پاکستان اورکینیڈا کے مابین تجارت میں اضافہ کو ترجیح دی جائے،ایس ایم منیر

کراچی۔21اکتوبر  (اُردو پوائنٹ اخبارتازہ ترین - اے پی پی - اے پی پی۔ 21 اکتوبر2021ء):یونائٹیڈ بزنس گروپ (یو بی جی)کے سرپرست اعلی ایس ایم منیر نے کہا ہے کہ پاکستان اورکینیڈا کے مابین تعلقات خوشگوار ہیں جنہیں مزید مستحکم بنانے کیلئے کینیڈا میں متعین پاکستانی سفیر اورٹورنٹو میں پاکستانی قونصل جنرل عبدالحمید بے پناہ کوششیں کررہے ہیں،دونوں ممالک کے مابین تجارت میں اضافہ کو اولین ترجیح دے کر اور وزیر اعظم عمران خان کے وژن کے مطابق برآمدات بڑھائی جائیں تو دونوں ملکوں کے درمیان باہمی تجارت مستحکم ہوسکتی ہے۔

جمعرات کو جاری کردہ اعلامیہ کے مطابق انہوں نے ان خیالات کا اظہارپاکستانی نژادکینیڈین تاجر پرویز اختر کی جانب سے اپنے اعزاز میں دیئے گئے عشائیہ میں گفتگو کے دوران کیا۔

(جاری ہے)

عشائیہ میں ٹورنٹو میں پاکستان کے قونصل جنرل عبدالحمید ، ایس ایم نصیر ، امتیاز مرزا ، ایس ایم عمران، نوید بخاری ، نوید بخاری ، محبوب شیخ اور دیگربھی موجود تھے ۔ایس ایم منیر نے کہا کہ پاکستان اورکینیڈا کا نجی شعبہ باہمی تعلقات کو مستحکم بنانے میں بنیادی کردار ادا کر رہا ہے اور سفری پابندیوں کے خاتمے سے تجارت میں مزید اضافہ ہونے کے قوی امکانات ہیں۔

انہوں نے کہا کہ کینیڈین سرمایہ کاروں کو پاکستان میں سرمایہ کاری کے لئے راغب کرنے کی کوششیں کی جائیں کیونکہ کینیڈین سرمایہ کارپاکستان میں مینوفیکچرنگ کے ذریعے وسط ایشیااور خطے کے دیگر ممالک کے ساتھ تجارت بڑھا سکتے ہیں جبکہ وہاں مقیم پاکستانیوں میں ترسیلات میں اضافہ اور روشن ڈیجیٹل اکائونٹ میں سرمایہ کاری کے لئے ترغیب دی جاسکتی ہے۔ ایس ایم منیر نے کہا کہ پاکستان اورکینیڈا کی تجارتی تنظیموں کو قریب لانے کی جدوجہد جاری رکھی جائے گی تاکہ اقتصادی تعاون میں اضافہ ہو،دونوں ممالک کی بزنس کمیونٹی کو مزید قریب لانے کیلئے دوطرفہ تجارتی وفودکے ایک دوسرے کے ملکوں کے دورے سمیت سنگل کنٹری نمائش کے انعقاد کی کوششیں کی جائیں۔

Your Thoughts and Comments