سفارتی کمیٹی کا اجلاس، سفارتی محاذ پر بھارت کیخلاف مضبوط موقف اپنانے پر اتفاق

اسلام آباد(اردوپوائنٹ اخبار تازہ ترین۔21 مئی 2025)بلاول بھٹو زرداری کی سربراہی میں قائم سفارتی کمیٹی کے اجلاس میں سفارتی محاذپر بھارت کیخلاف مضبوط موقف اپنانے پر اتفاق،بھارت کو سفارتی محاذ پر منہ توڑ جواب دینے کا عزم ، پاکستان کا درست موقف پیش کرنے کے حوالے اعلی سطح پر بنائی گئی کمیٹی کا مشاورتی اجلاس ہوا جس میں بلاول بھٹو زرداری، سینیٹر شیری رحمان حناربانی، مسلم لیگ ن سے معاون خصوصی طارق فاطمی اور خرم دستگیرجبکہ ایم کیو ایم پاکستان کی نمائندگی سینیٹر فیصل سبزواری نے کی۔

اجلاس میں جلیل عباس جیلانی، تہمینہ جنجوعہ بھی شریک ہوئے۔ سیکریٹری خارجہ نے تازہ ترین صورتحال پر بریفنگ دی اور شرکا کو بھارتی جارحیت سمیت فالس فلیگ آپریشن سے آگاہ کیا۔اجلاس میں وزارت خارجہ کی طرف سے خطے کی موجودہ صورتحال پر بریفنگ دی گئی جس میں پاکستان کے امن پسند اور مضبوط دفاعی موقف کو عالمی سطح پر بھرپور انداز میں پیش کرنے کا عزم دہرایا گیا۔

(جاری ہے)

اجلاس میں خطاب کرتے ہوئے سربراہ سفارتی کمیٹی بلاول بھٹو زرداری کا کہنا ہے کہ سندھ طاس معاہدے کی خلاف ورزی کی اجازت ہرگز نہیں دی جائے گی۔پاکستان کا موقف امن، استحکام اور ترقی پر مبنی ہے۔ بلاول بھٹو نے بھارت کو پانی کو بطور ہتھیار استعمال کرنے کی اجازت نہ دینے پر بھی زور دیا۔انہوں نے کہا کہ پاکستان اور بھارت دونوں جوہری طاقتیں ہیں اور پاکستان نے دہشت گردی کے ہاتھوں بہت نقصان اٹھایا ہے۔

سفارتی کمیٹی کے رکن خرم دستگیر کا اس موقع پر کہنا تھا کہ بھارت پاکستان کے خلاف ثبوت پیش کرنے میں ناکام رہا ہے بھارتی جنگی جنون خطے کیلئے شدید خطرہ ہے۔سفارتی کمیٹی عالمی برادری کو بھارتی جارحیت سے آگاہ کرے گی۔ان کا کہنا ہے کہ خطے میں پائیدار امن کو مسئلہ کشمیر کے حل سے مشروط ہے۔وفاقی وزیر مصدق ملک نے اجلاس میں خطاب کرتے ہوئے کہا کہ پاکستان اپنی علاقائی سالمیت کے تحفظ کو یقینی بنائے گا اور بھارت کے ساتھ برابری کی بنیاد پر بات چیت کرے گا۔

انہوں نے بھارتی جارحیت میں نہتے شہریوں کو نشانہ بنائے جانے کی بھی شدید مذمت کی۔عالمی برادری کے سامنے حقائق رکھے جائیں گے اور بغیر شواہد کے بھارت کی مہم جوئی کے نظرئیے کو دفن کرنا ہوگا۔فیصل سبزواری نے کہا کہ پاکستان نے جوابی کارروائی میں مکمل احتیاط برتی ہے اور عالمی سطح پر اپنا مقدمہ موثر انداز میں پیش کرے گا۔واضح رہے کہ وزیراعظم شہباز شریف نے بھارتی جارحیت اور سندھ طاس معاہدے سمیت کئی ظالمانہ اقدامات پر پاکستان کا درست موقف پیش کرنے کیلئے بلاول بھٹو زرداری کی قیادت میں کمیٹی تشکیل دی تھی۔کمیٹی یورپ اور دیگر اہم ممالک کا دورہ کرے گی اور دنیا کو پاکستان کے موقف اور بھارتی جارحیت سے آگاہ کرے گی۔