دھاندلی زدہ سابق حکومت چلنے دی نہ اس حکومت کو چلنے دیں گے،مولانا فضل الرحمان

بٹگرام (اُردو پوائنٹ اخبارتازہ ترین - این این آئی۔ 29 جون2025ء)سربراہ جے یو آئی ف مولانا فضل الرحمان نے کہا ہے کہ سابق حکومت چلنے دی نہ اس حکومت کو چلنے دیں گے،2018 اور 2024 کے الیکشن دھاندلی زدہ ہیں ، انہیں تسلیم نہیں کرتے، دھاندلی کے الیکشن اور دھاندلی کی حکومتوں پر گلہ نہ کیا جائے،فاٹا کا خیبر پختونخوا میں انضمام کا فیصلہ غلط اور یکطرفہ ہے، اس فیصلے سے قبائل ناراض ہیں، ملک کو امریکہ کی رضا مندی کے ساتھ چلاتے ہو تو پھر جمہوریت کی بات کیوں کرتے ہوئے۔

کانفرنس سے خطاب کرتے ہوئے مولانا فضل الرحمن نے کہاکہ ہزارہ اور بٹگرام کی سرزمین پر یہ فقید المثال اجتماع روایات کی تجدید ہے۔ انہوںنے کہاکہ اس ملک میں انتخابات میں نتائج مینج کئے جاتے ہیں۔ 2018 کے انتخابات کی طرح 2024 کے انتخابات میں دھاندلی زدہ ہے۔

(جاری ہے)

ہم دونوں انتخابات نتائج کو مسترد کرتے ہیں۔ انہوںنے کہاکہ اس ملک میں شعائر اسلام کی توہین کی جاتی ہے،اگر یہ سلسلہ نہ تھما تو کارکنان آپ کے سامنے کھڑے ہونگے۔

مولانا فضل الرحمن نے کہاکہ دھاندلی کی حکومتیں کرپشن میں دلچسپی رکھتی ہیں، اسٹیبلشمنٹ کو عوام الناس کے سامنے سر تسلیم خم کرنا چاہیے۔ انہوںنے کہاکہ تمہارے کوئی فیصلہ اپنے نہیں،فاٹا انضمام کا فیصلہ بین الاقوامی دباؤ میں ہوا ہے،ہم نے اس فیصلے کو قبائل کے سیاسی مستقبل کے خلاف سمجھتے ہیں،آج ہماری حکومت اس فیصلے پر نظر ثانی کے لیے کمیٹی بنائی گئی ہیں۔

ہائے اس زود پشیماں کا پشیماں ہونا۔ انہوںنے کہاکہ فاٹا کے کروڑوں عوام کے مستقبل کا ناقص فیصلہ تمہاری بے بصیرتی کا منہ بولتا ثبوت ہے،ہم نے اسی تناظر میں ایوان کے فلور پر کشمیر کے مسئلہ کی حساسیت واضح کر دی تھی۔ مولانا فضل الرحمن نے کہاکہ تم اس ملک کو امریکہ کی مرضی سے چلانا چاہتے ہو تو جمہوریت کا نام کس منہ سے لے رہے ہو۔ انہوںنے کہاکہ جنرل مشرف کے دور میں بھی زنا بالرضا کیلئے سہولتیں پیدا کی گئیں، آج ایک شرعی اور جائز نکاح پر قدغنیں لگائی جا رہی ہیں،یہ کیسا اسلامی جمہوریہ پاکستان ہے۔

انہوںنے کہاکہ خدا کی پھٹکار سے ڈرو! تم خدا کے عذاب کو دعوت دے رہے ہو۔ مولانا فضل الرحمن نے کہاکہ بندہ مومن خدائی فیصلہ میں سرمو انحراف کا بھی تصور نہیں کر سکتا۔ آج تم اتنے جری ہو گئے ہو کہ قرآنی احکامات کو پامال کر رہے ہو۔انہوںنے کہاکہ جمعیت علمائے اسلام کا احتجاج اور یہ اجتماع خدائی عذاب میں رکاوٹ ہے ورنہ حکمران اس ملک کو تباہی پر تلے ہوئے ہیں۔

مولانا فضل الرحمن نے کہاکہ میرے سامنے یہ اعترافات کئے گئے کہ ہم اس خطے میں پشتون تہذیب کو بدلنا چاہتے ہیں،عالمی آقاؤں کے دست شفقت کے تلے مذہب و تہذیب کے خلاف ’’تبدیلیاں‘‘لائی جا رہی ہیں۔ انہوںنے کہاکہ غزہ و فلسطین کے مظلوم مسلمانوں پر اسرائیل کا جبر و استبداد کے باوجود امریکہ کو جنگ بندی یاد نہیں آئی لیکن ایران نے جب اسرائیل میں تباہی مچائی تو ٹرمپ کو جنگ بندی یاد آ گئی۔

انہوںنے کہاکہ حالیہ کشیدگی میں جب پاکستان نے انڈیا کی طاقت کو ناکے چنے چبوائے۔ یہود و ہنود کے پٹنے پر تو ٹرمپ کو امن اور جنگ بندی یاد آ جاتی ہے۔ انہوںنے کہاکہ آج امریکہ ’’ابراہیمی اتحاد‘‘کا نعرہ لگا رہا ہے، یہ وحدت ادیان کی دعوت ہے۔ مغرب کو آج حضرت ابراہیم یاد آ رہے ہیں، کیمونزم کو شکست دینے کی غرض سے تم اس پہلے بھی یہ فلسفہ پیش کیا گیا، جب ہم نے اس شرارت سے سخت اختلاف کیا تو ہمیں ’’سوشلسٹ ملا‘‘کہا گیا۔

مولانا فضل الرحمن نے کہاکہ ابراہیم علیہ السلام ہمارے پیغمبر ہیں، جناب اسماعیل علیہ السلام کی اولاد میں سیدنا و مولانا محمد رسول اللہ صلی اللہ علیہ وسلم آخری نبوت ، شریعت اور کتاب لے کر مبعوث ہوئے۔ انہوںنے کہاکہ اسلام نے یہودیت و عیسائیت کو منسوخ کیا۔ تورات و انجیل محرف ہے، قرآن کریم مکمل طور پر محفوظ ہے، امت مسلمہ ایک مستقل اور خیر امت کی حیثیت رکھتی ہے۔

انہوںنے کہاکہ سوات سانحہ کی مکمل ذمہ داری صوبائی حکومت پر عائد ہوتی ہے،سوات سیاحت کا مرکز ہے جہاں ہر سال پنجاب، سندھ اور دیگر صوبوں سے ہزاروں سیاح آتے ہیں، مگر افسوسناک امر یہ ہے کہ حکومت اور لوکل انتظامیہ کی جانب سے سیاحوں کے لیے بنیادی سہولیات کا فقدان ہے۔انہوںنے کہاکہ انتہائی افسوس ہوتا ہے کہ صوبائی مشینری عمران خان کی رہائی کے لیے تو متحرک ہو جاتی ہے، مگر آج 18 قیمتی جانیں ضائع ہوئیں، نہ 1122 پہنچی، نہ انتظامیہ اور نہ ہی حکومت نے کوئی بروقت قدم اٹھایا۔ انہوںنے کہاکہ پاکستان پیپلز پارٹی کا مطالبہ ہے کہ اس مجرمانہ غفلت پر وزیراعلیٰ خیبرپختونخوا فوری طور پر مستعفی ہوں۔