پاسڈیک پاکستان انویسٹمنٹ کانفرنس میں شرکت کرے گی

منگل 27 اکتوبر 2015 23:04

اسلام آباد(اُردو پوائنٹ اخبار تازہ ترین۔ 27 اکتوبر۔2015ء) پاکستان سٹون ڈویلپمنٹ کمپنی (پاسڈیک) ماربل اور گرینائٹ سیکٹر میں غیرملکی سرمایہ کاری لانے کیلئے بورڈ آف انویسٹمنٹ کے زیر اہتمام منعقد ہونے والی ’ پاکستان انویسٹمنٹ کانفرنس‘ میں شرکت کرے گی۔ یہ کانفرنس 4 اور 5 نومبر کو اسلام آباد میں ہوگی۔ جس میں تین سو سے زائد مقامی و غیرملکی سرمایہ کار‘ کاروباری شخصیات ‘ فیصلہ سازاور ماہرین شرکت کریں گے۔

پاسڈیک اس موقع پر سرمایہ کاروں سے کاروباری ملاقاتوں کے علاوہ ماربل و گرینائٹ اور ماربل موزیک کی مصنوعات کی نمائش بھی کرے گا۔ماربل اور گرینائٹ پاکستان کا ایک ابھرتا اور امید افزا شعبہ ہے جس میں سرمایہ کاری سمیت برآمدات اور روزگار کی وسیع صلاحیت موجود ہے۔

(جاری ہے)

قدرت کی فیاضی کی بدولت پاکستان میں ماربل ‘ گرینائٹ اور اونکس کے وسیع ذخائر ہیں جو مختلف رنگوں‘ شیڈز‘ پیٹرنزاور دھاریوں کے حامل ہیں۔

پاسڈیک نے ملک میں جدید ترین مشینوں کی مدد سے ماربل اور گرینائٹ کی کان کنی کو متعارف کرایا ہے جس کی بدولت بین الاقوامی معیار کے مطابق چوکور بلاکس کی پیداوار حاصل کی جارہی ہے جس کا مقصد اس سیکٹر کو ڈائمنشنل سٹون انڈسٹری میں ڈھالنا ہے۔ اس طریقہ کان کنی سے دوران پیداوار پتھر کا کم سے کم نقصان ہوتا ہے۔ اس طرح قدرتی معدنیات زیادہ سے زیادہ کارآمد بنائی جاتی ہے۔

برآمدات کے حوالے سے یہ بات قابل ذکر ہے کہ 2007-2008 میں ماربل اور گرینائٹ کی مجموعی برآمدات تقریباً 40 ملین ڈالر تھیں جو اس وقت بڑھ کر 134 ملین ڈالر تک پہنچ گئی ہیں۔ جدید کان کنی کے علاوہ پاسڈیک فاٹا سمیت رسالپور‘ چترال‘ لورالائی اور اسلام آباد میں پانچ ماربل سٹی (اندسٹریل اسٹیٹ) قائم کر رہا ہے جن کا مقصدپروسیسنگ کے شعبہ کو جدید سٹون ٹیکنالوجی اور مرضی کی سہولیات بہم پہنچاناہے۔ یہ منصوبے سرمایہ کاری کی زبردست صلاحیت رکھتے ہیں۔ماربل سٹی مہمند (فاٹا) اور ماربل سٹی رسالپور کا خاطر خواہ ترقیاتی کام مکمل ہوچکا ہے جبکہ بقایا پر کام جاری ہے ۔