پی ٹی آئی دہشت گردوں کیساتھ ہے، نیشنل ایکشن پلان پر کارروائی کسی کا باپ نہیں روک سکتا، وزیر مملکت داخلہ

اسلام آباد(اُردو پوائنٹ اخبارتازہ ترین - این این آئی۔ 07 اگست2025ء)وزیر مملکت برائے داخلہ طلال چوہدری نے کہا ہے کہ پاکستان تحریک انصاف دہشت گردوں کے ساتھ ہے، نیشنل ایکشن پلان کے تحت ہونے والی کارروائی کسی کا باپ نہیں روک سکتا۔قومی اسمبلی کے اجلاس میں اظہارخیال کرتے ہوئے وزیر مملکت برائے داخلہ طلال چوہدری نے پاکستان تحریک انصاف کے احتجاج اور اسمبلی کے دروازے بند کیے جانے پر کہا کہ کشمیر کا یومِ استحصال تھا، اور ڈی چوک میں بڑی واک ہو رہی تھی جسے نائب وزیر اعظم لیڈ کر رہے تھے، سیکیورٹی خدشات کی بنیاد پر باہر سے آنے والے لوگوں کو اندر داخلے سے روکا گیا، لیکن اسمبلی کے اندر سے باہر نکلنے کے تمام راستے کھلے تھے، میں خود بھی آتا جاتا رہا، کسی ممبر کو نہیں روکا گیا۔

انہوں نے کہا کہ پی ٹی آئی نے احتجاج کی درخواست ڈاک کے ذریعے بھیجی تھی، پانچ تاریخ کو احتجاج تھا، درخواست دو تاریخ کو ڈی سی آفس پہنچی، ڈی سی اور اس کا عملہ دو دن درخواست میں دیے گئے نمبروں پر رابطے کی کوشش کرتا رہا، مگر کسی نے جواب نہیں دیا۔

(جاری ہے)

طلال چوہدری نے کہاکہ اسلام آباد میں صرف 100 سے بھی کم افراد نکلے، پنجاب میں صرف 954 افراد احتجاج میں نکلے، وہ بھی بکھرے بکھرے، کسی کو روکا نہیں گیا، کسی ممبر کو گرفتار نہیں رکھا گیا، یہ کہنا کہ اسمبلی کے ذریعے اڈیالہ جیل جا رہے تھے، بالکل بے بنیاد ہے، اگر اڈیالہ جانا تھا تو سیدھا جاتے، اسمبلی آنے کا کیا مقصد تھا انہوں نے کہا کہ یہ کہنا کہ ہم پاپولر ہیں، ہمیں کوئی کچھ نہیں کہہ سکتا غلط ہے، شیطان بھی پاپولر ہے، مگر فرشتہ نہیں ہے، اگر آپ پاپولر ہیں تو آپ پر زیادہ ذمہ داری عائد ہوتی ہے، 9 مئی کے واقعات سب کو یاد ہیں، کس جماعت نے کیی کس لیڈر نے کہا کہ اگر کسی نے میری حفاظت نہیں کی یا احتجاج میں حصہ نہیں لیا تو اسے پارٹی ٹکٹ نہیں دوں گا یہی لوگ ٹکٹ لینے کے لیے جلا گھیرا کرتے رہے۔

انہوں نے کہا کہ آج آپ کہتے ہیں عدالتوں سے انصاف ملے، مگر جب آپ کے خلاف فیصلہ آئے تو عدالتوں کو ماننے سے انکار کر دیتے ہیں، جب پشاور کی عدالت سے اسٹے ملتا ہے تو آپ کو عدالتیں اچھی لگتی ہیں۔وزیرمملکت برائے داخلہ نے کہا کہ سابق اسپیکر کہہ رہے تھے کہ کوئی نیا آپریشن نہ کیا جائے، عرض ہے کہ کوئی نیا آپریشن نہیں ہو رہا، لیکن نیشنل ایکشن پلان کے تحت جو روزمرہ کی کارروائیاں ہیں، وہ جاری رہیں گی اور کسی کا باپ انہیں نہیں روک سکتا،یہ بات بھی سب کو معلوم ہے کہ کالعدم تحریک طالبان پاکستان کو واپس کس نے بلایا ان کو کس نے آباد کیا کس صوبے کے وزیر اعلی نے کہا کہ اگر ہم لڑے تو ہمارا انجام اے این پی یا جے یو آئی (ف)جیسا ہو گا انہوںنے کہاکہ 2015کے بعد پی ٹی آئی کے کسی رہنما پر کوئی حملہ کیوں نہیں ہوا کیوں کہ ان (پاکستان تحریک انصاف)کا دہشت گردوں سے گٹھ جوڑ ہے۔

انہوں نے کہا کہ نیشنل ایکشن پلان پر عمل ہوگا، اور روزمرہ کی سیکیورٹی کارروائیاں جاری رہیں گی، یہ جنگ پاکستان کے دشمنوں کے خلاف ہے، دہشت گردی کو کسی صورت برداشت نہیں کیا جائے گا۔وزیرمملکت برائے داخلہ نے زائرین کے حوالے سے کہا کہ پاکستان سے بڑی تعداد میں لوگ زمینی راستے سے ایران کے ذریعے عراق زیارت کے لیے جاتے ہیں، حکومت ہر سال سیکیورٹی اور دیگر سہولیات فراہم کرنے کی پوری کوشش کرتی ہے۔

انہوں نے کہا کہ اس بار مخصوص سیکیورٹی وجوہات کی بنا پر، خاص طور پر اسرائیل اور ایران کے درمیان حالیہ جنگ اور خطے کی صورتِ حال کے باعث ، ہم نے زمینی سفر کی ممانعت کی ہے، یہ فیصلہ علاقائی ممالک سے مشاورت کے بعد کیا گیا ہے۔طلال چوہدری نے کہا کہ میں ابھی فورا کراچی جا رہا ہوں تاکہ ان سے براہ راست بات کی جائے، سندھ اور بلوچستان حکومت اور گورنر سندھ بھی رابطے میں ہیں، کچھ نکات پر ہم قریب آئے ہیں،حکومت بھرپور کوشش کر رہی ہے کہ اس سفر کو ممکن اور محفوظ بنایا جا سکے۔