پی پی169سے امیدوار صوبائی اسمبلی چوہدری مظہر علی سمیت نواز لیگ کے کونسلرزکی پی ٹی آئی میں شمولیت

تبدیلی کی لہر چل رہی ہے،عوام کو دھوکہ دینے والے دوبارہ اقتدار میں نہیں آئیں گے تحریک انصاف سنٹرل پنجاب کے صدر عبدالعلیم خان کی ملاقات کے دوران بات چیت

جمعہ 7 اپریل 2017 23:26

لاہور(اُردو پوائنٹ اخبار آن لائن۔ ہفتہ 8 اپریل 2017ء)پنجاب کے صوبائی حلقے پی پی169سے امیدوار صوبائی اسمبلی چوہدری مظہر علی سمیت نواز لیگ کے 8کونسلرز نے پی ٹی آئی سنٹرل پنجاب کے صدر عبدالعلیم خان سے ملاقات کی اور اپنے ساتھیوں سمیت عمران خان کی قیادت پر غیر مشروط اعتماد کا اظہار کرتے ہوئے تحریک انصاف میں شمولیت کا اعلان کیا چئیرمین سیکرٹریٹ میں ہونے والی اس ملاقات میں نواز لیگ کے کونسلرز میں ڈاکٹر ظفر علی ،رانا گل بہار ،ملک شہباز خان ،امین کمبوہ ،نسیم بی بی ،میاں ظفر اقبال ،میاں امجد اقبال اور سیٹھ افتخار احمد شامل تھے جنہوں نے این ای134سے شیر اکبر کی زیر قیادت آئندہ اپنے اپنے علاقوں میں تحریک انصاف کیلئے کام کرنے کاوعدہ کیا ۔

(جاری ہے)

اس موقع پر گفتگو کرتے ہوئے پی ٹی آئی وسطی پنجاب کے صدر عبدالعلیم خان نے کہا کہ تبدیلی کی لہر چل رہی ہے عوام دھوکہ دینے والوں کو دوبارہ اقتدار میں نہیں آنے دیں گے 2013میں زرداری کی مخالفت کا ووٹ حاصل کرنے والے آج دوبارہ ویسی ہی صورتحال بنانا چاہتے ہیں لیکن اب ان کی کوئی چال کامیاب نہیں ہو گی عبدالعلیم خان نے فاروق آباد کے صوبائی حلقے پی پی169سے نواز لیگ کو خیر باد کہہ کر تحریک انصاف میں شامل ہونے والوں کو خوش آمدید کہا اور انہیں اپنے ہر ممکن تعاون کا یقین دلایا انہوں نے کہا کہ گزشتہ چار سال کا ریکارڈ گواہ ہے کہ موجودہ حکومت اپنے ہی کیے ہوئے وعدوں کو پورا کرنے میں بری طرح ناکام رہی ہے اور اب لوڈشیڈنگ سے لے کر دہشتگردی پر قابو پانے تک کیلئے بھونڈے جواز تلاش کیے جا رہے ہیں لیکن ووٹر ان سے لوٹی ہوئی قومی دولت کا حساب مانگتے ہیں عبدالعلیم خان نے کہا کہ انشاء اللہ آئندہ عام انتخابا ت کراچی سے خیبر تک عمران خان کے ہوں گے اور لوگ ایک مرتبہ پھر تبدیلی کیلئے دیوانہ وار باہر نکلیں گے ۔