لاہور (اُردو پوائنٹ اخبارتازہ ترین - اے پی پی۔ 26 جولائی2025ء) سابق وزیر اعظم اور پاکستان پیپلز پارٹی وسطی پنجاب کے صدر راجہ پرویز اشرف نے کہا ہے کہ صدر مملکت آصف علی زرداری نے نہ صرف پیپلز پارٹی بلکہ پاکستان کو ایک متحد ملک کی صورت میں برقرار رکھنے میں اہم کردار ادا کیا۔ان خیالات کااظہار انہوں نے گزشتہ روز مقامی ہوٹل میں پاکستان پیپلز پارٹی وسطی پنجاب کے زیر اہتمام صدر مملکت آصف علی زرداری کی 70 ویں سالگرہ کے موقع پر ایک پروقار سیمینار سے خطاب کرتے ہوئے کیا۔
سیمینار کا اہتمام سینئر پارٹی رہنما فیصل میر نے کیا تھا اور صدارت راجہ پرویز اشرف نے کی جبکہ مہمان خصوصی گورنر پنجاب سردار سلیم حیدر خان اور جنرل سیکرٹری سید حسن مرتضی تھے۔ سیمینار میں پارٹی کے مرکزی و علاقائی رہنمائوں، خواتین، نوجوانوں اور کارکنان کی بڑی تعداد موجود تھی۔
(جاری ہے)
شرکاء میں بشیر ریاض، عثمان ملک، چوہدری اسلم گل، ناصرہ شوکت،عقیلہ، یوسف، نوید چوہدری، بیلم حسنین، فائزہ ملک، ثانیہ کامران،نرگس خان ،عزیزالرحمن چن، تنویر اشرف کائرہ، ڈاکٹر خیام حفیظ، علامہ یوسف اعوان، ڈاکٹر ضرار یوسف، ہما میر، پیر حیدر شاہ، کامران ڈار، موسی کھوکھر، نسیم سہوترا،ایڈون سہوترا ،خاور ناہید ،موھل اور بڑی تعداد میں جیالے شامل تھے۔
اس موقع پر خطاب کرتے ہوئے راجہ پرویز اشرف نے کہا کہ اگر آصف زرداری کی جگہ کوئی اور ہوتا تو شاید پیپلزپارٹی اس مقام پر نہ ہوتی۔انہوں نے آصف زرداری کی جانب سے پارلیمان کی بالادستی، اٹھارویں ترمیم، سی پیک اور صوبائی خودمختاری جیسے اہم اقدامات کو پاکستان کی سیاسی تاریخ میں سنگ میل قرار دیا۔ راجہ پرویز اشرف نے کہا کہ صدر زرداری نے اپنے تمام صدارتی اختیارات رضا کارانہ طور پر پارلیمان کو واپس دیئے، خیبر پختونخوا اور گلگت بلتستان کو ان کی اصل شناخت دی اور کسانوں کے لیے رعایتوں کا اعلان کیا جس سے ملک غذائی خود کفالت کی طرف بڑھا۔
راجہ پرویز اشرف نے کہا کہ آصف علی زرداری وہ عظیم شخصیت ہیں جنہوں نے قید و بند کی صعوبتیں جھیل کر بھی جمہوریت کی شمع کو بجھنے نہیں دیا، انکی بے پناہ سیاسی بصیرت، حکمت عملی، صبر اور قربانیوں سے مزین جدوجہد نے پاکستان کو آئینی و جمہوری راہوں پر گامزن رکھنے میں کلیدی کردار ادا کیا۔انہوں نے کہاکہ "پاکستان کھپے" کا نعرہ دراصل قومی وحدت، ایثار اور بے مثال تدبر کا مظہر ہے، جو آپ کے پختہ عزم اور گہرے سیاسی شعور کی دلیل ہے۔
صدر آصف علی زرداری ملکی تاریخ کے واحد رہنما ہیں جنہوں نے دو مرتبہ منتخب صدر کے طور پر آئینی حدود میں رہتے ہوئے پارلیمانی نظام کو مستحکم کیا اور مفاہمتی سیاست کی بنیاد رکھ کر سیاسی انتشار کی فضا کو اتحاد و ہم آہنگی میں بدلا۔ صدر زرداری کی قیادت میں جمہوریت نے نہ صرف دوام پایا بلکہ مظلوم طبقات کو آواز بھی ملی۔ گورنر پنجاب سردار سلیم حیدر نے اپنے خطاب میں فیصل میر کو شاندار تقریب کے انعقاد پر خراج تحسین پیش کیا اور کہا کہ پیپلز پارٹی واحد سیاسی جماعت ہے جس کی قیادت تسلسل کے ساتھ ذوالفقار علی بھٹو، بینظیر بھٹو کے بعد آصف علی زرداری اور بلاول بھٹو جیسے رہنمائوں کے ہاتھ میں ہے۔
انہوں نے آصف علی زرداری کو ایک عظیم اور ظرف والا انسان قرار دیتے ہوئے کہا کہ انہوں نے جیلیں کاٹیں مگر اپنے اصولوں پر سمجھوتہ نہیں کیا۔ آصف علی زرداری نے ایران کے ساتھ گیس پائپ لائن معاہدہ کیا، چین کے چودہ دورے کیے اوربھارت کے مقابلے میں پاکستان کی پوزیشن مضبوط کی۔گورنر نے مزید کہا کہ پاکستان کی سالمیت، جمہوریت اور یکجہتی کے لیے آصف علی زرداری کا کردار قابل تقلید ہے،آصف زرداری نہ صرف اپنے کارکنوں بلکہ مخالفین کا بھی خیال رکھتے ہیں۔
انہوں نے دعا کی کہ اللہ تعالیٰ آصف علی زرداری کو صحت مند اور طویل زندگی عطا کرے اور بلاول بھٹو جلد ملک کے وزیراعظم بنیں۔جنرل سیکرٹری وسطی پنجاب سید حسن مرتضی نے خطاب کرتے ہوئے کہا کہ آصف علی زرداری کی زندگی مسلسل جدوجہد کا نام ہے، آصف علی زرداری نے ہمیشہ برداشت، مفاہمت اور آئینی روایات کو فروغ دیا۔ فیصل میر نے کہا کہ آصف علی زرداری نے مسلم دنیا کو جوڑنے کے لیے سعودی عرب اور ایران کے درمیان روابط کی بحالی میں اہم کردار ادا کیا۔
انہوں نے چین کے ساتھ 2008 میں کئی اہم معاہدے کیے اور بھارت کے ساتھ اسٹرٹیجک مقابلے میں پاکستان کی بنیادیں مضبوط کیں۔ انہوں نے کہا کہ آصف زرداری نے 11 سال جیل کاٹی مگر اصولوں سے پیچھے نہیں ہٹے۔ انہوں نے مزید کہا کہ وہ مریم نواز کو بیٹی سمجھتے ہیں، اسی لیے انہوں نے مریم سے متعلق سوال کا جواب دینے سے انکار کر دیا۔ فیصل میر نے اعلان کیا کہ آصف زرداری کی سالگرہ ہر سال اسی جوش و خروش سے منائی جائے گی۔
سیمینار سے بیرسٹر عامر حسن اور ڈاکٹر عائشہ شوکت نے بھی خطاب کیا جبکہ اختتام پر 70 پائونڈ وزنی کیک کاٹا گیا۔ اس موقع پر پارٹی رنگوں والے ہزاروں غبارے فضا میں چھوڑے گئے اور شاندار لائٹس شو کا بھی اہتمام کیا گیا۔ ہال "زندہ ہے زرداری، زندہ ہے" جیسے نعروں سے گونجتا رہا جبکہ پیپلز سٹوڈنٹس فیڈریشن کے نوجوانوں نے "او زرداری" گانا پیش کر کے ماحول کو مزید پرجوش بنا دیا۔
