ،7 ایسوسی ایٹ اور ایک خواتین کیلئے مخصوص نشست شامل ہیں۔

چیمبر کے ترجمان نے بتایا کہ انتخابات کو صاف، شفاف اور مکمل طورپر غیر جانبدارانہ بنانے کیلئے 3رکنی الیکشن کمیشن بھی قائم کر دیا گیا ہے جو میاں آفتاب احمد ، مزمل سلطان اور عاطف منیر پر مشتمل ہوگا۔

(جاری ہے)

انہوں نے بتایا کہ شیڈول کے مطابق انتخابی سرگرمیوں کا آغاز الیکشن شیڈول کے اجراء سے شروع ہو گیا ہے جس کو نوٹس بورڈ پر آویزاں کرنے کے علاوہ چیمبر کی ویب سائٹ پر بھی اپ لوڈ کر دیا گیا ہے مزید برآں اس کی کاپی ریگولیٹر ڈی جی ٹی او کو بھی ارسال کر دی گئی ہے ۔

انہوں نے بتایا کہ ممبران کی عبوری فہرست 21جولائی کو جاری کی جائے گی تاہم حتمی فہرست 22اگست کو جاری ہو گی۔انہوں نے بتایا کہ ایگزیکٹو کا الیکشن لڑنے کے اہل امیدوار 26اگست کو کاغذات نامزدگی داخل کرائیں گے اور ان کاغذات کی جانچ پڑتال 27اگست کو ہو گی اور اسی روز اُن کی فہرست ایف سی سی آئی کے نوٹس بورڈ پر آویزاں کر دی جائے گی جن پر اعتراضات 28اگست کو وصول کئے جائیں گے جن کو الیکشن کمیشن یکم ستمبر 2020کو نمٹا دے گا۔

انہوں نے بتایا کہ الیکشن کمیشن کے فیصلے کے خلاف اپیل 3ستمبر تک ریگولیٹر کو کی جا سکتی ہے جو اِن اپیلوں کو 10ستمبر 2020ء تک نمٹا دے گا ۔انہوں نے بتایا کہ کاغذات نامزدگی 11ستمبر 2020ء تک واپس لئے جا سکتے ہیں جبکہ ایگزیکٹو کمیٹی کے امیدواروں کی حتمی فہرست 12ستمبر کو آویزاں کر دی جائے گی۔انہوں نے بتایا کہ کارپوریٹ کلاس کیلئے پولنگ 14 ستمبر بروز پیرجبکہ ایسوسی ایٹ کلاس کیلئے ووٹ 15ستمبر بروز منگل کو ڈالے جائیں گے۔

انہوں نے بتایا کہ پولنگ کے اوقات کے فوراً بعد ووٹوں کی گنتی ہو گی اور عبوری نتائج کا اعلان بالترتیب 14اور15ستمبر 2020ء کو کر دیا جائے گا۔انہوں نے بتایا کہ خواتین کیلئے مختص نشست کیلئے پولنگ 16ستمبر کو ہو گی نیز ایگزیکٹو کے منتخب امیدوار عہدیداروں کیلئے کاغذات نامزدگی 17ستمبر کو جمع کروا سکتے ہیں جن کی جانچ پڑتال 18ستمبر کو ہو گی جبکہ عہدیداروں کیلئے پولنگ 19ستمبر کو ہو گی۔انہوں نے بتایا کہ فیصل آباد چیمبر کے حتمی نتائج کا باضابطہ اعلان 30ستمبر کو کیا جائے گا۔