Live Updates

چینی کی برآمد اور درآمد کے دھندے میں حکومت مافیاز کو نواز رہی ہے

حکومتی ترجیح استحصالی ذخیرہ اندوز مافیاز کو سپورٹ کرنا ہے، بجلی، تیل، گیس سستی کی جائے تو کاروبار چل پڑے گا، نائب امیرجماعت اسلامی لیاقت بلوچ

ثنااللہ ناگرہ ہفتہ 21 جون 2025 19:55

چینی کی برآمد اور درآمد کے دھندے میں حکومت مافیاز کو نواز رہی ہے

لاہور ( اردوپوائنٹ اخبار تازہ ترین۔ آئی پی اے ۔ 21 جون 2025ء ) نائب امیر جماعتِ اسلامی، سیکرٹری جنرل مِلی یکجہتی کونسل لیاقت بلوچ نے کہا کہ حکومت کا امریکی محبت میں تمام حدیں پار کرنا بڑا خطرناک ہے۔ اس امر سے کوئی انکار نہیں کہ پاکستان کو اپنے دفاع کا حق ہے لیکن عدم توازن سے خطہ میں حالات کو عدم توازن کا شکار اور دوستوں میں اپنے امیج کو خراب نہ کیا جائے۔

امریکی صدر ڈونلڈ ٹرمپ کا پاکستان اور انڈیا میں جنگ بندی کا اقدام اور مسئلہ کشمیر حل کرانے کا عِندیہ اچھا اقدام ہے لیکن ٹرمپ کے لیے اصل چیلنج اسرائیل کو ظلم سے روکنا اور فلسطینیوں کو اُن کی آزادی اور فلسطینی سرزمین پر اُن کے حقِ ملکیت کو تسلیم کرانا ہے۔ امریکی صدر جنگوں کے خاتمہ اور امن کے قیام کے لیے امریکہ کی ماضی کی غلطیوں کا ازالہ کریں اور اِس تاثر کا بھی خاتمہ کریں کہ امریکہ صرف اپنے مفادات کے لیے منافقانہ چالیں چلتا ہے۔

(جاری ہے)

امریکہ کو اب وقت کا یہ درس بھی اچھی طرح یاد ہونا چاہیے کہ وہ اب یک محوری طاقت نہیں رہا، 'جیو اور جینے دو' کا اُصول ہی دُنیا میں امن کا ضامن اور بالادست مضبوط بیانیہ ہوگا۔ دُنیا جان لے کی ایران کے رہبر علی خامنائی کا قتل دُنیا کے ہر لیڈر کو غیرمحفوظ بنادے گا۔ اسرائیل کو ہر قسم کی غنڈہ گردی اور انسانیت دشمنی پر مبنی اقدامات سے روکنا عالمی برادری کی اولین ذمہ داری ہے۔

لیاقت بلوچ نے لاہور میں مرکزی تربیت گاہ سے خطاب، مقامی ٹی وی چینل کو انٹرویو اور نوجوان صحافی عدنان شیخ کی دعوتِ ولیمہ میں صحافیوں سے گفتگو کرتے ہوئے کہا کہ قومی بجٹ حسبِ دستور اعداد و شمار کا گورکھ دھندا،جھوٹ کا پلندہ اور آئی ایم ایف کا حکمنامہ ہے جو عوام پر مسلط کردیا گیا ہے۔ حکومت اتحادیوں کی بلیک میلنگ کے سامنے تو جُھک رہی ہے لیکن عملاً حکومت قومی بجٹ میں عوام دشمن، زراعت دشمن، مزدور، نوجوان اور تعلیم دشمن اقدامات کررہی ہے۔

چینی کی برآمد اور درآمد کے دھندے میں حکومت مافیاز کو نواز رہی ہے۔ ذخیرہ اندوزوں اور کاروباری مافیاز کو حکومت بار بار ریلیف دے رہی ہے، حکومت کی ترجیح عوام میں استحصالی ذخیرہ اندوز مافیاز کو سپورٹ کرنا ہے۔ بجلی، تیل، گیس سستی ہو اور ٹیکسوں کا ناروا بوجھ عوام کے کندھوں سے اُتارکر اقتصادی ترقی کا پہیہ چلانے کو ترجیح بنایا جائے تو کاروبار چل پڑے گا، زراعت ترقی کرے گی اور قومی خزانہ بھرجائے گا۔

المیہ یہ ہے کہ حکومت، سِول ملٹری اسٹیبلشمنٹ اور نوکرشاہی کے پالیسی ساز، وسائل پر قابض بااختیار طبقات اپنی عیاشیاں، کرپشن اور مفت خوری چھوڑنے کو تیار نہیں۔

لیاقت بلوچ نے کہا کہ 22 جون کو اسلام آباد کنونشن سنٹر میں نوجوانوں کا بنو قابل ڈیجیٹل ہُنرمندی تاریخ ساز کنونشن ہوگا۔ نوجوان ہی ملک و مِلت کا اصل سرمایہ ہیں، نوجوانوں کو مایوسی نہیں اُمید اور اعتماد دیا جائے۔