پاک چین اقتصادی راہداری مصنوبے میں پاکستان کی زراعت کو بھی شامل کیا جائے ،ْاحمد جواد

اسلام آباد (اُردو پوائنٹ اخبارتازہ ترین - این این آئی۔ 15 اکتوبر2017ء) فیڈریشن آف پاکستان چیمبرز آف کامرس اینڈانڈسٹری کی ریجنل قائمہ کمیٹی کے چیئرمین احمد جواد نے کہا ہے کہ چین نے گزشتہ چند برسوں میں زراعت کے شعبے میں بے پناہ ترقی کی ہے اور اس وقت وہ زرعی مصنوعات کا ایشیاء اور یورپ کا سب سے بڑا ایکسپورٹر ہے اس سلسلے میں ہم چینی حکام سے مطالبہ کرتے ہیں کہ وہ پاکستان کی زراعت کو موسمیاتی تبدیلیوں کی وجہ سے جن مشکلات کا سامنا ہے اُنہیں دور کرنے بھرپور معاونت فراہم کرے اور اس سلسلے میں دونوں حکومتیں مل کر ایک خصوصی حکمت عملی مرتب کریں۔

اُن کا کہنا تھا کہ پاکستان چین اقتصادی راہداری کے تحت زراعت کے شعبے میں بھی سرمایہ کاری کی جائے تاکہ پاکستان کے زرعی شعبہ کو آنے والے سالوں میں محفوظ بنایا جا سکے۔

(جاری ہے)

احمد جواد نے مزید بتایا کہ وقت آ گیا ہے ہم اپنے زرعی شعبے کو جدید بنیادوں پر استوار کریں تاکہ اچھی پیداوار حاصل کی جاسکے۔زرعی ملک ہونے کے باوجود اس وقت ہم پیداواری صلاحیت کے لحاظ سے دنیا کی بڑی زرعی معیشتوں سے خاصے پیچھے ہیں۔

انہوں نے حکومت سے مطالبہ کیا کہ وہ کپاس اور گندم کے لیے خصوصی بیج تیار کروائے تاکہ سالانہ پیداواری صلاحیت میں 5فیصد تک کا اضافہ کیا جا سکے۔ دوسری طرف ہمیں پھلوں اور سبزیوں کی پیداوار میں تقریباً 40فیصد تک پھل گرنے کا نقصان ہر سال اٹھانا پڑتا ہے جسے روکنے کے لیے بھی ہمیں ٹھوس اقدامات کرنا ہوں گے۔ موسمیاتی تبدیلیوں پر بات کرتے ہوئے انہوں نے کہا کہ حکومتی سطح پر اقدامات کے ساتھ ساتھ ہمارے تحقیقی اداروں اور یونیورسٹیوں پر بھی بھاری ذمہ داری عائد ہوتی ہے کہ وہ اس طرح کے بیج تیار کریں جو موسمی تبدیلیوں میں بھی اچھی پیداوار دینے کی صلاحیت رکھتے ہوں۔

فیڈریشن کی قائمہ کمیٹی کے چیئرمین نے زرعی ماہرین کو مخاطب کرتے ہوئے کہا کہ ہمیں اپنی زراعت کو بچانے کے لیے ایک جامع حل تلاش کرنا پڑے گا۔ کیونکہ اگر زراعت کا شعبہ متاثر ہو گا تو ہماری معیشت جس کا زیادہ انحصار زرعی شعبے پر ہے مستقل طور پر بیٹھ جائے گی۔ قدرتی طور پر پاکستان کی جغرافیائی پوزیشن ایسی ہے جہاں سے ہم باآسانی وسطی ایشیاء، مشرق وسطیٰ اور چین کو بڑے پیمانے پر زرعی مصنوعات برآمد کرسکتے ہیں لیکن اس وقت ہم اپنے ذخائر اور اپنی صلاحیتوں کو ضائع کر رہے ہیں۔

بدقسمتی یہ ہے کہ ابھی تک ہمارے ملک میں کوئی جامع زرعی پالیسی نہیں بنائی گئی۔ ہمارے ایوانوں میں بیٹھے پالیسی سازوں کا اس طرف دھیان ہی نہیں جا رہا۔ احمد جواد کا کہنا تھا کہ جب تک آپ زرعی شعبے میں ترقی کیلئے دو رس زرعی پالیسی مرتب نہیں کریں گے تب تک آپ اس شعبے میں کیسے اصلاحات لا سکتے ہیں۔