آخری امید سے آخری چوائس تک

 آخری امید کی آنکھ غیر معمولی طور پر دوپہر ایک بجے کے بجائے گیارہ بجے ہی کھُل گئی۔رات ارطغرل سیزن فائیو کے آٹھ ایپی سوڈ ایک ساتھ ہی نمٹا ئے تھے ۔ناشتے کے دوران جلالت زمانی بیگم نے نوٹ کیا کہ آخری امید آج کچھ سوچوں میں گم ہے ۔ ان کو کافی حیرت ہوئی، کہاں آخری امید اور کہاں سوچ و بچار کا کٹھن کام۔ آخر پوچھ ہی لیا، جہاں پناہ! آج طبیعت تو ٹھیک ہے، سوچوں میں گم ہیں۔

آخری امید نے بھنا ہُوا تلور چباتے ہوئے کہا اگر ارطغرل ایشیا اور یور پ فتح کر سکتا ہے تو میں کیوں نہیں، میں نے تو ورلڈ کپ بھی جیتا ہُوا ہے ۔ جی جی بالکل کیوں نہیں جلالت بیگم گویا ہوئیں اور ورلڈ کپ کرپٹ بھی نہیں ہے اور ہینڈسم بھی بہت ہے۔ آپ عالم اسلام کے طاقتور ترین حکمران ہیں ، آپ کے پاس ایٹم بمب ہیں ۔

(جاری ہے)

آخری امید فخر سے پھولنے ہی والی تھی کہ اچانک کچھ یاد آگیا۔

اختیارات تو بہت ہیں مگر باجویں ترمیم نے میرے ہاتھ باندھے ہوئے ہیں، کاش یہ باجویں ترمیم نہ ہوتی۔جلالت بولیں باجویں ترمیم نہ ہوتی تو پھر آپ بھی نہ ہوتے۔اسی وقت آخری امید کے آئی فون پر پارٹی کے وزیر مواصلات کا میسیج آگیا لکھا ہوا تھا ” آپ کے سوا کوئی چوائس نہیں ہے“۔ خوشی کے مارے آخری امید کے نتھنے پھڑپھڑانے لگے، وہ دہرانے لگے، بڑبڑانے لگے ” میرے سوا کوئی چوائس نہیں“ ” میں آخری چوائس ہوں“۔

میرے پاس اے ٹی ایم ہے ان کے پاس کیا ہے، میرے پاس ارسطو ہے ان کے پاس کیا ہے۔
 اسلامی جمہوریہ پر آخری امید کو دادِ حکومت دیتے ہوئے دو برس ہو چکے ہیں۔ اس مملکت خداداد ا کی خوش قسمتی ہے کہ آخری امید کو ٹیم بنانا آتی ہے اور آخری امیدمغرب کو بھی اچھی طرح سمجھتی ہے۔ مغرب کو سمجھنے والی اسی سمجھ سے کام لیتے ہوئے آخری امید نے بائیس سال مسلسل جدوجہد کی ہے اور دو سو بندوں کی ٹیم بنائی ہوئی ہے بلکہ بنا کے چھپائی ہوئی ہے۔

آخری امید یہ بھی جانتی ہے کہ اسٹیبلشمنٹ سیاست دانوں کو کیسے غلام بناتی ہے اور عالمی ساہوکار ادارے قرضوں کے نام پر قوموں کو کیسے جکڑتے ہیں۔ آخری امید کو قوی امید ہے کہ لاک ڈاوٴن ناکام بنانے اور کورونا کے سستے نسخے عوام کو بتانے پر طِب کا نوبل انعام آوے ای آوے۔ اسی لاکھ کشمیریوں پرایک سال سے جاری کرفیو اور ظلم و ستم پر آخری امید نے جس طرح سیکریٹیریٹ کے سرکاری ملازمین کو آدھ گھنٹہ دھوپ میں کھڑے کرکے امن پسندی کا ثبوت دیا ہے اس پر ان کو یقین ہے کہ ان سے امن کا نوبل انعام قبول کرنے کی بھی درخواست کی جائے گی۔

آخری امید یہ بھی جانتی ہے کہ اگر پیٹرول کی قیمت ، ٹی وی کی فیس، اور ٹیکس بڑھ جائے تو وزیر اعظم کرپٹ ہوتا ہے اور اگر کوئی بے گناہ قتل ہوجائے ، یا اغوا ہوجائے تو وزیر اعظم ذمہ دار ہوتا ہے۔ آخری امید نے شکر کیا کہ وہ اصلی وزیر اعظم نہیں ہے ورنہ ساری ذمہ داری اس پر آتی۔ ناشتے کے دوران آپ سوشل میڈیا سیل کی بنائی ہوئی خبریں بھی پڑھ رہے تھے اور اپنے کارنامے جان کر خوش ہورہے تھے۔

اسی دوران امریکی سلامتی کے قومی مشیر کا فون آگیا ۔ مشیر نے امریکی سلامتی بارے اپنی بہت قیمتی آراء بتائیں۔ آپ نے مشیر سے مزید ہدایات لیں ۔ ابھی فون رکھا ہی تھا کہ خادم نے بتایا برطانوی مفادات کے مشیر باریابی چاہتے ہیں۔ برطانوی مشیر نے بتایا کہ آرام کی زندگی چھوڑ کر پاکستان آمد کے ان کے دو عظیم مقاصد ہیں۔ مقصد اول یہ کہ نئے پاکستان کے سرکاری اسکول سے میٹرک کی اعلیٰ تعلیم حاصل کی جائے اور دوسرا عظیم مقصد انکم ٹیکس رجسٹریشن اور این ٹی این نمبرکا حصول ہے۔

برطانوی مشیر نے بتایا وہ وطن کی خدمت کے جذبے کے کوٹ کوٹ کر بھرے ہونے کے قائل ہیں، مشیر محترم کے والد صاحب نے بھی بے شمار پاکستانیوں کو لبیا میں کوٹ کوٹ کر وطن کی خدمت کی تھی۔ آخری امید نے مشیر کو خراج تحسین پیش کیا اور ان کو بتایا کہ ” میرے سوا کوئی چوائس نہیں“ ان کے بچے باہر ہیں، ان کی جائیدادیں باہر ہیں، ان کے اثاثے باہر ہیں۔ مشیرنے آخری امید سے مکمل اتفاق کیا ۔

ناشتہ کرتے ہوئے دوپہر کے دو بج چکے تھے۔ آخری امید نے ہنگامی دورے پر دفتر روانگی کی تیاری کی۔ دفتر جانے کے لیے ابھی ہیلی کاپٹر میں بیٹھے ہی تھے کہ گوریلے کی طرح جھومتا ہوا ایک مشیر دروازے سے لٹک گیا ، کوئی بات کرنا چاہتا تھا۔ آخری امید نے پیار سے کہا ” ہسٹا لا وسٹا ! موٹے “ اور ہیلی کاپٹر کے اصلی ڈگری والے پائلٹ کو چلنے کا اشارہ کر دیا۔