شروعات ادھر سے تو اختتام ہم کریں گے،آخری فتح ہماری ہوگی ‘پیپلز پارٹی

لاہور (اُردو پوائنٹ اخبارتازہ ترین - این این آئی۔ 07 مئی2025ء) پاکستان پیپلز پارٹی وسطی پنجاب کے جنرل سیکرٹری سید حسن مرتضیٰ نے کہا ہے کہ شروعات ادھر سے تو اختتام ہم کریں گے،آخری فتح ہماری ہوگی ،پاکستان کی تمام سیاسی جماعتیں سیاسی اختلافات بالائے طاق رکھ کر افواج پاکستان کے ساتھ کھڑی ہیں۔ان خیالات کا اظہار انہوں نے پارلیمانی لیڈر علی حیدر گیلانی ،رکن صوبائی اسمبلی مخدوم عثمان احمد اور دیگر کے ہمراہ پنجاب اسمبلی کے باہر پریس کانفرنس کرتے ہوئے کیا ۔

حسن مرتضیٰ نے کہا کہ پہلگام سے شروع ہونے والی کہانی اپنے آخری حصے پر جا رہی ہے اوربھارت ہمیشہ بارڈر پار دہشت گردی کرتا ہے اس نے سویلین کو ٹارگٹ کرکے شہید کیا۔پورے بھارت میں بے چینی ہے اوربھارتی قوم پوچھ رہی ہے چینلز اور ویب سائٹ کیوں بند کیں۔

(جاری ہے)

انہوں نے مودی حکومت کو للکارتے ہوئے کہا کہ آپ اپنی قوم وافواج کو دھوکہ دے رہے ہیں بھارتی فوج میں بغاوت ہوئی توخود ہی سفید جھنڈے لہرائے اور مورچے چھوڑ کر بھاگے ہیں۔

انہوںنے کہا کہ بھارت رافیل پر غرور کرتا تھا ہمارے شاہینوں نے گھر میں گھس کر ان کے طیارے اور ڈرونز مارے ہیں۔بھارت نے بین الاقوامی قوانین کی خلاف ورزی کرتے ہوئے پاکستانی کی سالمیت پر بہت بڑا سوالیہ نشان چھوڑا ہے، گجرات کا قصائی پہلگام سے ہوتا ہوا آج پاکستان پر حملہ آور ہے تو پاکستان کہنے پر مجبور ہے اسے دہشت گرد کہیں یا بھارت کو دہشت گرد ریاست کہیں۔

انہوں نے کہا کہ بھارت پانی کے معاہدوں پر نظر ثانی کرے شملہ معاہدہ میں کشمیر کی لائن آف کنٹرول کو لائن آف سیز فائر ڈکلیئر کروایا جائے۔پاکستان کی تمام سیاسی جماعتیں سیاسی اختلافات بالائے طاق رکھ کر افواج پاکستان کے ساتھ کھڑی ہیں،پیپلزپارٹی نوجوانوں کو دعوت دیتی ہے بھارتی جنگ بارڈرز پر ہی نہیں میڈیا وار ہے،سوشل میڈیا پر جو فتح پاکستان کو حاصل ہوئی اس کی مثال نہیں ملتی۔

حسن مرتضیٰ نے کہا کہ چین اور امریکہ کی بھارتی دہشت گردی پر مذمت بھارت کی شکست ہے،جنگیں افواج نہیں قومیں لڑتی ہیں ہم نے ایک قوم ہونے کا ثبوت دیا ہے۔انکا کہنا تھا کہ بھارت بین الاقوامی قواعد کی خلاف ورزی کی ہے، توقع ہے افواج پاکستان اس کا بھرپور جواب دے گی اور آخری فتح ہماری ہوگی۔اس موقع پر پنجاب اسمبلی میں پاکستان پیپلز پارٹی کے پارلیمانی لیڈر سید علی حیدر گیلانی نے کہا کہ بھارتی حملے کو شاہینوں نے شکست دی،ذوالفقار علی بھٹو کو خراج تحسین پیش کرتا ہوں ،دفاع مضبوط ہے بھارت پاکستان پر حملہ سے پہلے دس بار سوچتا ہے، بھارت کے جنیوا کنونشن کی خلاف ورزی پر اپنا بدلہ لیں گے۔

انہوںنے کہا کہ پاکستان سالمیت سکیورٹی محفوظ ہاتھوں میں ہے ہم اس جنگ میں کامیاب ہوں گے، پچیس کروڑ لوگ افواج کے ساتھ ہیں فوجی بن کر دفاع کرنا جانتے ہیں۔مخدوم عثمان محمود نے کہا کہ جنگی میدان بلکہ سفارتی محاذ پر بھی بھارت کو منہ کی کھانی پڑی ،اکھنڈ بھارت کا خواب پاکستان نہیں بلکہ پورے خطے کو غیر محفوظ کرتا ہے، واحد ملک پاکستان ہے جو بھارتی آنکھوں میں آنکھیں ڈال کر شکست دینے کی صلاحیت رکھتا ہے۔

انہوں نے کہا کہ بھارتی پارلیمنٹ میں نقشہ میں پاکستان ، نیپال، بھوٹان بنگلہ دیش اور سری لنکا کی سالمیت کا خیال نہیں رکھتے، رافیل طیاروں کو گھر میں گھس کر پانچ طیارے تباہ کئے، پانچویں نسل کی جنگ بارڈر پر نہیں سوشل میڈیا پر بھی جنگیں لڑی جا رہی ہیں، افواج پاکستان پارلیمنٹ و حکومت کے پیچھے سب کو کھڑا ہونا ہے اگر دفاع کی بات آئے گی تو سیاسی جماعتوں سے بالاتر ہوکر سبز ہلالی پرچم لے کر دفاع پاکستان کریں گے اور جان بھی دیں گے۔