ایس ای سی پی کا انفورسمنٹ مہم بھر پور طریقے سے جاری رکھنے کا عزم

اسلام آباد (اُردو پوائنٹ اخبارتازہ ترین - این این آئی۔ 21 اگست2017ء) سکیورٹیز اینڈ ایکسچینج کمیشن پاکستان نے اپنے اس عزم کا اعادہ کیا ہے کہ ساز باز اور انسائیڈر ٹریڈنگ میں ملوث افرادنیز ریگولیٹری اصولوں کی خلاف ورزی کرنے والوں کے خلاف پوری طاقت سے اپنی مہم جاری رکھے ہوئے ہے۔ ایس ای سی پی کی انتظامیہ نے اپنے اس مصمم ارادے کااعادہ کیا ہے کہ قوانین، ضوابط، قواعد اور اصولوں پرعمل درآمد ہر صورت یقینی بنایا جائے گا۔

بیان میںکہا گیا ہے کہ یہ بات ذہن نشین رہنی چاہیے کہ ایس ای سی پی وسیع دائرہ کار کا حامل ریگولیٹر ہے۔ کیپٹل مارکیٹ، کاروباری شعبے، غیر بینکی مالیاتی کمپنیاں،اجتماعی سرمایہ کاری سکیمیں اور دیگر لائسنس یافتہ ان ادارے اس کی دائرہ کار میں آتے ہیں۔

(جاری ہے)

ایس ای سی پی متعدد قوانین جیسا کہ ایس ای سی پی (ترمیمی) ایکٹ ۲۰۱۶، کمپنیز ایکٹ ۲۰۱۷،سکیورٹیز ایکٹ ۲۰۱۵،بیمہ آرڈیننس ۲۰۰۲ اور متعدد دیگر قوانین کے تحت ضروری ریگولیٹری کارروائیاں کرنے کا اختیار رکھتا ہے۔

ان قوانین کے ذریعے انضباط، نگرانی،نظر رکھنے اور نفاذ کے لئے کارروائیاں کرنے کے ایس ای سی پی کو تفویض شدہ اختیارات کمیشن کے متعدد ڈویژنوں اور شعبوں کو سونپے گئے ہیں۔ ان قوانین کے تابع انضباطی کارروائیاں کرنے کے مجاز کمیشن کے متعلقہ شعبیکمیشن کی انتظامیہ میں ہونے والی کسی تبدیلی سے قطع نظر نگرانی، تفتیش، انکوائری، آن سائٹ اور آف سائٹ معائنہ مسلسل جاری رکھے ہوئے ہیں۔

اس ضمن میں ایس ای سی پی حصص داروں کے حقوق اور انضباطی مقتضیات کی خلاف ورزی کے حوالے سے قطعی برداشت نہ کرنے کی پالیسی پر عمل پیرا ہے۔ مالیاتی خدمات کی مارکیٹ میں مؤثر توازن برقرار رکھنے کے لئے ایس ای سی پی اپنے کار ہائے منصبی پوری تندہی سے انجام دے رہا ہے۔ مارکیٹ میں ساز باز اور انسائیڈر ٹریڈنگ کے حوالے سیمتعدد تحقیقات جاری ہیں۔

ان تحقیقات کو پوری احتیاط کے ساتھ منصفانہ تکمیل تک پہنچانے کے لئے کام کیا جارہاہے۔ کمیشن اس ضمن میں اپنے قانونی اور انضباطی قوائد کے مطابق پیش قدمی کرے گا۔ بیان میں کہاگیا ہے کہ یہ بتانا بھی ضروری ہے کہ تمام انفورسمنٹ کارروائیاں چاہے وہ فوجداری یا انتظامی، ان کے متعلق معلومات متعین پالیسی کے مطابق ظاہر کی جاتی ہیں۔یہ بتانا بھی ضروری ہے کہ ایس ای سی پی قانون نافذ کرنے والی تمام متعلقہ اداروں کے ساتھ مضبوط اور فعال تعاون پر یقین رکھتا ہے۔

مزیدبرآں ، ایس ای سی پی کرمینل کورٹ میں دائر کئے جانے والے تمام مقدمات کی مستعدی کے ساتھ پیروی کر رہا ہے اور ان مقدمات میں عدالتوں کو بہترین معاونت فراہم کر رہا ہے۔اسی طرح، یکم جولائی سے شروع ہونے والی رواں سہ ماہی میں ایس ای سی پی کے متعلقہ محکمہ نے پچاس کمپنیوں کے سالانہ اکاؤنٹ کی آف سائٹ جانچ پڑتال مکمل کی جبکہ باون کمپنیوں کے سہ ماہی کاؤنٹ کی جانچ پڑتال کی گئی۔

علاوہ ازیں، قواعد و ضوابط کی خلاف ورزیوں جیسے کہ ڈائریکٹرز کی جانب سے اختیارات کا ناجائز استعمال، سالانہ اجلاس منعقد نہ کرنے، منسلکہ کمپنیوں میں سرمایہ کاری کرنے یا فنانشل سٹیٹمنٹ میں درست معلومات کی فراہمی نہ کرنا اور ایسی دیگر خلاف ورزیوں پر پندہ کمپنیوں کے خلاف اظہار وجوہ کی کاروائی کا آغاز کی گیا۔ اس دوران چھ کمپنیوں کے خلاف اظہار وجوہ کی کارروائیوں کو مکمل کی گیا جبکہ نان آپریشنل کمپنیوں کے خلاف ان کو بند کئے جانے کی کاروائیوں کا آغاز بھی کیا گیا۔