درآمدات میں کمی کے بجائے بڑھایا جا رہا ہے،میاں زاہد حسین

کراچی(اُردو پوائنٹ اخبارتازہ ترین - این این آئی۔ 07 جنوری2022ء) نیشنل بزنس گروپ پاکستان کے چیئرمین، پاکستان بزنس مین اینڈ انٹلیکچولز فور م وآل کراچی انڈسٹریل الائنس کے صدر اور سابق صوبائی وزیر میاں زاہد حسین نے کہا ہے کہ بڑھتی ہو ئی درآمدات ملکی معیشت کے لئے زہر قاتل ثابت ہو رہی ہیں مگر ان میں کمی کے بجائے مسلسل بڑھایا جا رہا ہے۔ یہ پالیسی عوام اورکاروباری برادری کی سمجھ سے بالا تر ہے اس لئے اسکے نتیجہ میں برنس کمیونٹی میں خوف و ہراس ، بے چینی اور بے یقینی پھیل رہی ہے۔

میاں زاہد حسین نے کاروباری برادری سے بات چیت کرتے ہوئے کہا کہ ملکی معیشت کی نازک صورتحال کے باوجود اب ماہانہ درآمدات سات ارب ڈالر سے تجاوز کر گئی ہیں۔ سرکاری اعداد و شمار کے مطابق نومبر اور دسمبر کی درآمدات ساڑھے پندرہ اب ڈالر رہی ہیںجو ملکی معیشت کا بھٹہ بٹھانے کے لئے کافی ہیں ۔

(جاری ہے)

نومبر اور دسمبر سے قبل چھ ماہ کی اوسط درآمدات چھ ارب ڈالر ماہانہ تھیں۔

میاں زاہد حسین نے کہا کہ پٹرولیم اور کروڈ کی نومبر کی درآمد 2.8 ملین ٹن تھیں جو معمول سے کم از کم دس لاکھ ٹن زیادہ تھیں جس کی وضاحت کی جائے کیونکہ اس پر چھ سو ملین ڈالر کی اضافی لاگت آئی ہے۔ اسی طرح ادویات کے امپورٹ بل میں بھی سات سو ملین ڈالر کا اضافہ ہوا ہے جو حیران کن ہے۔ میاں زاہد حسین نے کہا کہ مہنگائی کی لہر کی وجہ سے تھوک فروشوں کے اسٹاک کی قیمت میں مجموعی طور پر اربوں روپے کا اضافہ ہو گیا ہے مگر دوسری طرف عوام کی قوت خرید ختم ہو گئی ہے اس لئے اشیائے ضروریہ کے علاوہ زیادہ ترا شیاء کی فروخت متاثر ہوئی ہے۔

جس ملک میں عوام کی قوت خرید ختم ہو جائے وہ ملک کسی بھی قیمت پر ترقی نہیں کر سکتا۔ سیلز ٹیکس میں چھوٹ ختم کرنے اور بجلی و گیس کی قیمتوں میں مسلسل اضافہ کی پالیسی سے ذخیرہ کئے گئے سامان تجارت کی قیمت بڑھ جائے گی مگر عوام کی قوت خرید مذید متاثر ہو گی اور بہت سے منصوبے و کاروبار بھی بند ہو جائیں گے جس سے اقتصادی صورتحال مذید گھمبیر ہو جائے گی۔

سیاسی اورپالیسی سطح پر بے یقینی اور تعمیراتی سامان کی قیمتوں میں زبردست اضافہ نے ہائوسنگ پراجیکٹس پر کاری ضرب لگائی ہے ۔ چھوٹی اور درمیانے درجہ کی کمپنیاں کام بند کر کے حالات دیکھ رہی ہیں جبکہ بھاری مراعات لینے والی بڑی تعمیراتی کمپنیاں اپنے مہنگے منصوبوں کا کام کر رہی ہیں۔ میاں زاہد حسین نے مذید کہا کہ حکومت دعویٰ تو خوشحالی اور تر قی کا کرتی ہے مگر اسکی پالیسیاں غربت میں اضافہ کر رہی ہیں جسکی ایک مثال وفاقی ترقیاتی بجٹ میں بائیس فیصد کی کٹوتی ہے۔