Live Updates

آئی ایم ایف کی بدترین شرائط کے سامنے حکومتی سرنڈر معیشت کو مفلوج کرچکا ہے

شرح سود می کمی اور آئی پی پیز کیخلاف اقدامات کے باوجود سستی بجلی میں حکومت بڑی رکاوٹ ہے، اربوں روپے کی گاڑیوں کی خریداری اور ارکان کی تنخواہوں میں اضافہ معیشت کو کینسر زدہ کررہا ہے۔ لیاقت بلوچ

ثنااللہ ناگرہ پیر 27 جنوری 2025 19:02

آئی ایم ایف کی بدترین شرائط کے سامنے حکومتی سرنڈر معیشت کو مفلوج کرچکا ..

لاہور (اُردوپوائنٹ اخبارتازہ ترین۔ آئی پی اے۔ 27 جنوری 2025ء) نائب امیر جماعتِ اسلامی، مجلسِ قائمہ سیاسی قومی اُمور کے صدر لیاقت بلوچ نے صوابی (خیبرپختونخوا) میں ضلعی مشران کانفرنس اور اسلام آباد میں نوجوان رہنما راجہ عمیر کی دعوتِ ولیمہ اور 03 فروری قومی کشمیر کانفرنس کے انعقاد کے لیے انتظامی مشاورتی اجلاس سے خطاب کرتے ہوئے کہا کہ 05 فروری کو پوری قوم پورے ملک میں کشمیر و فلسطین سے غیرمتزلزل یکجہتی کا اظہار کرے گی۔

مسئلہ کشمیر و فلسطین کا حل مِلتِ اسلامیہ اور پاکستانی مِلت کے لیے رگِ جاں کی حیثیت رکھتا ہے۔ 03 فروری کو قومی کشمیر کانفرنس میں شرکت کے لیے پاکستان کے قومی دینی رہنماؤں اور آزاد جموں و کشمیر آل پارٹیز حریت کانفرنس، سینئر سفارت کاروں، دانش وروں اور سینئر صحافیوں کو مدعو کیا جارہا ہے۔

(جاری ہے)

غزہ میں فلسطینیوں کی مزاحمت، استقامت نے فتح کی نئی راہیں کھول دی ہیں۔

مقبوضہ کشمیر کے بہادر مظلوم کشمیریوں کو مستقبل میں کامیابی کی روشنی مِل گئی ہے۔ مشاورتی اجلاس میں خالد رحمن، ڈاکٹر محمد مشتاق خان، عبدالرشید ترابی، انجینئر نصراللہ رندھاوا، ڈاکٹر خالد محمود، غلام محمد صفی، زبیرصفدر اور دیگر رہنما موجود تھے۔

لیاقت بلوچ نے صوابی میں کانفرنس سے خطاب کرتے ہوئے کہا کہ پاکستان، ایران اور افغانستان کے مابین مضبوط، پائیدار، بااعتماد تعلقات خطہ کے امن و سلامتی کے لیے ناگزیر ہیں۔

افغانستان میں ازسرِنو امریکہ، انڈیا اور اسرائیل کے اثرات بڑی بدقسمتی ہوگی۔ افغانستان کی طالبان قیادت افغانستان کو غلبہ اسلام، اتحادِ اُمت اور استعماری دشمن قوتوں سے پاک سرزمین بنائیں۔ دُنیا میں توسیع پسندی اور یک محوری ڈاکٹرائین نہیں چل سکتا، 'جیو اور جینے دو' کا اصول ہی انسانوں کو تحفظ دے گا۔ امریکہ دُنیا میں اپنی ساکھ اور اعتماد کھوچکا ہے، ہر آنے والا دِن امریکہ کے خلاف مزاحمت کو بڑھا رہا ہے۔

امریکی صدر کو امریکہ کی ماضی کی غلطیوں سے سبق سیکھنا چاہیے اور امریکہ کو جنگی جنون سے نجات دلانے کے لیے کام کرنا چاہیے۔ خیبرپختونخوا میں دہشت گردی، بدامنی، تاجروں اور عوام کے جان، مال، عزت کے لیے بڑھتے خطرات تشویشناک ہیں۔ وزیراعلیٰ خیبرپختونخوا علی امین گنڈاپور کی جانب سے اسلام آباد کی مجلسِ مشاورت میں مِلی یکجہتی کونسل امن کا لائحہ عمل دے گی۔

جماعتِ اسلامی ہی خیبرپختونخوا کے عوام کی اولین چوائس بنانے کے لیے جماعتِ اسلامی کے کارکنان دِن رات محنت کریں۔

لیاقت بلوچ نے صحافیوں اور معززین کے سوالات کے جواب میں کہا کہ مفاہمت، مذاکرات، اقرار و انکار پُراسرار کھیل بنا ہوا ہے، اِس وجہ سے سیاست، جمہوریت کے لیے خطرات کے سائے بڑھ رہے ہیں۔ جاگیردارانہ، سرمایہ دارانہ اور مفاد پرستانہ ذہنیت و نظام کے خلاف عوام بغاوت پر آمادہ ہیں۔

ملک کا معاشی نظام غریب اور سفید پوش طبقہ کے لیے موت کا کھیل بن گیا ہے۔ بجلی، گیس، تیل اور ٹیکسوں کا بوجھ ناقابلِ برداشت ہے۔ شرحِ سُود می کمی اور آئی پی پیز کے خلاف اقدامات کے باوجود عوام کو سستی بجلی دینے میں حکومت خود بڑی رُکاوٹ ہے۔ آئی ایم ایف کی بدترین شرائط کے سامنے حکومتی سرنڈر قومی معیشت کو مفلوج کرچکا ہے۔ وزیراعظم اور اقتصادی ٹیم کے بیرونی دورے سیرسپاٹے ہیں، دوسری طرف تباہ حال معیشت میں سرکاری افسران کے لیے اربوں کی گاڑیوں کی خریداری، ممبران اسملی و پارلیمنٹ کی تنخواہ و مراعات میں بے تحاشا اضافہ، سرکاری محکموں میں کرپشن اور مفت خوری اقتصادی نظام کو کینسر زدہ کررہے ہیں۔

وزیراعظم، وزرائے اعلیٰ ملک کے اندر خودانحصاری کے فروغ اور عیاشیوں سے انکار کا نطام لائیں۔