پیپلز پارٹی جاگیرداروں ،ْوڈیروں کا ٹولا، مرتضیٰ وہاب ا س کے ماؤتھ پیس ہیں ،ْ منعم ظفر خان

کراچی(اُردو پوائنٹ اخبارتازہ ترین - این این آئی۔ 11 ستمبر2025ء)امیر جماعت اسلامی کراچی منعم ظفر خان نے اپوزیشن لیڈر کے ایم سی سیف الدین ایڈوکیٹ کے ہمراہ ادارہ نورحق میں کراچی میں بارش سے پیدا شدہ صورتحال کے حوالے سے پریس کانفرنس سے خطاب کرتے ہوئے کہاکہ پیپلز پارٹی جاگیرداروں اور وڈیروں کا ٹولہ ہے اور مرتضیٰ وہاب ان کے ماؤتھ پیس ہیں، بارشوں نے شہر کو کھنڈرات میں بدل دیا ہے۔

سندھ حکومت اور قابض میئر عوام کو ریلیف فراہم کرنے میں مکمل طور پر ناکام ہوچکے ہیں۔ہمارا مطالبہ ہے کہ کراچی کو انفرا اسٹرکچر کی بحالی کے لیے ہنگامی طور پر 500 ارب روپے اور ہر ٹاؤن کو 2 ارب روپے ترقیاتی فنڈ دیا جائے ، فوری طور پر پی ایف سی ایوارڈ جاری کیا جائے، کے فور منصوبہ مکمل ہو اور اختیارات نچلی سطح پر منتقل کیے جائیں۔

(جاری ہے)

ایم یو سی ٹیکس یونین کونسل کو دیا جائے تاکہ گلی ،محلوں میں کام ہوسکے ، قابض میئر شہر کے اسٹیک ہولڈرز کو ایک ساتھ بٹھانے کی صلاحیت و اہلیت بھی نہیں رکھتے ۔

جماعت اسلامی اہل کراچی کے حقوق اور مسائل کے حل کے لیے اپنی جدوجہد و مزاحمت اور کرپٹ حکمرانوں کا پیچھا کرتی رہے گی۔انہوں نے کہا کہکراچی واٹر اینڈ سیوریج کارپوریشن شہریوں کے لیے عذاب بن چکا ہے۔ گلیوں اور سڑکوں پر گٹر کا پانی بہہ رہا ہے،، شاہراہ بھٹو کا ایک حصہ اور حب کینال بھی دوبارہ بہہ گئی اور ریڈ لائن منصوبہ و کریم انڈر پاس شہریوں کے لیے وبال جان بن گئے ہیں۔

نالوں کی صفائی کے لیے گزشتہ دو برس میں مختص کیے گئے 100 کروڑ روپے بھی نا اہلی و کرپشن کی نذر ہوگئی، جس کے نتیجے میں ہر بارش کے بعد شہر ڈوب گیا۔ جہانگیر روڈ ،ناتھا خان برج متعدد بار ٹوٹ پھوٹ چکے ہیں ، پورے ملک کی معیشت چلانے والے شہر کو کوئی بنیادی سہولت حاصل نہیں ہے،وفاقی حکومت کے پاس کے فور منصوبے کے لیے فنڈز نہیں لیکن اتحادیوں کو نوازنے کے لیے اربوں روپے بانٹے جارہے ہیں،ایم کیو ایم کو دیے جانے والے 20 ارب روپے سیاسی رشوت ہے یہ بلدیات کا حق ہے۔

سیاسی رشوتیں دینے کا عمل بند کیا جائے ، انہوں نے کہا کہ وفاقی سیکریٹری نے سارے اعدادو شمار پیش کردیے ہیں ، پچھلے پندرہ سال میں صوبے کو جو ترقیاتی بجٹ ملا ہے اس میں آبادی کے لحاظ سے کراچی کا شیئر 37فیصد ہے ،1472ارب روپے میں سے کراچی کو صرف 416ارب روپے دیے گئے ،انفرااسٹرکچراور ضلع اوکٹرائے ٹیکس میں بھی تقریباًً1 ہزار ارب روپے کا ڈاکہ ڈالاگیاہے، بارشوں میں لیاری اور ملیر ندی بھرگئی جس کے نتیجے میں شہر کی آبادیاں متاثر ہوئیں ، گھروں میں چھ چھ فٹ پانی جمع ہوگیا اور حکومت صرف شاہراہ بھٹو پرتصویریں بنواتی نظر آتی ہے ، کے الیکٹرک کیبل فالٹ کے نام پر 2,2دن مختلف علاقوں میں بجلی بند کردیتا ہے، بوسیدہ پلانٹس چلائے جارہے ہیں، میونسپل یوٹیلٹی ٹیکس لینے کے لیے کے الیکٹرک کو اختیار دیدیا گیا، ٹیکس پورے شہر سے لیاجاتا ہے لیکن اون کرنے کے لیے صرف 106سڑکیں اور ان سڑکوں کی حالت بھی ابتر ہیں،منعم ظفر خان نے کہا کہ اسرائیل نے حال ہی میں قطر میں حماس قیادت پر حملہ کرکے کھلی دہشت گردی کا مظاہرہ کیا۔

اسرائیلی دہشت گردی و جارحیت مسلسل بڑھ رہی ہے اور مسلم دنیا کے حکمران بے حسی کی چادر اوڑھے ہوئے ہیں، جبکہ دنیا بھر کے مسلمان اور باضمیر لوگ اسرائیل کے خلاف احتجاج کررہے ہیں۔اگر مسلم حکمرانوں نے ہوش کے ناخن نہ لیے تو جس طرح فلسطین اور غزہ میں ظلم ہورہا ہے کل ان کی باری بھی آسکتی ہے۔ اسرائیل 2برس سے فلسطین میں قتل عام اور اب بھوک کو بطور ہتھیار استعمال کررہا ہے۔

غزہ قحط کا شکار ہے اور امداد کے تمام راستے بند کردیئے گئے ہیں۔ تقریباً 65 ہزار افراد شہید ہوچکے ہیں جن میں دو تہائی بچے اور خواتین شامل ہیں، جبکہ 270 سے زائد صحافی بھی نشانہ بنے ہیں۔ منعم ظفر خان نے مزیدکہاکہ 11ستمبر بانی پاکستان قائداعظم محمد علی جناح کا یوم وفات ہے۔ ان کی قیادت میں برصغیر کے مسلمانوں نے لازوال قربانیوں اور جدو جہد کے بعد 1947 میں وطن عزیز پاکستان حاصل کیا، لیکن افسوس کہ ان کی وفات کے 77 برس گزرنے کے باوجود جاگیردارانہ نظام اور وڈیرا شاہی ذہنیت نے سیاسی نظام کو جکڑ رکھا ہے۔

ضرورت اس بات کی ہے کہ پوری قوم قائداعظم کے سنہری اصولوں ایمان، تنظیم اور یقین محکم پر عمل کرے اور ملک کو اس کے قیام کے مقاصد سے ہمکنار کرنے کی جدو جہد کرے ۔ پریس کانفرنس میں نائب امیر کراچی راجا عارف سلطان ، سکریٹری کراچی توفیق الدین صدیقی ، سکریٹری اطلاعات زاہد عسکری، پبلک ایڈ کمیٹی کراچی کے سکریٹری نجیب ایوبی، نائب صدر عمران شاہد بھی موجود تھے ۔