بندرگاہوں پر دالوں سے لدے سینکڑوں کنٹینرز روکے جانے پر کے سی سی آئی کا شدید تشویش کااظہار

فوری طور پر اِن کنٹینرزکو ریلیز نہ کیا گیا تو مقامی طلب کو پورا کرنا دشوار ہوجائے گا اور مارکیٹوں میں دالوں کی قلت پیدا ہونے کے ساتھ ساتھ قیمتوں میں بھی ناقابل برداشت حد تک اضافہ ہوجائے گا ، کے سی سی آئی

بدھ 20 جولائی 2016 20:35

کراچی (اُردو پوائنٹ اخبارتازہ ترین - آن لائن۔20 جولائی ۔2016ء) کراچی چیمبرآف کامرس اینڈ انڈسٹری (کے سی سی آئی) اور اجناس کے درآمدکنندگان نے محکمہ پلانٹ پروٹیکشن کی جانب سے بندرگاہوں پر دالوں سے لدے سینکڑوں کنٹینرز روکے جانے پر گہری تشویش کا اظہارکرتے ہوئے خدشہ ظاہر کیا ہے کہ اگرفوری طور پر اِن کنٹینرزکو ریلیز نہ کیا گیا تو مقامی طلب کو پورا کرنا دشوار ہوجائے گا اور مارکیٹوں میں دالوں کی قلت پیدا ہونے کے ساتھ ساتھ قیمتوں میں بھی ناقابل برداشت حد تک اضافہ ہوجائے گا جس کا سب سے زیادہ نقصان غریب طبقے کو برداشت کرنا پڑے گا۔

کے سی سی آئی کے صدر یونس محمد بشیر نے محکمہ پلانٹ پروٹیکشن کے افسران کی آئے دن کی من مانیوں پرشدید احتجاج کرتے ہوئے ڈائریکٹر جنرل کوایک خط ارسال کیا ہے جس میں نشاندہی کی گئی ہے محکمہ پلانٹ پروٹیکشن نے عیدسے قبل دالوں سے لدے سینکڑوں کنٹینرز ایگزامیشن کے بہانے روک لیے تھے جو اب تک ریلیز نہیں کیے گئے۔

(جاری ہے)

کراچی چیمبر آف کامرس کو ممبران کی جانب سے بڑی تعداد میں موصول ہونے والی شکایات کے مطابق تمام ضوابط پورے کرنے کے باوجود محکمہ پلانٹ پروٹیکشن کے افسران نے بندرگاہوں پر درآمدی کنٹینرزروک کر درآمد کنندگان کو ہراساں کرنے کومعمول بنا لیا ہے حالانکہ یہ بات اُن کے علم میں ہے کہ اجناس کے کنٹینرز روکنے اور کلیئرنس میں مسلسل تاخیر سے مقامی مارکیٹوں میں دالوں کی قلت پیدا ہوسکتی ہے لیکن اس کے باوجود پلانٹ پروٹیکشن کے افسران نے مفاد عامہ کا بالکل بھی خیال نہ رکھا جبکہ درآمد کنندگان نے کنٹینرز روکے جانے کوپی آئی سی ٹی ،کے آئی سی ٹی اور محکمہ پلانٹ پروٹیکشن کی ملی بھگت قرار دیا ہے جس کا فائدہ ٹرمینل آپریٹرز کو ہو رہاہے۔

خط میں کے سی سی آئی کے صدر نے مزید کہا کہ پلانٹ پروٹیکشن کے افسران نے اختیارات کا ناجائز استعمال کرتے ہوئے جان بوجھ کر اجناس کے سینکڑوں کنٹینرز کی کلیئرنس میں رکاوٹ پیدا کردی ہے ۔کنٹینرز کی کلیئرنس تاخیر کا شکار ہونے سے درآمد کنندگان کو ڈیمرج ا ور ڈی ٹینشن کی مد میں خطیر نقصانات کا سامنا کرنا پڑ رہاہے۔انہوں نے اجناس کے کنسائمنٹس کی بار بار ایگزامینشن پرگہری تشویش کااظہار کرتے ہوئے کہاکہ کنسائمنٹس کے نمونے لیبارٹری کوبھیجنے کے بجائے تمام کنٹینرز کوبندرگاہ پر اتارنے کے احکامات صادر کر دیے گئے ۔

مجوزہ طریقہ کار میں کئی ہفتے لگ سکتے ہیں لہٰذابندرگاہ پر گنجائش نہ ہونے کی وجہ سے تمام کنٹینرز کو اتارناممکن نہیں جبکہ محکمہ پلانٹ پروٹیکشن کا عملہ جان بوجھ کر تاخیر سے پہنچتا ہے تاکہ درآمد کنندگان پر ساز باز کے لیے دباوٴ بڑھایا جاسکے۔کے سی سی آئی کے خط میں مزیدکہا گیاہے کہ ملک میں پہلے ہی غذائی اشیاء اور اجناس کی قلت ہے اور اس کمی کوپورا کرنے کے لیے یہ اشیاء درآمدکی جاتی ہیں تاکہ مارکیٹ میں وافر مقدار میں سپلائی کر کے ملکی طلب کو پورا کرتے ہوئے اجناس کومہنگا ہونے سے روکاجاسکے اور عوام کو مہنگائی کا سامنا نہ کرنا پڑے ۔

کے سی سی آئی کے صدراور درآمد کنندگان نے بندرگاہوں پر پلانٹ پروٹیکشن کے افسران کے غیرذمہ دارانہ اقدامات کو حکومت کی ساکھ متاثر کرنے کاباعث قرار دیتے ہوئے متعلقہ حکام کے خلاف سخت محکمہ جاتی کارروائی کرنے اور روکے گئے سینکڑوں کنٹینرزکی فی الفور کلیئرنس کا مطالبہ کیا ہے تاکہ مارکیٹ میں اجناس کی قلت کو دور کرنے اور قیمتوں میں ممکنہ اضافے کو بڑھنے سے روکنے کے ساتھ ساتھ درآمد کنندگان کو مزید نقصانات سے بچایا جاسکے