امریکا سے دھمکیوں کی چھائوں میں مذاکرات نہیں ہوں گے،ایران

امریکا غلط فہمی دور کر لے کہ دھمکیاں دے کر ایران کو مذاکرات پر مجبور کر سکے گا، بہرام قاسمی

جمعرات 26 جولائی 2018 17:45

تہران(اُردو پوائنٹ اخبار آن لائن۔ جمعرات 26 جولائی 2018ء)ایرانی وزارت خارجہ کے ترجمان بہرام قاسمی نے کہا ہے کہ امریکا سے دھمکیوں کی چھائوں میں مذاکرات نہیں ہوں گے،امریکا بھول جائے کہ وہ دھمکیاں دے کر ایران کو مذاکرات پر مجبور کر سکے گا۔غیر ملکی خبر رسان ادارے کے مطابق ایران کی وزارت خارجہ کے ترجمان بہرام قاسمی نے کہا ہے کہ ایران دھمکیوں کے سائے میں امریکا کے ساتھ یک طرفہ مذاکرات نہیں کرے گا۔

(جاری ہے)

بہرام قاسمی نے کہا کہ ایرانی قوم ایک مہذب اور بہادر قوم ہے جو دھمکیوں کا جواب دھمکی سے اور عزت و احترام کا جواب عزت سے دے سکتی ہے۔ امریکا بھول جائے کہ وہ دھمکیاں دے کر ایران کو مذاکرات پر مجبور کر سکے گا۔ ہم دبا، بدمعاشی اور ناجائز مطالبات کے سامنے نہیں جھکیں گے۔بہرام قاسمی نے مزید کہا کہ آج بھی ماضی کی طرح امریکی حکام پر مذاکرات کا بھروسہ نہیں کیا جاسکتا لہذا امریکا کو چاہئے کہ وہ اپنی حیثیت اور پوزیشن دیکھ کر ایران کے مقام و مرتبے پر بات کرے۔واضح رہے کہ امریکا کی جانب سے ایرانی جوہری ڈیل سے نکل جانے کے بعد دونوں ممالک کے درمیان تعلقات میں شدید کشیدگی پیدا ہوئی ہے جب کہ حالیہ کچھ روز میں دونوں جانب سے سخت بیانات کا تبادلہ بھی دیکھا گیا ہے۔