جماعت اسلامی کا حکومت سے بھارتی جارحیت پر کل جماعتی کانفرنس بلانے کا مطالبہ

لاہور ( اردوپوائنٹ اخبار تازہ ترین۔ آئی پی اے ۔ 06 مئی 2025ء ) امیر جماعت اسلامی حافظ نعیم الرحمن نے کہا ہے کہ حکومت بھارتی جارحیت پر کل جماعتی کانفرنس بلائے بصورت دیگر جماعت اسلامی قوم کومتحد کرنے کے لیے پہل کرتے ہوئے تمام اقدامات اٹھائے گی۔ نواز شریف بھارت کے خلاف کوئی بات نہیں کرتے،وہ اپنا علاج ضرور کروائیں لیکن بھارتی دہشت گردی کے خلاف زبان بھی کھولیں، بلاول بھٹوزرداری امریکہ کے چکر لگا رہے ہیں، ن لیگ، پیپلز پارٹی اور پی ٹی آئی امریکہ کی مذمت سے کتراتے ہیں، واشنگٹن کی آشیر آباد کے لیے ان میں مقابلہ جاری ہے۔

منصورہ میں پریس کانفرنس سے خطاب کرتے ہوئے انہوں نے کہا کہ بجٹ آرہا ہے، حکومت نے صدارتی آرڈیننس سے وزراء کی تنخواہوں میں بے تحاشا اضافہ کردیا، تنخواہ داروں، چھوٹے کسانوں اور عام آدمی کا خون نچوڑ کر مراعات یافتہ طبقہ کو نوازا جارہاہے، معاشی اشاریوں میں بہتری کے تمام حکومتی دعوؤں کے باوجود عوام کی حالت میں کوئی بہتری نہیں آئی۔

(جاری ہے)

انہوں نے چھوٹے کسان کو ریلیف دینے اور بجٹ میں ایک لاکھ بیس ہزار تک تنخواہ کو ٹیکس سے مستثنیٰ قرار دینے کا مطالبہ کیا۔

انہوں نے پنجاب میں وزیراعلیٰ کے گرد خوشامدی کلچر کی مذمت کی۔ان کا کہنا تھا کہ موجودہ حالات میں حکومت کی ذمہ داری ہے کہ قومی یکجہتی کے لیے کوششوں کو تیز کرے۔ انہوں نے کہا بلوچستان کی محرومیوں کو دور کیا جائے، لاپتہ افراد کے مسئلہ پر کمیشن بنا کر تفصیلات سامنے لائی جائیں، بے گناہ افراد کو رہا کیا جائے اور اگر کسی نے جرم کیا ہے تو اسے عدالت میں پیش کیا جائے۔

انہوں نے کہا کے پی میں قیام امن کے لیے موثر اقدامات کی ضرورت ہے۔ انہوں نے کہا حکومت چھوٹے کسانوں کو ریلیف دے، انہیں قرضہ دینے کی بجائے زرعی مداخل کی قیمتیں کم کی جائیں، جاگیرداروں پر ٹیکس لگایا جائے، بجلی کی قیمتوں کو لاگت کے مطابق کیا جائے۔انہوں نے واضح کیا قوم کو ریلیف ملے گا تو دشمن کا زیادہ اعتماد سے مقابلہ کرے گی۔ سیکرٹری جنرل امیرالعظیم، ڈپٹی سیکرٹری جنرل اظہر اقبال حسن، امیر لاہور ضیاالدین انصاری ایڈووکیٹ اور ڈپٹی سیکرٹری اطلاعات ساجدناموس بھی اس موقع پر موجود تھے۔

امیر جماعت نے کہا بھارت نے پہلگام میں فالس فلیگ آپریشن کرکے کشمیریوں پر مزید ظلم اور پاکستان کے خلاف آبی جارحیت کا آغاز کردیا ہے۔ حکومت ہندوتوا نواز مودی سرکار کو پوری دنیا میں ایکسپوز کرنے کے لیے جارہانہ حکمت عملی اپنائے، چین سمیت تمام دوست ممالک کو اعتماد میں لیا جائے، اقوام متحدہ میں معذرت خواہانہ لہجہ اختیار کرنے اور امریکہ سے ڈرنے کی قطعی ضرورت نہیں، پوری قوم اور فوج وطن کی حفاظت کے لیے تیار ہے، ہر پاکستانی کو مجاہد بننا چاہیے، جہاد ہمارے ماتھے کا جھومر ہے، این سی سی پروگرام دوبارہ شروع کیا جائے، ایکس پر پابندی اٹھائی جائے۔

حافظ نعیم الرحمن کا کہنا تھا کہ غزہ کے محاصرہ سے قحط سالی کا آغاز ہوگیا ہے، صہیونی افواج نے فریڈم فلوٹیلا پر حملہ کرکے دہشت گردی کی تمام حدیں پار کیں، اہل فلسطین پر ایک طرف بارود کی بارش کی جارہی ہے دوسری جانب اسرائیل کی جابر، ظالم اور قابض ریاست خوراک کو بطور ہتھیار استعمال کررہی ہے اور اس پر پوری دنیا خاموش ہے، امریکہ اسرائیل کی مکمل سرپرستی کررہا ہے، اسرائیلی دہشت گردی کی حمایت پر اسے بھی عالمی عدالت میں گھسیٹا جائے۔

انہوں نے کہا سوائے چند اسلامی ممالک کے باقی سب غزہ میں جاری نسل کشی کا تماشا دیکھ رہے ہیں، او آئی سی بھی کوئی عملی قدم نہیں اٹھا رہی، باربار مطالبہ کیا ہے کہ پاکستان اسرائیلی جارحیت کے خلاف قائدانہ کردار ادا کرے۔ اسرائیل کو فائدہ پہنچانے والی مصنوعات کے بائیکاٹ کی مہم کومزید آگے بڑھانا ہوگا۔