تاجر برادری کورونا اور اس پر حکومتی پالیسیوں کی وجہ سے سخت پریشان ہے، محمدلطاف میمن

حیدرآباد(اُردو پوائنٹ اخبارتازہ ترین - این این آئی۔ 25 ستمبر2021ء) حیدرآباد چیمبر آف اسمال ٹریڈرز اینڈ اسمال انڈسٹری کے نومنتخب صدر محمد الطاف میمن نے کہا ہے کہ ان کی پہلی خواہش تاجر و صنعتکار برادری کے مسائل کو چیمبر کے پلیٹ فارم سے حل کرانا ہے جو کہ اِس ایوان کی ولین ذمہ داری ہے، اِس وقت تاجر برادری کورونا اور اس پر حکومتی پالیسیوں کی وجہ سے سخت پریشان ہے، ایسے میں ضرورت اِس امر کی ہے کہ تمام تاجر ایک پلیٹ فارم حیدرآباد چیمبر آف اسمال ٹریڈرز اینڈ اسمال انڈسٹری جو وزارت کامرس سے رجسٹرد ہے اور ضلع حیدرآباد اور اِس کے اِرد گرد کے علاقوں کی وفاقی اور صوبائی محکموں میں تاجروں کی بھرپور انداز میں اپنی نمائندگی کو جاری رکھے ہوئے ہے کی چھت تلے ایک ہوکر تاجروں کے مسائل کے حل کے لئے اِس پلیٹ فارم سے بھرپور آواز اٹھاسکیں۔

(جاری ہے)

چیمبر کی جنرل باڈی کے اجلاس سے خطاب کرتے ہوئے محمد الطاف میمن نے کہا کہ اِس وقت ملک میں مہنگائی کا طوفان آیا ہوا ہے جس کو حکومت قابو کرنے میں ناکام ہے، تمام تر معاشی پالیسیاں ضائع ہوگئیں ہیں اِس طوفان کو روکنے کے لئے کوئی مثبت پالیسیاں نہیں بنائیں جارہیں، آج جو پیٹرول کی قیمت حکومت نے مقرر کی ہوئی ہے وہ ملکی تاریخ کی بلند ترین سطح پر پہنچ چکی ہے اس کو فوری طور پر کم سے کم سطح پر لانے کی ضرورت ہے۔

کیونکہ پیٹرول کی قیمت بڑھنے سے اِس سے بننے والی مصنوعات میں بھی بے پناہ اضافہ ہوجاتا ہے جس سے ملکی معیشت جو پہلے ہی کورونا کی وجہ سے روبہ زوال پر آگئی ہے اس کے مزید نیچے جانے کا اندیشہ لاحق ہے۔ اجلاس وزیر اعظم عمران خان سے مطالبہ کرتا ہے کہ پیٹرول کی قیمت کو کم کیا جائے اور مہنگائی کو قابو کرنے کے لئے نئی اور سود مند معاشی پالیسیاں مرتب کی جائیں جس سے تاجر برادری حکومت کو بہترین الفاظ کے ساتھ ہمیشہ یاد رکھے۔

قبل ازیں موجودہ صدر سلیم الدین قریشی نے اپنے خطاب میں پورے سال کی کارکردگی پر روشنی ڈالی اور امید ظاہر کی کہ نو منتخب عہدیدار ان کی طرف سے کئے گئے اقدام کو مزید آگے بڑھائیں گے، نبیل احمد صدیقی کی سربراہی میں الیکشن کمیشن نے اراکین کمیٹی اور عہدیداروں کے انتخاب کا سرکاری اعلان کیا جس کے مطابق صدر محمد الطاف میمن، سینئر نائب صدر محمد ادریس میمن، نائب صدر مسرور اقبال، اراکین ایگزیکٹیو کمیٹی محمد فاروق شیخانی، دولت رام لوہانہ، محمد عارف میمن، احمد حسین شیخ، محمد سلیم خان اور ڈاکٹر اسماعیل فاروق نامی کو کامیاب قرار دیا، اِس موقع پر سرپرست چیمبر حاجی محمد یعقوب، ممبر صوبائی اسمبلی سندھ ندیم احمد صدیقی، نومنتخب عہدیدار، سابق صدر دولت رام لوہانہ، محمد اکرم انصاری اور دیگر نے بھی خطاب کیا، چیمبر کے ارکان جنرل باڈی اجلاس میں بڑی تعداد میں موجود تھے۔