اسلام آباد ،سندھ اور بلوچستان میں گرمی، پنجاب اور خیبرپختونخوا میں بارش، گرمی کا زور ٹوٹ گیا،مختلف حادثات میں 5 افراد جاں بحق

اسلام آباد/لاہور/پشاور/کوئٹہ/کراچی (اُردو پوائنٹ اخبارتازہ ترین - این این آئی۔ 24 مئی2025ء)وفاقی دارالحکومت اسلام آباد، پنجاب کے مختلف اضلاع اور خیبرپختونخوا کے مختلف علاقوں میں فانی بارش اور ژالہ باری ہوئی جس سے گرمی کا زور ٹوٹ گیا ، مختلف حادثات میں 5 افراد جاں بحق اور متعدد زخمی ہو گئے۔تفصیلات کے مطابق سندھ اور بلوچستان میں سورج کا مزاج انتہائی گرم رہا، سندھ اوربلوچستان کے میدانی علاقوں میں بڑھتے درجہ حرارت نے شہریوں کوپریشان کردیا۔

محکمہ موسمیات کے مطابق سندھ کے بیشتر اضلاع ہفتہ کے روز بھی شدیدگرم اور خشک موسم کی لپیٹ میں رہے، دوپہر کے بعد ساحلی علاقوں میں تیزگرد آلود ہوائیں چلنے کی توقع ہے۔کراچی سمیت سندھ بھر میں گرمی کی شدت برقرار رہی، ہوا میں نمی کا تناسب زیادہ ہونے کی وجہ سے محسوس کیا جانے والا درجہ حرارت بھی زیادہ ہے۔

(جاری ہے)

محکمہ موسمیات کے مطابق سب سے زیادہ درجہ حرارت سبی میں 52 ڈگری اور دادو میں 51 ڈگری تک جانے کی پیشگوئی کی گئی ہے، بلوچستان کے مختلف اضلاع میں بھی موسم گرم اور خشک رہنے کی پیشگوئی کی گئی ہے۔

ادھر جڑواں شہروں راولپنڈی اور اسلام آباد میں طوفانی ہواؤں کے ساتھ سیاہ بادل جم کر برسے، موسلادھار بارش اور ڑالہ باری نے جل تھل ایک کر دیا جس کے بعد گرمی کا زور ٹوٹ گیا۔رپورٹ کے مطابق اسلام آباد میں طوفانی بارش سے قائداعظم یونیورسٹی کی کینٹین کا شیڈ گر گیا،جڑواں شہروں راولپنڈی اور اسلام آباد میں بارش سے قبل سیاہ گھٹاؤں نے دن میں ہی رات کا سماں پیدا کر دیا۔

راولپنڈی میں شمس آباد پر 32، پی ایم ڈی 29، گولڑہ کے مقام پر 10 ملی میٹر اور کچہری میں 6 ملی میٹر بارش ریکارڈ کی گئی، نالہ لئی میں پانی کا بہاؤ معمول کے مطابق ہے۔لاہور میں آندھی کے باعث لیسکو کے متعدد فیڈرز ٹرپ کر گئے، جبکہ فیلڈ اسٹاف کو ہائی الرٹ کر دیا گیا۔چیف ایگزیکٹو لیسکو کے مطابق آندھی رکتے ہی فیڈرز کی بحالی کا کام شروع کر دیا جائے گا، موسم کی خرابی کے پیش نظر لیسکو انتظامیہ کی معزز صارفین سے تعاون کی اپیل کی ہے۔

ترجمان لیسکو نے کہا کہ بجلی معطل ہونے کی صورت میں لیسکو کو مطلع کرکے عملے کے آنے کا انتظار کریں، دوران بارش اپنے بچوں اور پالتو جانوروں کو بجلی کی تنصیبات سے دور رکھیں۔اسی طرح گوجرانوالہ اور اطراف میں طوفانی ہواؤں کے ساتھ بارش ہوئی، گرمی کا زور ٹوٹ گیا، بارش ہوتے ہی گیپکو کے کئی فیڈرز ٹرپ کرگئے اور بجلی کی فراہمی معطل ہو گئی۔

دریں اثنا سیالکوٹ اور اس کے اطراف میں موسلادھار بارش ہوئی ہے، جبکہ بجلی کے متعدد فیڈر ٹرپ کرگئے۔سیالکوٹ میں بارش سے متعدد مقامات پر درخت اورٹریفک سگنل گرگیا، ریسکیو کے مطابق ڈسکہ میں مارکی کی چھت گرنے سے ایک شخص زخمی ہو گیا۔سرکاری پاکستان ٹیلی ویژن کے مطابق شیخوپورہ میں شدید آندھی کے باعث مقامی فیکٹری کی چھت گر گئی جس کے باعث صادق آباد کا رہائشی مزدور جاں بحق اور پانچ افراد شدید زخمی ہوگئے۔

ریسکیو 1122 شیخوپورہ کی امدادی ٹیموں نے جاں بحق اور زخمیوں کو ملبے تلے سے نکال کر ڈسٹرکٹ ہیڈ کوارٹر ہسپتال شیخوپورہ منتقل کیاادھر، خیبرپختونخوا کے بالائی علاقوں سوات، مینگورہ، چارسدہ، ہری پور، مردان، پشاور، صوابی اور مالاکنڈ ڈویژن میں بارش اور ژالہ باری نے سیاحتی مقامات کا حسن دوبالا کردیا، ٹھنڈی ہواؤں نے شدید گرمی کا زور توڑ دیا۔

سوات میں بارش کے ساتھ ڑالہ باری سے موسم خوشگوار ہوگیا، سیاحوں نے موسم بدلتے ہی بھرپور لطف اٹھایا، بارش سے سوات کے ندی نالے پانی سے بھرگئے، سڑکوں پربچے اوربڑے موج مستیاں کرتے نظر آئے۔پشاور میں بھی ٹھنڈی ہواؤں سے موسم خوشگوار ہوگیا، گرمی کا زور ٹوٹنے پر شہریوں کے چہرے کھل اٹھے، تیز ہواؤں سے کچھ مقامات پر سائن بورڈز بھی اکھڑ گئے۔

مانسہرہ اورگرد و نواح میں بھی تیز بارش اور ہواؤں نے موسم کے تیور بدل دئیے، کئی روز سے جاری گرمی کا زور ٹوٹ گیا، تیز آندھی کے باعث متعدد علاقوں کی بجلی منقطع ہوگئی۔ہری پور اورگرد و نواح میں بھی ابر رحمت برسنے سے گرمی سے ستائے لوگوں نے سکھ کا سانس لیا۔ادھر، ڈائریکٹر جنرل صوبائی ڈیزاسٹر منیجمنٹ اتھارٹی (پی ڈی ایم ای) عرفان علی کاٹھیا کی صوبہ بھر کے ڈپٹی کمشنرز اور ریسکیو اداروں کو الرٹ رہنے کی ہدایت کر دی۔

ڈی جی پی ڈی ایم اے کے مطابق ہنگامی صورتحال سے نمٹنے کے لیے متعلقہ محکمے الرٹ رہیں، شہری احتیاط کریں بجلی کے کھمبوں اور لٹکتی تاروں سے دور رہیں۔ڈی جی عرفان علی کاٹھیا نے کہا کہ آسمانی بجلی سے بچاؤ کے لیے محفوظ مقامات پر رہیں، خراب موسم اور آسمانی بجلی کی گرج چمک کے دوران کھلے مقامات پر ہر گز نہ رکیں۔پی ڈی ایم اے کے مطابق غیر ضروری سفر سے پرہیز کریں اور گاڑی آہستہ چلائیں۔

محکمہ موسمیات کے مطابق کشمیر سمیت خیبرپختونخوا کے دیگر شہروں پنجاب اور شمال مشرقی بلوچستان میں بھی گرج چمک کے ساتھ بارش کی توقع ہے ادھر، ترجمان موٹروے کے مطابق پنجاب کے مختلف مقامات پر تیز آندھی، طوفان اور تیز ہوا کے نتیجے میں موٹروے ایم 2 کو ٹھوکر سے کوٹ مومن تک بند کر دیا گیا۔ترجمان نے بتایا کہ موٹروے ایم 3 فیض پور سے درخانہ تک بند کردیا گیا،اسی طرح لاہور-سیالکوٹ موٹروے کو بھی شدید طوفان کی وجہ سے بند کردیا گیا۔