عمران خان نے دھرنوں کی سیاست سے پاکستان کی تعمیر اور ترقی کے سفر کو ناقابل تلافی نقصان پہنچایا ہے، انجینئر امیر مقام

الپوری(اُردو پوائنٹ اخبار تازہ ترین۔6نومبر 2014ء) وزیر اعظم کے مشیر انجینئر امیر مقام نے کہا ہے کہ عمران خان نے دھرنوں کی سیاست سے پاکستان کی تعمیر اور ترقی کے سفر کو ناقابل تلافی نقصان پہنچایا ہے اس پر پوری قوم ان کا احتساب کرے گی ،انہیں پارلیمنٹ کو جعلی کہنے اور ملک اور قوم کو نقصان پہنچانے پر قوم سے معافی مانگنی چاہیے ،عمران خان حقیقت کی دنیا سے دور خوابوں اور خیالوں کی دنیا میں آباد ہیں انہیں اپنی ناکامیوں کا اعتراف کرکے اب سیاست چھوڑ دینی چاہیے ،ان خیالات کا اظہار انہوں نے پورن میں اپنی رہایش گاہ پر تحصیل پورن ،مخوزئی ،اور مارتونگ کے ورکروں کے جرگے سے خطاب کرتے ہوئے کیا ،اس موقع پر سابق رکن صوبائی اسمبلی فضل اللہ پیر محمد خان اور دیگر نے بھی خطاب کیا ،جرگے میں ہزاروں افراد شریک ہوئے،عمران خان کے دعوں کا زکر کرتے ہوئے انہوں نے کہا کہ خیبر پختونخوا کے سکولوں اور کالجوں میں مفت تعلیم تو درکنار اساتذہ کی 50فیصد اسامیاں خالی پڑی ہیں طلبا چندہ کر کے پرائیویٹ ٹیچرز کی خدمات حاصل کرنے پر مجبور ہیں ،انہوں نے کہا کہ سرکاری ہسپتالوں میں مفت علاج تو دور کی بات سرے سے ادویات اور ڈاکٹرز ہی موجود نہیں ،انہوں نے کہا کہ عمران خان کے دھرنے کا حشر بھی قادری سے مختلف نہیں ہوگا ،انہوں نے کہا کہ عمران خان کے تمام منصوبے فلاپ ہو چکے ہیں وہ اب خواب اور خیال کی دنیا میں رہ رہے ہیں ،انہوں نے کہا کہ ہم آج بھی عمران خان سے اپیل کرتے ہیں کہ خدا را خیبر پختونخوا کے عوام کے مینڈیٹ کا احترام کریں ،پارلیمنٹ کو جعلی کہنے پر قوم سے معافی مانگیں ،اور پارلیمنٹ میں آکر عوام کے حقوق کیلئے آواز بلند کریں ،انہوں نے کہا کہ پورے صوبے کی ترقی ہماری سیاست کا مقصد ہے ،ہم نے ہمیشہ عوام کی خدمت کی ہے اور کرتے رہیں گے ،انہوں نے کہا کہ شانگلہ کے عوام نے ہمیں جو عزت دی ہے ،اور جب سے سیاست میں قدم رکھا ہمیشہ شانگلہ کے عوام نے ہمیں کامیابی سے ہمکنار کیا ،ان کی خاطر جان و مال سب قربان ،انہوں نے کہا کہ شانگلہ میں کئی ترقیاتی منصوبوں پر کام جاری ہے ،اور بہت جلد نئے منصوبوں پر کام شروع ہوگا ،ان منصوبوں میں 20کروڑ روپے کی لاگت سے شانگلہ گرڈ کی صلاحیت کو ڈبل کرنا ،پورن مارتونگ روڈ کی تعمیر ،مارتونگ چکیسر روڈ کی تعمیر ،شکوئی گوکند روڈ ،مالم جبہ سور کمر پورن روڈ سرفہرست ہیں ،انہوں نے کہا کہ نواز شریف نے ڈھیری چکیسر روڈ کیلئے 50کروڑ روپے کی خصوصی منظوری دی ہے ،جس کے ٹینڈر ایک ہفتہ کے اندر اندر مکمل ہو جائیں گے ،انہوں نے کہا کہ بنگالئی الوچ روڈ کے باقی حصے کیلئے 10کروڑ روپے کی منظوری ہو چکی ہے ،اور اس منصوبے پر جلد کام شروع ہو جائے گا ،انہوں نے کہا کہ الپوری بشام روڈ کر کام پیزی سے جاری ہے اور اسی مہینے مکمل کر لیا جائے گا ۔