یومِ آزادی و معرکۂ حق : سیاسی و عسکری قیادت کی مثالی ہم آہنگی، شاندار مارچ پاسٹ اور آتش بازی نے جشن کو دوبالا کردیا

اسلام آباد (اُردو پوائنٹ اخبارتازہ ترین - اے پی پی۔ 14 اگست2025ء) یومِ آزادی اور معرکۂ حق کی عظیم فتح کے عنوان سے وفاقی دارالحکومت اسلام آباد میں ہونے والی مرکزی تقریب ایک ولولہ انگیز اور یادگار لمحہ بن گئی، جب فضا میں سبز ہلالی پرچموں کی بہار اور حب الوطنی کے ترانے گونج اٹھے۔ تقریب میں صدرِ مملکت آصف علی زرداری، وزیراعظم محمد شہباز شریف، فیلڈ مارشل جنرل عاصم منیر،چیئرمین جوائنٹ چیفس آف سٹاف کمیٹی جنرل ساحر شمشاد مرزا ، پاک فضائیہ اور پاک بحریہ کے سربراہان ، نائب وزیراعظم اسحاق ڈار، چیئرمین سینیٹ سید یوسف رضا گیلانی، اسپیکر قومی اسمبلی سردار ایاز صادق، وزیرِ دفاع خواجہ محمد آصف،وفاقی وزیر اطلاعات و نشریات عطاء اللہ تارڑ سمیت وفاقی کابینہ کے اراکین ، اعلیٰ عسکری قیادت اور دوست ممالک کے سفارتکار شریک ہوئے۔

(جاری ہے)

تقریب کا آغاز روایتی جوش و جذبے کے ساتھ ہوا، جب ترکِیہ اور آذربائیجان کے دستوں نے شاندار مارچ پاسٹ پیش کیا، جسے شرکاء نے پرجوش تالیاں بجا کر سراہا۔ اس کے بعد پنجاب رینجرز، ایف سی خیبرپختونخوا، پاک فوج کے ایس ایس جی کمانڈوز اور علم بردار دستے نے دلوں کو گرما دینے والا مارچ پاسٹ کیا۔ فوجی بینڈ اور مسلح افواج کے میوزک بینڈز نے ایسی دھنیں بجائیں کہ ہر لب پر پاکستان زندہ باد کے نعرے گونج اٹھے۔

پاک فوج، پاک بحریہ اور پاک فضائیہ کے جری جوانوں کا قدم بہ قدم ہم آہنگ مارچ، قوم کی بہادری اور عزمِ صمیم کی عملی تصویر پیش کرتا رہا۔ اس موقع پر ملک کے معروف گلوکاروں اور فنکاروں نے ملی نغموں اور خصوصی پرفارمنسز کے ذریعے جشن آزادی کی خوشیوں کو دوبالا کیا۔ "سوہنی دھرتی اللہ رکھے" کے ملی نغمے نے ماحول کو جگمگا دیا اور شرکاء کو جذبے کی ایک نئی لہر میں سرشار کر دیا۔

رات کے 12 بجتے ہی تقریب کا سب سے پرجوش لمحہ آیا، جب ملک کی اعلیٰ سیاسی و عسکری قیادت، تقریب میں شریک شہریوں کے ہمراہ احتراماً کھڑی ہوئی اور مل کر قومی ترانہ پڑھا۔ اس کے ساتھ ہی آتش بازی کا شاندار مظاہرہ شروع ہوا، اور آسمان رنگ برنگی روشنیوں سے نہ صرف جگمگا اٹھا بلکہ جشنِ آزادی کا پیغام ہر سمت پھیل گیا۔ تقریب کے دوران دفاعِ وطن کے عظیم کارناموں اور معرکۂ حق کی تاریخی فتح کو خراجِ تحسین پیش کیا گیا۔

تبصرہ نگاروں نے اسے صرف ایک تقریب نہیں بلکہ پاکستان کے حوصلے، عزم اور اتحاد کی جیتی جاگتی علامت قرار دیا۔ دوست ممالک کے فوجی دستوں کی شرکت نے اس پیغام کو مزید مضبوط کیا کہ پاکستان امن، بھائی چارے اور عالمی تعاون کا علمبردار ہے۔ نامور گلوگارہ نتاشہ بیگ نے آزری میوزک کے ساتھ آزری زبان میں اور چینی میوزک کے ساتھ چینی زبان میں نغمے پیش کیا ۔دوست ممالک کے بے مثال تعاون پر انھیں زبردست انداز میں خراج تحسین پیش کیا گیا ۔ یہ تقریب اپنی شان، وقار اور حب الوطنی کے لازوال جذبے کے ساتھ ایک ایسی یادگار تاریخ رقم کر گئی، جسے آنے والی نسلیں فخر سے یاد رکھیں گی۔