کراچی اسٹاک ایکس چینج میں تیزی ،سرمایہ کاری مالیت میں36ارب57کروڑ روپے سے زائد کا اضافہ

کراچی (اُردو پوائنٹ اخبار تازہ ترین۔06اگست۔2015ء) کراچی اسٹاک ایکس چینج میں تیزی کا تسلسل جاری ہے ۔کاروباری ہفتے کے چوتھے روز جمعرات کو کے ایس ای 100انڈیکس تاریخ کی بلند ترین سطح 36200پوائنٹس کی حد عبور کرگیا ۔سرمایہ کاری مالیت میں36ارب57کروڑ روپے سے زائد کا اضافہ، کاروباری حجم گذشتہ روز کی نسبت0.32فیصدزائد جبکہ60.70فیصد حصص کی قیمتوں میں اضافہ ریکارڈکیاگیا۔

حکومتی مالیاتی اداروں،مقامی بروکریج ہاوٴسز اور دیگر انسٹی ٹیوشنز کی جانب سے پٹرولیم ،توانائی اور بینکنگ سیکٹر میں خریداری کے باعث کاروبار کا آغاز مثبت زون میں ہوا ۔ ٹریڈنگ کے دوران ایک موقع پر کے ایس ای 100انڈیکس36471پوائنٹس کی بلند ترین سطح پر بھی ریکارڈ کیا گیا۔تاہم فروخت کے دباوٴ اور پرافٹ ٹیکنگ کے باعث کے ایس ای 100انڈیکس مذکورہ سطح پر برقرار نہ رہ سکا ۔

(جاری ہے)

تاہم اتارچڑھاوٴ کا سلسلہ سارا دن جاری رہا ۔ اسٹاک ماہرین کے مطابق ملک میں امن و امان کی صورت حال میں بہتری آنے اور سپریم کورٹ کی جانب سے فوجی عدالتوں کو جائز قرار دینے کے فیصلے کے مثبت اثرات مارکیٹ پر مرتب ہوئے ہیں اور سرمایہ کار کا اعتماد بحال ہوا جس کی وجہ سے مارکیٹ میں تیزی دیکھی جارہی ہے ۔مارکیٹ کے اختتام پر کے ایس ای 100انڈیکس72.05پوائنٹس اضافے سے 36228.88پوائنٹس پر بند ہوا ۔

مجموعی طور پر397کمپنیوں کے حصص کا کاروبار ہوا ،جن میں سے241کمپنیوں کے حصص کے بھاوٴ میں اضافہ133کمپنیوں کے حصص کے بھاوٴ میں کمی جبکہ23کمپنیوں کے حصص کے بھاوٴ میں استحکام رہا ۔سرمایہ کاری مالیت میں36ارب57کروڑ50لاکھ13ہزار209روپے کا اضافہ ریکارڈ کیا گیا جبکہ سرمایہ کاری کی مجموعی مالیت بڑھ کر78کھرب56کروڑ31لاکھ27ہزار 356روپے ہوگئی ۔جمعرات کو مجموعی طور پر کاروباری سرگرمیاں33کروڑ78لاکھ28ہزار580شیئرز رہیں جوبدھ کے مقابلے میں10لاکھ92ہزار580 شیئرززائد ہیں ،قیمتوں کے اتار چڑھاوٴ کے حساب سے یونی لیور فوڈزکے حصص سرفہرست رہے ،جس کے حصص کی قیمت404.75روپے اضافے سے8570.00روپے اورنیسلے پاک کے حصص کی قیمت200.00روپے اضافے سے10700.00روپے ہوگئی ۔

نمایاں کمی مری بریوری کے حصص میں ریکارڈ کی گئی ،جس کے حصص کی قیمت40.00روپے کمی سے930.00جبکہ ایکسائیڈ پاک کے حصص کی قیمت20.71روپے کمی سے1090.00روپے ہوگئی ۔جمعرات کو سلک بینک کی سرگرمیاں2کروڑ63لاکھ26ہزار شیئرز کے ساتھ سرفہرست رہیں ،جس کے شیئرز کی قیمت1پیسے اضافے سے29پیسے جبکہ کے الیکٹرک کی سرگرمیاں2کروڑ50لاکھ88ہزار500 شیئرز کے ساتھ دوسرے نمبر پر رہیں ،جس کے شیئرز کی قیمت18پیسے اضافے سے8.25روپے ہوگئی ۔ کے ایس ای 30انڈیکس31.18پوائنٹس کمی سے 22475.42پوائنٹس ،کے ایم آئی 30انڈیکس217.74پوائنٹس اضافے سے 60061.38جبکہ کے ایس ای آل شیئرز انڈیکس118.92پوائنٹس اضافے سے 25184.16پر بند ہوا ۔