وزیراعظم شہباز شریف کی زیر صدارت انسداد دہشت گردی و ریاستی رٹ کے قیام کے حوالے سے قائم سٹیئرنگ کمیٹی کا جائزہ اجلاس

اسلام آباد (اُردو پوائنٹ اخبارتازہ ترین - اے پی پی۔ 31 جولائی2025ء) وزیر اعظم محمد شہباز شریف نے کہا ہے کہ ریاست پاکستان، دہشت گردی کے ناسور کوجڑ سے ختم کرنے کے لئے پرعزم ہے ، دنیا دہشت گردوں کے خلاف ہماری کامیاب کارروائیوں کی معترف ہے،پاکستان کی بہادر افواج نے آپریشن رد الفساد اورضرب عضب میں دہشت گردوں کا بھرپور مقابلہ کیا اور حالیہ تاریخ ساز معرکہ حق میں دنیا نے پاکستان کی فتح کو تسلیم کیا۔

وزیر اعظم آفس کے میڈیا ونگ سے جاری بیان کے مطابق وزیراعظم محمد شہباز شریف کی زیر صدارت انسداد دہشت گردی و ریاستی رٹ کے قیام کے حوالے سے قائم سٹیئرنگ کمیٹی کا جائزہ اجلاس منعقد ہوا۔وزیراعظم نے کہا کہ ریاست پاکستان نے دہشت گردی کے خلاف جنگ میں کثیر الجہتی حکمت عملی اپنائی ہے،پاکستان کی طرف سے زمینی آپریشن، متعلقہ قانون سازی،بامعنی عوامی رابطے اور انتہا پسند سوچ کی حوصلہ شکنی جیسے اہم عناصر کا بھرپور اور موثر استعمال کیا گیا۔

(جاری ہے)

کمیٹی کی دہشت گردی کے خلاف وفاقی و صوبائی حکومتوں کے مابین ہم آہنگی کو مؤثر بنانے اور اس ضمن میں کمیٹی کی سفارشات پر سختی سے عملدرآمد کی ہدایت کرتے ہوئے کہا کہ انہوں نے کہا کہ بہادر افواج کے سپوتوں کا دہشت گردی کے خلاف اس جنگ میں کردار قابل تعریف و قابل تحسین ہے،ارض وطن کی خاطر اپنی جانوں کا نذرانہ پیش کرنے والے اہلکار و افسران اور قربانی کے جذبے سے سرشار ان کے اہل خانہ پر مجھ سمیت پوری قوم کو فخر ہے۔

وزیرِاعظم نے کہا کہ دہشت گردی کے خلاف جنگ میں پوری پاکستانی قوم، بہادر افواج، قانون نافذ کرنے والے ادارے، انٹیلی جنس ادارے متحد اور یکسو ہیں،پاکستان کی بہادر افواج نے آپریشن رد الفساد اور ضرب عضب میں دہشت گردوں کا بھرپور مقابلہ کیا اور حالیہ تاریخ ساز معرکہ حق میں دنیا نے پاکستان کی فتح کو تسلیم کیا۔ وزیراعظم نےکہا کہ صوبائی حکومتوں ، انٹیلی جنس بیورو، وزارت داخلہ،کاؤنٹر ٹیررازم ڈیپارٹمنٹ بالخصوص پنجاب انسداد دہشت گردی ڈیپارٹمنٹ نے دہشت گردی کے خلاف اس جنگ میں نہایت موثر اقدامات اٹھائے ہیں،پاکستان کو فتنتہ الہندوستان اور فتنتہ الخوارج اور اس طرح کے دوسرے سماج دشمن عناصر کے مکمل خاتمے کے لئے کمیٹی جامع، موثر اور قابل عمل حکمت عملی پر کام کررہی ہے۔

وزیراعظم نے کہا کہ تمام متعلقہ اداروں کی مشترکہ کارروائیوں و تعاون سے سمگلنگ کے خلاف مؤثر کارروائیاں عمل میں لائی گئیں جس سے سمگلنگ کی روک تھام ممکن ہوئی،سمگلنگ کی روک تھام سے معیشت پر مثبت اثرات مرتب ہوئے۔ وزیرِ اعظم نے کہا کہ دہشت گردی سے پاک اور پرامن مضبوط ریاستی ڈھانچہ ہی بین الاقوامی سطح پر سرمایہ کاروں کے اعتماد کو بحال کرتا ہے،بین الاقوامی سطح پر سرمایہ کاروں کے اعتماد کی بحالی کے لئے حکومت نے تمام نظام کی ڈیجیٹائزیشن اور ٹیکس سسٹم میں بہتری جیسے انقلابی تبدیلیاں لائی ہیں۔

وزیراعظم نے کہا کہ پاکستان سٹاک ایکسچینج میں ریکارڈ اضافہ اور گلوبل ریٹنگز میں بہتری پاکستان کی معیشت میں استحکام کی نشاندہی کرتا ہے اور اس سے بیرونی سرمایہ کار کا اعتماد بحال ہوگا،غیر قانونی طور پر پاکستان میں مقیم افغان باشندوں کی بین الاقوامی قوانین کے عین مطابق وطن واپسی کے پروگرام پر عملدرآمد مؤثر طور سے جاری ہے۔ اجلاس میں نائب وزیراعظم محمد اسحاق ڈار،فیلڈ مارشل چیف آف آرمی سٹاف سید عاصم منیر، نیشنل سکیورٹی ایڈوائزر لیفٹیننٹ جنرل محمد عاصم ملک، وفاقی وزیر اطلاعات و نشریات عطاء اللہ تارڑ، وفاقی وزیر قانون اعظم نذیرتارڑ، وفاقی وزیر اکنامک افیئرز ڈویژن احد خان چیمہ، وزیراعظم کے مشیر برائےبین الصوبائی تعاون رانا ثنا اللہ، وزیر مملکت برائے داخلہ طلال چوہدری، تمام صوبوں کے چیف سیکرٹریز، انسپکٹر جنرلز اور متعلقہ سرکاری حکام نے شرکت کی۔