الیکشن کے بعد تمام جماعتوں کو مل کر چلنا ہو گا، چوہدری شجاعت ، ہم درست سمت میں چلنے والوں کے ساتھ ہیں، چودھری پرویزالٰہی

جمعرات 26 جولائی 2018 23:09

لاہور۔26جولائی(اُردو پوائنٹ اخبار آن لائن۔ جمعرات 26 جولائی 2018ء)پاکستان مسلم لیگ کے صدر و سابق وزیراعظم چودھری شجاعت حسین نے کہا ہے کہ موجودہ الیکشن ایک طرح کا ریفرنڈم تھا جس میں عوام نے کھل کر اپنی رائے کا اظہار کیا، الیکشن ڈیوٹی پر تعینات فوجی جوانوں اور پولیس اہلکاروں کو لوگوں نے اپنی محبت اور یکجہتی کے اظہار کیلئے پھول پیش کیے۔

میڈیا سے گفتگو کرتے ہوئے انہوں نے مزید کہا کہ الیکشن کے بعد تمام جماعتوں کو مل کر چلنا ہو گا۔ ایک سوال کے جواب میں انہوں نے کہا کہ اگر آل پارٹیز کانفرنس کسی کی ذات کیلئے بلانی ہے تو اس کا کوئی فائدہ نہیں ہو گا، سب جماعتوں کو ملک کے مفاد کیلئے اکٹھا ہونا چاہئے۔ انہوں نے کہا کہ الیکشن رزلٹ ٹھیک آئے ہیں، منفی پروپیگنڈا کرنے والوں کو ناکامی ہو گی، عوام نے ملک کے بہتر مستقبل اور مضبوط و خوشحال پاکستان کیلئے ووٹ دیئے ہیں، پاکستان مسلم لیگ کسی شخصیت کے ساتھ نہیں بلکہ ملک کو درست سمت میں لے جانے والوں کے ساتھ چلے گی۔

(جاری ہے)

چودھری شجاعت حسین نے الیکشن ڈیوٹی کے دوران شہید ہونے والے فوجی اور پولیس اہلکاروں کو خراج عقیدت پیش کرتے ہوئے کہا کہ پوری قوم دشمن قوتوں کو شکست دینے کیلئے انشاء اللہ ہمیشہ متحد رہے گی۔علاوہ ازیں مبارکباد دینے کیلئے آنے والے بڑے اجتماع سے خطاب کرتے ہوئے انہوں نے کہا کہ ہمارے مخالفین طرح طرح کی باتیں کرتے رہے لیکن ہم گجرات سے چار نشستوں پر کامیاب ہوئے ہیں، چودھری پرویزالٰہی پی پی 30 سے بھی بھاری لیڈ سے جیتے ہیں۔

چودھری پرویزالٰہی نے اپنے خطاب میں کہا کہ ہمیں اللہ کے کرم سے کامیابی حاصل ہوئی، ہم تمام ووٹرز اور کارکنوں کا دلی طور پر شکریہ ادا کرتے ہیں، چودھری ظہورالٰہی کی شہادت کے بعد اہل گجرات نے ہمارا ہاتھ پکڑا، دعا ہے کہ ہم عوامی خدمت کا سلسلہ جاری رکھ سکیں۔ اس موقع پر شافع حسین، میاں عمران مسعود، میاں ہارون مسعود، چودھری اعجاز، چودھری اظہر، چودھری مظہر اقبال کے علاوہ مسلم لیگی رہنما بڑی تعداد میں موجود تھے۔