کسی نے ہاتھ جوڑ کر یا پائوں پکڑ کر معافی نہیں مانگنی ، غلطی یا جرم ہو تو اس کا احساس ضروری ہے‘ رانا ثنا اللہ

لاہور (اُردو پوائنٹ اخبارتازہ ترین - این این آئی۔ 19 اگست2025ء) وزیراعظم کے مشیر برائے سیاسی امور رانا ثناء اللہ خاں نے کہا ہے کہ ملک کو سیاسی استحکام کی ضرورت ہے اور نفرت یا خوف کی سیاست سے کچھ حاصل نہیں ہوگا،مسلم لیگ (ن) ہمیشہ ڈائیلاگ کے ذریعے بات کرنے کی حامی رہی ہے اور آج بھی ہر کسی کے ساتھ بات کرنے کے لیے تیار ہے، عمران خان کے ساتھ براہِ راست مذاکرات نہیں کیے جاسکتے بلکہ مذاکرات ہمیشہ سیاسی جماعتوں کے درمیان ہوتے ہیں۔

انہوں نے سینیٹ کے ضمنی انتخاب میں پنجاب سے جنرل نشست کے لئے اپنے کاغذات نامزدگی جمع کروانے کے بعد صدر مسلم لیگ (ن) لاہور و رکن قومی اسمبلی ملک سیف المکوک کھوکھر اور دیگر کے ہمراہ میڈیا سے گفتگو کرتے ہوئے کہا کہ ملک کو سیاسی استحکام کی اشد ضرورت ہے اور سب سیاسی جماعتوں کو سر جوڑ کر بیٹھنا چاہیے تاکہ وہ پاکستان کو اپنے آبا ئواجداد کے خواب کے مطابق بنا سکیں۔

(جاری ہے)

مشیر وزیر اعظم نے کہا کہ وزیراعظم شہباز شریف نے 14اگست کو یوم آزادی کے موقع پر میثاق استحکام کا اعلان کیا جسے معرکہ حق کی کامیابی کے طور پر بھی منایا گیا۔پاکستان مسلم لیگ (ن) میاں نواز شریف کی قیادت میں میثاق استحکام کے لیے پوری طرح پرعزم ہے۔رانا ثنا اللہ نے یاد دلایا کہ پاکستان نے ایٹمی طاقت کا درجہ بھی پاکستان مسلم لیگ (ن) کی حکومت کے دور میں حاصل کیا تھا اور اب استحکام کا خواب بھی حقیقت بنے گا۔

جو لوگ نفرت کی سیاست کرتے آئے ہیں، انہوں نے اور قوم نے دیکھا ہے کہ اس سیاست سے کچھ حاصل نہیں ہوتا اور مستقبل میں بھی یہ سیاست کامیاب نہیں ہوگی۔انہوں نے واضح کیا کہ سیاسی مسائل کا حل صرف تمام جماعتوں کے درمیان بات چیت سے ممکن ہے نہ کہ خوف یا دھمکی کے ماحول سے۔رانا ثنا اللہ نے کہا کہ مسلم لیگ (ن) ہمیشہ ڈائیلاگ کے ذریعے بات کرنے کی حامی رہی ہے اور آج بھی ہر کسی کے ساتھ بات کرنے کے لیے تیار ہے تاہم اگر کوئی جماعت ڈائیلاگ میں شریک نہیں ہوتی تو اس کی ذمہ داری اسی پر عائد ہوگی۔

ایک سوال کے جواب میں انہوں نے کہا کہ عمران خان کے ساتھ براہِ راست مذاکرات نہیں کیے جاسکتے بلکہ مذاکرات ہمیشہ سیاسی جماعتوں کے درمیان ہوتے ہیں۔افسوس کہ دوسری طرف سے بیٹھ کر بات کرنے کی تیاری نظر نہیں آتی۔انہوںنے کہاکہ کسی نے ہاتھ جوڑ کر یا پائوں پکڑ کر معافی نہیں مانگنی بلکہ غلطی یا جرم ہو تو اس کا احساس ضروری ہے، یہی رویہ نفرت کو جنم دیتا ہے جو درست نہیں،جو شخص دو سال میں بھی اپنی غلطی کا احساس نہ کرے اسے نتائج کا سامنا کرنا ہوگا۔

انہوںنے کہا کہ 9 مئی کے واقعات سے کوئی انکار نہیں کر سکتا، یہ عدالتی فیصلے ہیں اور سب کو انہیں ماننا ہوگا، جو ذمہ داری پارٹی دے گی وہ پوری کریں گے، چاہے جس پوزیشن پر بھی ہوں، ہر طبقے میں اچھے اور برے لوگ موجود ہوتے ہیں لیکن چند افراد کی بنیاد پر سب کو برا کہنا درست نہیں۔قبل ازیں مسلم لیگ رانا ثنااللہ نے الیکشن کمیشن کے آفس میں پنجاب سے سینیٹ کی جنرل نشست کے لیے کاغذات نامزدگی جمع کروا ئے۔رانا ثنا اللہ کاغذات نامزدگی جمع کروانے الیکشن کمیشن کے آفس پہنچے تو ان کے ہمراہ مسلم لیگ (ن)کے رہنما سیف الملوک کھوکھر ، ڈپٹی اٹارنی جنرل سونیا جدون سمیت دیگر وکلا ء رہنما موجود تھے، انہوں نے الیکشن کمیشن میں ریٹرننگ آفیسر کے روبرو اپنے کاغذات نامزدگی جمع کروا ئے۔