9 مئی سازش تھی یا بانی چیئرمین پی ٹی آئی نے اپنے تکبر ،غرور میں یہ حرکت کی اسکا خمیازہ بھگتنا پڑے گا‘رانا ثناء اللہ

لاہور (اُردو پوائنٹ اخبارتازہ ترین - این این آئی۔ 04 دسمبر2023ء) مسلم لیگ (ن) پنجاب کے صدر رانا ثناء اللہ نے کہا ہے کہ 9مئی سازش تھی یا بانی چیئرمین پی ٹی آئی نے اپنے تکبر اور غرور میں یہ حرکت کی اس کا خمیازہ بھگتنا پڑے گا ،سائفر کیس میں جنرل (ر) باجوہ کو بلانے یا نہ بلانے کا فیصلہ عدالت کرے گی،بنیادی فیصلوں کے علاوہ کوئی ایک جماعت ملک کو بحران سے نہیں نکال سکتی،چارٹر آف اکانومی تمام سیاسی جماعتوں کو بٹھاکر کیا جانا چاہیے ، جے یو آئی کے ساتھ الیکشن اتحاد کی کوئی بات زیر غور نہیں ،سیٹ ایڈجسٹمنٹ جن جماعتوں سے بھی ممکن ہو سکتی ہے اور اس پر بات چیت جاری ہے ،نواز شریف کی قیادت میں پاکستان کی بحالی معاشی بحران سے نکالنے و غریب آدمی کی زندگی کو آسان بنانے کی جنگ لڑیں گے۔

ان خیالات کا اظہار انہوں نے پارٹی کے مرکزی سیکرٹریٹ ماڈل ٹائون میں نواز شریف اور شہباز شریف کی زیر صدارت پارلیمانی بورڈ کے اجلاس کے بعد میڈیا کو بریفنگ دیتے ہوئے کیا ۔

(جاری ہے)

رانا ثناء اللہ نے کہا کہ سب کی بات سنی گئی ہے ، (ن) لیگ کے ورکرز ، رہنمائوں کا شکریہ ادا کرتا ہوں ، ایسے ایسے لوگ تھے جو 35سے 40سال سے (ن ) لیگ سے وابستہ ہیں،تمام امیدواروں نے اپنی پوزیشن بتائی ، اپنے حق کو جتایا کہ وہ کس طرح سے ٹکٹ کے حقدار ہیں لیکن کسی نے کسی کے خلاف کوئی بات نہیں کی اور بہت اچھے ماحول میں انٹرویوہوئے جو ہم سب کے لئے انتہائی خوشگوار لمحات تھے ۔

اجلاس میں 122لوگوں کے انٹرویو کیے گئے ،قومی اسمبلی کے حلقہ این اے 51سے این اے 57تک اور اسی طرح پی پی 6سے لیکر پی پی 19تک حلقے تھے ۔ ان حلقوں کے متعلق بورڈ نے ابتدائی ڈسکشن کر لی ہے اور فیصلہ یہی ہے کہ جب دو تین ڈویژنز کو ہم مکمل کر لیں گے تو اس کے بعد امیدواروں کا اعلان کیا جائے گا۔ اس کے بعد اگلے ہفتے دس دن تک اس ایکسائز کو اسی طرح سے مکمل کیا جائے گا ۔

آج (منگل ) کے پی کے ڈویژن کے متعلق بورڈ انٹرویو کرے گا اور کل (بدھ ) بلوچستان کی باری ہے اس کے بعد دوبارہ ہم پنجاب کا شیڈول جاری کریں گے ۔ جس میں نواز شریف کی اپیل کی تاریخیں بھی ہیں جس میں غالباً جمعرات کو انہوں نے پیش ہونا ہے تو اس کے لئے ایک دو دن کا وقفہ ہو گا اور اس کے بعد دوبارہ یہ سلسلہ شروع ہو گا۔ انہوں نے کہا کہ مسلم لیگ (ن) الیکشن کے لئے پوری طرح سے تیار ہے اور ہمارے ورکرز، سپورٹرز، ووٹرز الیکشن میں حصہ لینے کے لئے پوری طرح سے پرجوش ہیں کہ پارٹی کو عوامی مینڈیٹ ملے اس کے بعد وہ وعدہ جو 21اکتوبر کو نواز شریف نے پوری قوم سے کیا ہے کہ ہم ملک کو اس بحران سے نکالیں گے ۔

غریب آدمی کی زندگی مشکل نہیں بلکہ ناممکن ہو چکی ہے اور جس طرح سے مہنگائی کی وجہ سے عام آدامی کا برا حال ہے اور اس بحران میں پورا ملک مبتلا ہے تو اس بحران سے پاکستان کو انشاء اللہ تعالیٰ نکالیں گے اور پاکستان دوبارہ 17،18کی طرح ٹریک پر آئے گا اور آگے بڑھے گا اور انشاء للہ خوشحالی کی منزل حاصل کرے گا ۔ انہوں نے ایک سوال کے جواب میں کہا کہ نواز شریف چاروں صوبوں کا دورہ کریں گے اور پورے پاکستان میں جائیں گے ،سندھ میں بھی یقینی طور پر جائیں گے ۔

جے یو آئی کے ساتھ الیکشن اتحاد کی کوئی بات زیر غور نہیں لیکن سیٹ ایڈجسٹمنٹ ہو سکتی ہے اور وہ جن جماعتوں سے بھی ممکن ہو سکتی ہے اور اس پر بات چیت ہو بھی رہی ہے اور آئندہ آنے والے دنوں میں اس پر پیشرفت ہو سکتی ہے ۔دانیال عزیز سے متعلق سوال کے جواب میں انہوں نے کہا کہ دانیال عزیز ہمارے بھائی ہے ، وہ ایک صوبائی حلقے کے ٹکٹ پر ناراضگی یا اپنا غصہ پوری پارٹی پر اتارنا چاہتے ہیں اگر یہی وجہ تھی اور انہیں احسن اقبال یا مریم اورنگزیب کی وجہ سے کوئی ایشو تھا تو 16ماہ کیا کرتے رہے وہ اس وقت بات کرتے ، حکومت نے اپنی مدت پوری کر لی اور اس کے بعد بھی 3سے 4ماہ ہو گئے ہیں اس وقت بات کرتے ، اب اویس قاسم کے ٹکٹ کا مسئلہ ہوا اس حلقے سے احمد اقبال جو احسن اقبال کے بیٹے ہیں تو انہوں نے بھی الیکشن لڑنے کی خواہش ظاہر کی ہے جبکہ دانیال عزیز اس حلقے سے اویس قاسم کو الیکشن لڑانا چاہتے ہیں تو یہ کوئی ایسا معاملہ نہیں جو حل نہ ہو سکے بلکہ یہ حل ہو سکتا ہے ، اگر کسی حلقے سے دو امیدوار الیکشن لڑنا چاہیں تو پارٹی میرٹ پر فیصلہ کرے گی لہٰذا دونوں کو فیصلے کا انتظار کرنا چاہیے ،اس صورتحال کو اپنے ایک حلقے سے اٹھا کر پورے صوبے اور ملک پر نافذ کریں تو میں سمجھتا ہوں کہ یہ زیادتی ہے ۔

انہوں نے کہا کہ ابھی کوئی فیصلہ نہیں ہوا اور جب جب بھی فیصلے ہوتے ہیں تو یہ مکس میچ ہوتا ہے ، نوجوان ہے یا بزرگ ہے اس بات پر ٹکٹ کا فیصلہ نہیں ہوتا بلکہ بات یہ ہوتی ہے کہ پارٹی کو سیٹ ریٹرن کر کے کون دے گا ، پارٹی کے لئے کون سیٹ جیتے گا ، وہ کوئی عمر رسیدہ ہو یا نوجوان ہو اس سے کوئی فرق نہیں پڑتا ، جب پورا ضلع آپکے سامنے بیٹھا ہو تو سمجھ آجاتی ہے کہ کون اس حلقے سے بہتر ہے ، اس کے لئے امیدوار کی عمر کی کوئی حد نہیں ، کم از کم 25سالہ ہونی چاہیے اور اس سے اوپر کوئی حد نہیں ہے ، وہ جب تک بھی ہاتھ پائوں چلتے ہیں تو الیکشن لڑا جا سکتا ہے ۔

رانا ثناء اللہ نے انتخابات تاخیر کا شکار ہونے سے متعلق سوال کے جواب میں کہا کہ یہ الیکشن کی تاریخ کسی حکومت ، وزیر اعلیٰ یا الیکشن کمیشن نے نہیں دی بلکہ سپریم کورٹ آف پاکستان کے چیف جسٹس نے سب کر بلا کر ایک تاریخ کا اعلان کیا ہے اور میں نہیں سمجھتا کہ اس تاریخ سے نکلا جا سکتا ہے اور تاریخ آگے پیچھے کی جا سکتی ہے ۔ لہٰذا 8فروری کو انشاء اللہ تعالیٰ انتخابات ہوں گے اور مسلم لیگ (ن) عوامی مینڈیٹ حاصل کرے گی ۔

بانی چیئرمین پی ٹی آئی سے متعلق سوال کے جواب میں انہوں نے کہا کہ سائفر کیس میں جنرل (ر) باجوہ کو بلانے یا نہ بلانے کا فیصلہ عدالت کرے گی،عمران خان ایک جھوٹا اور مکار آدمی ہے ، ایک دن ایک جھوٹ بولتا ہے دوسرے دن اس سے الٹ بات کرتا ہے ، پہلے کہا تھا کہ امریکہ نے سازش کر کے میری حکومت گرائی ہے ، بعد میں کہا کہ امریکہ نے نہیں گرائی بلکہ جنرل باجوہ نے یہاں بیٹھ کر میرے خلاف سازش کی ہے ۔

اب کہہ رہا ہے کہ میرے خلاف باہر بیٹھ کر لندن پلان بنا اس کی بنیاد پر 9مئی ہوا ، اس سے کوئی پوچھے کہ 9مئی سے پہلے جب تم یہ کہہ رہے تھے کہ اگر مجھے گرفتار کیا گیا تو آپ نے فلاں فلاں جگہ پر جا کر احتجاج کرنا ہے تو کیا یہ کوئی لندن میں بیٹھ کر تمہیں مجبور کر رہا تھا کہ تم ایسی تقریریں کرو ، کس نے کہا تھا کہ تم لوگوں کو یہ چیزیں سمجھائو اور نوجوانوں کو گمراہ کرو ، ان کے ذہنو ں کو خراب کرو ، انہیں یہ سمجھتائو کہ اگر مجھے گرفتار کیا گیا تو فلاں فلاں جگہ پر جا کر احتجاج کرنا ہے ، گرفتاری نہ دینے کا فیصلہ امریکہ کے کہنے یا میاں نواز شریف کے کہنے پر کیا تھا ۔

انہوں نے کہا کہ اگر کوئی گرفتار کرنا چاہتا ہے تو گرفتاری دو اس کے بعد اپنے ضمانت کے حق کو استعمال کرو ۔ جناح ہائوس میں جن لوگوں نے آگ لگائی ، تمہارا بھانجا جو چھڑی پر وردی گھما رہا تھا تو کیا وہ ہمارا رشتے دار ہے ، اس سے پوچھو جا کر کہ یہ تمہارے خلاف سازش ہوئی تھی یا خود تم نے اپنے تکبر اور اپنے غرور میں یہ حرکت کی اور اس کا خمیازہ تمہیں بھگتنا پڑے گا ، اگر یہ سازش ہے تو یہ تم نے خود اپنے خلاف کی ہے اور سازشی تم خود ہو ۔

مولانا فضل الرحمن کو صدر مملکت بنانے سے متعلق سوال کے جواب میں رانا ثناء اللہ نے کہا کہ الحاق پر کوئی بات چیت نہیں ہوئی ، یہ فیصلے پارلیمنٹ کے وجود میں آنے کے بعد ہوتے ہیں ، پارلیمنٹ جب وجود میں آجائے گی تو پتہ چلے گا کہ وزیر اعظم ، چیئرمین سینیٹ ، قومی اسمبلی کے اسپیکر ،صدر کون ہوں گے ، تو ان چیزیں کے اوپر بات کرنا قبل از وقت ہے ۔

انہوں نے کہا کہ اگر کسی کے خلاف جھوٹے مقدمے بنائے جائیں اور سزائیں دلائی جائیں تو وہ سزائیں ختم ہو جائیں تو کیا یہ لاڈلہ پن ہے بلکہ لاڈلا تو وہ تھا جسے مسلم لیگ (ن) کی چلتی حکومت اور ملک کو ترقی کی طرف بڑھتے ہوئے روک کر حکومت ختم کی گئی ، نواز شریف کو نکالا گیا اور اسے مسلط کیا گیا وہ لاڈلا پن تھا ، اب اگر کوئی عدالت وہ فیصلہ کالعدم قرار دے رہی ہے تو یہ انصا ف ہے ۔

الیکشن کے لئے فنڈز جاری کرنے سے متعلق سوال کے جواب میں انہوں نے کہا کہ مسلم لیگ (ن) کے دبائو ڈالنے سے پہلے الیکشن کمیشن سپریم کورٹ جائے گا اور یا سپریم کورٹ ازخود نوٹس لے گا اور فنڈز جاری ہو جائیں گے ، یہ کہنا کہ نگران حکومت فنڈز جاری نہیں کر رہی تو یہ غلط ہے جیسے ہی الیکشن کمیشن کی جانب سے ڈیمانڈ پہنچے تو فنڈز جاری ہو جائیں گے ۔رانا ثناء اللہ نے مزید کہا کہ جو کہتا تھا کہ فلاح کو پکڑ کے گھسیٹوں گا اب خود اڈیالہ جیل میں بیٹھا ہوا ہے، ریکارڈ پر ہے کہ یاسمین راشد کہتی ہیں کہ اکٹھے ہو جائیں پھر جناح ہائوس کی طرف جانا ہے کیا ،یہ لندن سے ہدایات ملیں ،اعجاز چوہدری نے بیٹے کو ہدایات دیں ،کیا کوئی لندن سے پیغام بھیج رہا تھا، مراد سعید سمیت سب کی فون ٹیپ محفوظ ہیں اگر ٹیپس چلا دی جائیں تو کسی کو منہ نہ دکھا پائیں، آگ لگانے کا سارا سامان موجود تھا ، پشاور میں کور کمانڈر سے فائرنگ سے ڈر کر ریڈیوپاکستان جلا دیا گیا ، کیا نوازشریف نے کہا تھاکہ اگر گرفتار ہوا تو آپ نے جوڈیشل کمپلیکس پر حملہ کرنا ہے۔

انہوں نے کہا کہ وہ جیل میں بھی روز دیسی مرغی دیسی گھی میں کھا رہا ہے،لائبریری ،جم ،ٹی وی دستیاب جبکہ بیرک کو بھی کھلا کر دیا گیا ہے اس قسم کی سہولتوں پر بھی ہمیں کوئی اعتراض نہیں ہے لیکن عام معافی کسی کے لئے نہیں ہونی چاہیے ۔ انہوں نے کہا کہ نواز شریف کی قیادت میں پاکستان کی بحالی معاشی بحران سے نکالنے و غریب آدمی کی زندگی کو آسان بنانے کی جنگ لڑیں گے، بنیادی فیصلوں کے علاوہ کوئی ایک جماعت ملک کو بحران سے نہیں نکال سکتی،چارٹر آف اکانومی تمام سیاسی جماعتوں کو بٹھاکر کیا جانا چاہیے ، پارلیمنٹ وجود میں آ جائے تو پھر تمام جماعتوں کو آن بورڈ لے کر فیصلے کرنا ہوں گے۔

انہوں نے کہا کہ منشور میں نیب سمیت کسی اور ادارے کو بند کرنے یا کھولنے کی بات نہیں ہو گی، جو نیب نے کیا ایسے کسی ادارے پر پیسہ خرچ نہیں ہونا چاہیے ۔