پنجاب حکومت آئندہ بھی کرکٹ سمیت دیگر کھیلوں کے فروغ کیلئے ہر ممکن سہولتیں فراہم کرے گی،شہبازشریف،کھیل کو صرف کھیل کے طورپر ہی لینا چاہیے ، کرکٹ سمیت تمام کھیلوں کی اصل روح سپورٹس مین سپرٹ ہے ، پاکستان میں کرکٹ کا بے پناہ ٹیلنٹ موجود ہے ،جسے نکھار کر کرکٹ میں اپنا مقام دوبارہ حاصل کیا جا سکتاہے،پاکستانی کرکٹرز نے کئی مواقعوں پر عالمی سطح پر ملک وقوم کانام روشن کیا ہے،وزیراعلیٰ کی ظہیر عباس سے گفتگو،وزیراعلیٰ سے انٹرنیشنل کرکٹ کونسل کے صدر ظہیر عباس کی ملاقات،کرکٹ کے فروغ کے حوالے سے تبادلہ خیال

ہفتہ 24 اکتوبر 2015 09:03

لاہور (اُردو پوائنٹ اخبارآن لائن۔24اکتوبر۔2015ء) وزیراعلیٰ پنجاب محمد شہباز شریف سے انٹرنیشنل کرکٹ کونسل کے صدر ظہیر عباس نے آج یہاں ملاقات کی جس میں کرکٹ کے کھیل کے فروغ کے حوالے سے تبادلہ خیال کیا گیا-وزیراعلیٰ محمد شہبازشریف نے اس موقع پر گفتگو کرتے ہوئے کہاکہ پاکستان میں کرکٹ کا بے پناہ ٹیلنٹ موجود ہے اور اس ٹیلنٹ کو نکھار کر کرکٹ میں پاکستان اپنا مقام دوبارہ حاصل کر سکتا ہے-انہوں نے کہاکہ زمبابوے کی کرکٹ ٹیم کے دورے سے پاکستان میں انٹرنیشنل کرکٹ کی بحالی میں اہم پیش رفت ہوئی ہے تاہم اس ضمن میں تسلسل کے ساتھ مثبت اقدامات جاری رہنے چاہئیں اور پنجاب حکومت اس ضمن میں ہرممکن تعاون کرنے کیلئے تیار ہے۔

وزیراعلیٰ نے کہا کہ پاکستان کے کرکٹرز نے کئی مواقعوں پر عالمی سطح پر ملک وقوم کانام روشن کیا ہے- انہوں نے کہا کہ پنجاب حکومت نے کرکٹ اور دیگر کھیلوں کے فروغ کے لئے نئی گراؤنڈز مہیا کی ہیں اور کرکٹ سمیت دیگر کھیلوں کے فروغ کیلئے جامع پروگرام پر عملدرآمد کیا جا رہا ہے۔

(جاری ہے)

انہوں نے کہا کہ کھیل معاشرے میں نظم و ضبط کو فروغ دینے کے ساتھ ٹینشن میں کمی کا باعث بنتے ہیں۔

کرکٹ سمیت دیگر کھیلوں کو فروغ دے کر معاشرے سے منفی سرگرمیوں کا خاتمہ کیا جا سکتا ہے۔ انہوں نے کہاکہ کھیل کو صرف کھیل کے طورپر ہی لینا چاہیے اور کرکٹ سمیت تمام کھیلوں کی اصل روح سپورٹس مین سپرٹ ہے - وزیراعلیٰ نے کہاکہ پنجاب حکومت آئندہ بھی کرکٹ سمیت دیگر کھیلوں کے فروغ کے لئے ہر ممکن سہولتیں فراہم کرے گی-