عام انتخابات ،امیدواروں کی جانب سے کاغذات نامزدگی حاصل اور جمع کروانے کا سلسلہ جاری ، (کل )آخری روز ہو گا

نواز شریف کے این اے 130 لاہور سے کاغذاتِ نامزدگی حاصل ،شہباز شریف نے این اے 132 قصور سے کاغذات جمع کروا دیئے میانوالی سے بانی چیئرمین پی ٹی آئی کے کاغذات نامزدگی جمع،بلاول بھٹو کے این اے 128 لاہور سے کاغذات نامزدگی جمع کروائے گئے حلقہ این اے 69سے پرویز الٰہی کے کاغذات نامزدگی جمع ،مریم اورنگزیب نے خواتین کی مخصوص نشستوں پر کاغذات جمع کروا ئے خواجہ آصف نے سیالکوٹ میں این اے 71،پی پی 46اور 47سے کاغذات جمع کروائے،بشیر میمن نے این اے 216سے کاغذات جمع کروا ئے سابق وزرائے اعظم یوسف رضا گیلانی نے حلقہ این اے 148،راجہ پرویز اشرف نے گوجر خان میں این اے 52سے کاغذات نامزدگی جمع کرا دیئے سابق وزیر اعلیٰ بلوچستان ڈاکٹر عبدالمالک نے این اے 259سے کاغذات نامزدگی جمع کروائے

جمعہ 22 دسمبر 2023 19:35

لاہور (اُردو پوائنٹ اخبارتازہ ترین - این این آئی۔ 22 دسمبر2023ء) ملک میں 8فروری 2024ء کو شیڈول انتخابات کے لئے امیدواروں کی جانب سے کاغذات نامزدگی حاصل اور جمع کروانے کا سلسلہ جاری ہے ،الیکشن کمیشن آف پاکستان کی جانب سے توسیع کے بعد امیدوار کل (اتوار ) تک کاغذات نامزدگی جمع کروا سکتے ہیں ۔گزشتہ روز سابق وزیر اعظم و پاکستان مسلم لیگ (ن) کے قائد نواز شریف کے لاہور سے قومی اسمبلی کے حلقہ این اے 130 سے کاغذاتِ نامزدگی حاصل کرلیے گئے۔

مسلم لیگ (ن) کے رہنما بلال یاسین نے نواز شریف کے کاغذاتِ نامزدگی حاصل کیے۔جبکہ ان کے بطور کورنگ امیدوار بلال یاسین ہوں گے جو کہ پنجاب اسمبلی کے حلقہ پی پی 174 سے الیکشن لڑیں گے۔مسلم لیگ (ن) کے صدر شہباز شریف نے این اے 132 قصور سے کاغذات نامزدگی جمع کروا دیئے ۔

(جاری ہے)

سابق وزیر اعظم نے این اے 123 اور پی پی 158 سے بھی کاغذات نامزدگی حاصل کر رکھے ہیں۔

بانی چیئرمین پاکستان تحریک انصاف کے کاغذات نامزدگی جمع کرا دئیے گئے۔سابق چیئرمین پی ٹی آئی کی جانب سے میانوالی کے حلقہ این اے 89 سے کاغذات نامزدگی جمع کرائے گئے، بانی چیئرمین پی ٹی آئی کے کاغذات نامزدگی بلال عمر بودلہ نے جمع کرائے۔تحریک استحکام پاکستان کے رہنما میجر خرم حمید روکھڑی نے بھی کاغذات نامزدگی جمع کرا دئیے، میجر خرم حمید خان روکھڑی این اے 89 سے الیکشن لڑیں گے، علاوہ ازیں انعام اللہ خان نیازی نے پی پی 87 کے لیے کاغذات نامزدگی جمع کرا دئیے۔

مسلم لیگ (ن) کی مرکزی سیکرٹری اطلاعات وسابق وفاقی وزیر مریم اورنگزیب نے قومی اسمبلی میں خواتین کی مخصوص نشستوں پر کاغذات نامزدگی جمع کروا دیئے ۔مریم اورنگزیب نے پنجاب اسمبلی کی خواتین مخصوص نشست پر بھی کاغذات جمع کروائے ہیں۔چیئرمین پاکستان پیپلز پارٹی بلاول بھٹو زرداری کے این اے 128 لاہور سے کاغذات نامزدگی جمع کروائے گئے ۔ مسلم لیگ (ن) کے سینئر رہنما و سابق وفاقی وزیر خارجہ خواجہ محمد آصف نے سیالکوٹ میں قومی اسمبلی کے حلقہ این اے 71اور پنجاب اسمبلی کے حلقوں پی پی 46اور 47سے کاغذات نامزدگی جمع کروائے،مسلم لیگ (ن) سندھ کے صدر بشیر میمن نے مٹیاری میں حلقہ این اے 216سے کاغذات نامزدگی جمع کروا دیئے ، مسلم لیگ (ن) کے سینئر رہنما و سابق وفاقی وزیر میاں جاوید لطیف کے حلقہ این اے 116،115اور پی پی 141سے کاغذات نامزدگی جمع کروائے گئے ، پی پی 82خوشاب سے سردار الطاف علی رضا خان نے کاغذات نامزدگی حاصل کر لیے ،سابق وزیر اعظم یوسف رضا گیلانی نے حلقہ این اے 148سے کاغذات نامزدگی جمع کرا دیئے ،پیپلز پارٹی کے سینئر رہنما سید خورشید شاہ نے حلقہ این اے 206سے کاغذات نامزدگی جمع کرا دیئے ،پیپلز پارٹی کے رہنما و سابق وزیر اعظم راجہ پرویز اشرف نے گوجر خان میں حلقہ این اے 52سے کاغذات نامزدگی جمع کرا دیئے،سابق وزیر اعلیٰ بلوچستان ڈاکٹر عبدالمالک نے حلقہ این اے 259سے کاغذات نامزدگی جمع کروائے ، ملکوال میں حلقہ این اے 69سے سابق وزیر اعلیٰ پنجاب چودھری پرویز الٰہی کے کاغذات نامزدگی جمع کرا دیئے گئے ۔

دوسری جانب پاکستان پیپلز پارٹی وسطی پنجاب کی طرف سے جنرل اور مخصوص نشستوں پر امیدواروں کی طرف سے کاغذات نامزدگی جمع کرانے کا سلسلہ جاری ہے ۔پی پی8سے خرم پرویز راجہ،پی پی 9سے چودھری محمد سرفراز،پی پی 25سے تسنیم ناصر گجر، این اے 98اور پی پی 104سے رانا فاروق سعید،پی پی 96سے سید حسن مرتضی،این اے 127سے فیصل میر ،پی پی 162سے خرم فاروق ایڈوکیٹ،این اے 131سے چودھری منظور،پی پی 177سے آصف کھوکھر،پی پی 178سے شمیم صفدر اور مقبول ٹولو،پی پی 171سے شکیل پاشا ،این اے 73رانا محمود اشرف،پی پی 165لاہور،رانا صفدر دلشاد،پی پی 50سیالکوٹ مقصود اشرف،پی پی 101فیصل آباد محمد اشرف ،این اے 137اور پی پی 186سے علی حسنین شاہ نقوی،این اے 51اور پی پی 7سے چودھری ظہیر سلطان،این اے 71سیالکوٹ،احسن زاہد،پی پی 139ملک جمشید شہباز،پی پی 111 سے میاں اشفاق حسین،پی پی 20سے علی قربان اور این اے 114سے سردار آصف احمد ،پی پی 36 طاہر چیمہ،پی پی 11سے اسفند یار راجہ نے کاغذات نامزدگی اپنے اپنے حلقے کے ریٹرننگ افسران کو جمع کرا دئیے ہیں۔

الیکشن کمیشن نے سیاسی جماعتوں کے مطالبے پر کاغذات نامزدگی جمع کرانے کی تاریخ میں 2 روز کی توسیع کردی ہے۔الیکشن کمیشن کے جاری کردہ تازہ ترین شیڈول کے مطابق امیدوار 24 دسمبر تک اپنے کاغذات نامزدگی جمع کروا سکتے ہیں۔ سیاسی جماعتیں مخصوص نشستوں کی ترجیحی فہرست بھی 24 دسمبر تک دے سکتی ہیں۔ای سی پی کے مطابق کاغذات کی جانچ پڑتال اب 25سے 30 دسمبر تک ہوگی جبکہ ریٹرننگ افسر کے فیصلوں کیخلاف اپیل 3 جنوری تک دائر ہوگی، پولنگ شیڈول کے مطابق 8 فروری 2024ء کو ہوگی۔