ملکی برآمدات میں جاری مالی سال کے ابتدائی دوماہ میں 4.25 فیصد، درآمدات میں 5.85 فیصد کی کمی

اسلام آباد ۔ (اُردو پوائنٹ اخبارتازہ ترین - اے پی پی۔ 20 ستمبر2020ء) ملکی برآمدات میں جاری مالی سال کے ابتدائی دوماہ میں 4.25 فیصد کی کمی ریکارڈکی گئی ہے۔ پاکستان بیوروبرائے شماریات کے اعدادوشمارکے مطابق جولائی سے لیکراگست 2020 ء تک پاکستانی برآمدات کا حجم 3.585 ارب ڈالرریکارڈکیاگیا جو گزشتہ مالی سال کی اسی مدت کے مقابلے میں 4.25 فیصد کم ہے۔

گزشتہ مالی سال کے ابتدائی دوماہ میں پاکستانی برآمدات کاحجم 3.744 ارب ڈالرریکارڈکیاگیاتھا۔اعدادوشمارکے مطابق اگست 2020ء میں نیٹ وئیر کی برآمدات سے ملک کو 41.69 ارب روپے، ریڈی میڈگارمنٹس 34.04 ارب روپے،بیڈوئیر30.35 ارب روپے، کاٹن کلاتھ 24.37 ارب روپے، چاول 10.99 ارب روپے ، تولیے 9.27 ارب روپے، دھاگا 9.15 ارب روپے، اورباسمتی چاول کی برآمدات سے 5.63 ارب روپے کازرمبادلہ حاصل ہوا۔

(جاری ہے)

اعدادوشمارکے مطابق اگست 2020 میں درآمدات میں کمی کا تناسب 9.53 فیصد رہا۔ اگست 2020 ء میں پاکستانی درآمدات کا حجم 3.32 ارب ڈالرریکارڈکیاگیا۔ گزشتہ سال اگست میں پاکستانی درآمدات کا حجم 3.72 ارب ڈالر ریکارڈکیاگیاتھا،جاری مالی سال کے ابتدائی دوماہ میں ملکی درآمدات میں گزشتہ مالی سال کے اسی عرصہ کے مقابلہ میں 5.85 فیصد کی کمی ریکارڈکی گئی ہے۔

جولائی سے لیکراگست 2020 ء تک ملکی درآمدات کا حجم 6.99 ارب ڈالر رہا، گزشتہ مالی سال کے پہلے دوماہ میں پاکستانی درآمدات کاحجم 7.43 ارب ڈالر ریکارڈکیاگیا تھا۔اگست 2020ء میں جن اہم اشیاء کی درآمد کی گئی ہے ان میں پیٹرولئیم مصنوعات، خام پیٹرول موبائل فونز ، پلاسٹک میٹرئیل ، پام آئل ، ایل پی جی، لوہا اورآئرن سکریپ شامل ہیں۔پیٹرولئیم مصنوعات کی درآمدات پر60.82 ارب روپے، خام پیٹرول 40.33 ارب روپے، موبائل فونز 26.56 ارب روپے اور پام آئل کی درآمد پر24.61 ارب روپے کازرمبادلہ صرف ہوا۔

Your Thoughts and Comments