افواج پاکستان نے بھارت کو شکست دیکر ثابت کیاکہ جذبہ ایمانی سے ہم ہر قوت کا مقابلہ کرسکتے ہیں، فیصل کریم کنڈی

دھیرکوٹ (اُردو پوائنٹ اخبارتازہ ترین - اے پی پی۔ 15 جون2025ء) گورنرخیبر پختونخوا فیصل کریم کنڈی نے کہا ہے کہ لائن آف کنٹرول پر کشمیریوں نے حالیہ پاک بھارت جنگ میں قربانیوں کا سلسلہ جاری رکھا مگر افواج پاکستان نے انڈیا کو شکست دیکر دنیا کو باور کرایا کہ کم وسائل کے باوجود جذبہ ایمانی سے ہم ہر قوت کا مقابلہ کرسکتے ہیں۔ ان خیالات کا اظہار انہوں نے دھیر کوٹ آزاد کشمیر میں پیپلز پارٹی پونچھ کے ڈویژنل جنرل سیکرٹری راجہ مبشر اعجاز کی جانب سے دئیے گئے استقبالیہ سے خطاب کرتے ہوئے کیا ۔

استقبالیہ سے راجہ مبشر اعجاز نے بھی خطاب کیا ، اس موقع پر پاکستان پیپلز پارٹی کے رہنما چوہدری محمد ریاض ، وزیر بلدیات آزاد کشمیر چوہدری قاسم مجید اور دیگر عہدیدار بھی موجود تھے۔

(جاری ہے)

گورنر خیبرپختونخوا فیصل کریم کنڈی نے کہا کہ پاک۔ بھارت جنگ میں پاکستان نے کشمیر پر مذاکرات کی شرط پر جنگ بندی کی ، چیئرمین بلاول بھٹو زرداری نے انٹرنیشنل میڈیا پر بیٹھ کر پاکستان اور کشمیر کا مقدمہ لڑا اور آج بھی دنیا بھر میں یہی مقدمہ لڑنے کے لئے وہ بیرون ممالک دورہ پر ہیں اور اپنے نانا اور شہید والدہ کے نقش قدم پر چل رہے ہیں۔

انہوں نے کہا کہ انشاءاللہ جلد ہی پاکستان کشمیر کا مقدمہ جیتے گا ،انہوں نے کہا کہ پہلے بھی پارٹی کے اعتماد سے ڈپٹی سپیکر اور وزیر مملکت رہا ، میری کوشش ہے کہ اس اعتماد سے انصاف کروں اور پارٹی کی خدمت کرسکوں ۔ انہوں نے کہا کہ ہم وفاقی حکومت کے اتحادی ہیں ، مگر تنقید برائے اصلاح کے قائل ہیں بجٹ پر تحفظات پارلیمنٹ میں پیش کریں گے۔

انہوں نے کہا کہ دو ہزار سات میں جب پیپلز پارٹی کو حکومت ملی پاکستان اور بالخصوص خیبرپختونخوا دہشت گردی کی لپیٹ میں تھا ،سوات میں پاکستانی پرچم کو لہرانا بحال کیا ، ہمارے بعد صوبہ میں تحریک انصاف کی حکومت رہی ہے جس نے صوبے کو ایک بار پھر دہشت گردوں کے حوالہ کردیا اور خود کرپشن کے ریکارڈ توڑ رہے ہیں ۔ انہوں نے کہا کہ کوہستان جیسے ضلع پر پچاس ارب کا سیکنڈل سامنے آیا ہے ،یہ مساجد کے سولر کی رقم کھا گئے چینی ، آٹا ، ہسپتال ہر شعبہ میں ڈاکے مارے جارہے ہیں۔

انہوں نے کہا کہ کشمیر میں آنے والے انتخابات میں حکومت سازی کا بہترین موقع ہے، ماضی میں بھی کشمیر میں پیپلز پارٹی نے بہترین عوامی خدمت کی آپ لوگ متحد ہوں پارٹی کا پیغام گھر گھر پہنچائیں تاکہ آنے والے وقت میں یہاں پیپلز پارٹی کی حکومت ہو اور عوامی خوشحالی کا دور شروع ہو۔ قبل ازیں گورنر خیبرپختونخوا جب دھیر کوٹ پہنچے تو جیئے بھٹو کے نعروں سے ان کا پرتپاک استقبال کیا گیا اوران پر پھولوں کی پتیاں نچھاور کی گئیں۔