فیصل کریم کنڈی کا پاکستان کی خودمختاری کے دفاع کے عزم کا اعادہ

ڈیرہ اسماعیل خان(اُردو پوائنٹ اخبارتازہ ترین - این این آئی۔ 28 اپریل2025ء)گورنر خیبر پختونخوا فیصل کریم کنڈی نے پاکستان کی خودمختاری کے دفاع کے عزم کا اعادہ کرتے ہوئے کہا ہے کہ پوری قوم بھارتی جارحیت کے خلاف متحد ہے،پاکستان نے ہمیشہ خطے میں امن کی حمایت کی ،ہمیں اپنی دفاعی صلاحیتوں پر فخر ہے۔میانخیل ہائوس میں پریس کانفرنس سے خطاب کرتے ہوئے انہوں نے قیضار خان میانخیل کو ڈسٹرکٹ بار ایسوسی ایشن کے انتخابات میں کامیابی پر مبارکباد دی انہوں نے بھارت پر سندھ طاس معاہدے کی بار بار خلاف ورزیوں اور پاکستان پر بے بنیاد الزامات لگانے کا الزام عائد کیا اور کہا کہ پاکستان نے ہمیشہ خطے میں امن کی حمایت کی ہے، لیکن ہمیں اپنی دفاعی صلاحیتوں پر بے حد فخر ہے۔

" انہوں نے ماضی میں بھارتی اشتعال انگیزیوں کے جواب میں پاکستان کے ٹھوس اقدامات کو قومی عزم اور عسکری تیاری کی علامت قرار دیا۔

(جاری ہے)

انہوں نے سیاسی ہم آہنگی کو ایک خوش آئند پیش رفت قرار دیتے ہوئے کہا کہ پاکستان کی علاقائی سالمیت کے تحفظ کے معاملے پر تمام سیاسی قوتیں متحد ہیں۔اندرونی معاملات پر بات کرتے ہوئے، گورنر فیصل کریم کنڈی نے خیبر پختونخوا کی صوبائی حکومت پر شدید تنقید کی اور کہا کہ صوبے میں امن و امان قائم رکھنے میں ناکامی کے بعد وفاقی حکومت یا مسلح افواج سے مدد طلب کی جانی چاہیے۔

انہوں نے سندھ میں پانی کی تقسیم کے تنازعے پر بھی بات کی اور سیاسی مخالفین سے اپیل کی کہ وہ اس مسئلے کو سیاست کی نذر نہ کریں۔ ان کا کہنا تھا کہ اگر خیبر پختونخوا کو اس کا جائز پانی ملے تو تین نئی نہریں تعمیر کی جا سکتی ہیں، اور چشمہ لفٹ کینال کا سنگ بنیاد جلد رکھا جائے گا۔انہوں نے صوبائی حکومت کو "علی بابا اور چالیس چور" سے تشبیہ دیتے ہوئے وزرا پر آپسی لڑائی اور کرپشن کے الزامات عائد کیے۔

تاہم انہوں نے مائنز اینڈ منرلز بل پر چیف منسٹر کے تعاون کو سراہتے ہوئے اسے صوبے کی معیشت کے استحکام کی جانب مثبت قدم قرار دیا۔مختلف صوبوں کی صورتحال کا موازنہ کرتے ہوئے گورنر نے کہا، "پنجاب میں لوگ ترقی کا مطالبہ کر رہے ہیں، جبکہ خیبر پختونخوا میں لوگ صرف امن کے خواہاں ہیں۔ انہوں نے پاکستان کی مسلح افواج کے ساتھ مکمل یکجہتی کا اعادہ کرتے ہوئے کہا کہ مادرِ وطن کا دفاع پاکستان کی اولین ترجیح ہے۔

ڈسٹرکٹ بار کے صدر قیضار خان میاں خیل ایڈوکیٹ ، خیبرپختونخوا بار کونسل کے۔ممبر سردار حشمت نواز خان سدوزئی ایڈوکیٹ ، سابق جسٹس پشاور ہائیکورٹ احمد علی مروت ایڈوکیٹ ، ڈسٹرکٹ بار کے جنرل سیکرٹری اور اسسٹنٹ ایڈوکیٹ جنرل سردار عدنان سعید سدوزئی ایڈوکیٹ ، پی پی پی کے ضلعی جنرل سیکرٹری عابد اعوان ایڈوکیٹ بھی انکے ہمراہ تھی. دریں اثنا تحصیل پہاڑ پور کے علاقہ کاٹھگڑھ میں پاکستان پیپلز پارٹی کے تحصیل نائب صدر سید غضنفر علی شاہ بخاری کی جانب سے دیئے گئے استقبالیہ سے خطاب کے دوران کیا گورنر خیبرپختونخوا فیصل کریم خان کنڈی نے کہا ہے کہ ڈیرہ اسماعیل خان کی ترقی کے لیئے کوئی دقیقہ فروگزاشت نہیں کیا جائے گا، تقریب سے پاکستان پیپلز پارٹی خیبرپختونخوا اسمبلی میں پیپلز پارٹی کے پارلیمانی لیڈر احمد کریم کنڈی ، تحصیل نائب صدر سید غضنفر علی شاہ بخاری اور دیگر مقررین نے بھی خطاب کیا گورنر نے کہا کہ تحصیل پہاڑ پور کے دیرینہ مطالبات کے حل کے لیئے بھرپور کوشاں ہوں تحصیل پہاڑپور کو جلد نادرا آفس میں عوام کی مشکلات کو مدنظر رکھتے ہوئے پاسپورٹ افس کا افتتاح کریں گے، کڑی خیسور کی عوام کو شناختی کارڈ بنانے کے لیے 40 کلومیٹر کا فاصلہ طے کر کے پہاڑپور آنا پڑتا تھا ان کی مشکلات کو دیکھتے ہوئے جلد نادرا آفس کڑی خیسور میں کھولا جائے گا جس سے ان کی فاصلہ طے کرنے کی مشکلات ختم ہو جائے گی بجلی کے لیے بھی جلد بلوٹ فیڈر پیسکو سے ختم کرکے فیسکو کے منسلک کیا جارہا ہے اور عوام کو ڈاکخانہ کی سہولیات بھی فراہم کی جائے گی، گورنر فیصل کریم خان کندی نے کہا کہ شہید ذوالفقار علی بھٹو نے چشمہ رائٹ کنال کا منصوبہ دیا تھا اور اس کے نواسے چیرمین بلاول بھٹو زرداری کی کوششوں سے چشمہ لفٹ کنال کا بڑا منصوبہ ملا ہے انہوں نے کہا کہ پی ٹی آئی صوبہ میں امن قائم نہیں کر سکی انہوں نے ڈیرہ اسماعیل خان میں کوئی بڑا منصوبہ نہیں دیا صرف عوام بیوقوف بنایا ہے اس موقع پر ایم پی اے احمد کریم خان کنڈی نے ڈیرہ اسماعیل خان میں جاری منصوبوں سے عوام کو اگاہ کیا پی پی پی تحصیل پہاڑپور کے سنیئر نائب صدر سید غضنفر علی شاہ بخاری نے گورنر فیصل کریم خان کنڈی اور ایم پی اے احمدکریم خان کنڈی کا کاٹھگڑھ کو ڈاکخانہ اور بی ایچ یو کو سولر سسٹم کی فراہمی پر شکریہ ادا کیا۔