عام انتخابات 2018، لاہور کے تمام حلقوں کے نتائج سامنے آگئے

مسلم لیگ ن قومی اسمبلی کی 9 جبکہ تحریک انصاف لاہور سے قومی اسمبلی کی 4 نشستوں پر فتح حاصل کر پائی

جمعہ 27 جولائی 2018 00:19

لاہور(اُردو پوائنٹ اخبار آن لائن۔ جمعرات 26 جولائی 2018ء)پاکستان تحریک انصاف نے لاہور کی قومی اسمبلی کی 14نشستوں میں سے 3پر کامیابی حاصل کر لی، صوبائی اسمبلی کی 8سیٹوں پر بھی پاکستان تحریک انصاف کے امیدوار کامیاب ہوئے ۔ 2013کے انتخابات میں پی ٹی آئی لاہور سے قومی اسمبلی کی صرف ایک نشست پر کامیاب ہوئی تھی ۔

تفصیلات کے مطابق گزشتہ روز ہونے والے پاکستان کے دسویں عام انتخابات کے سلسلے میں غیر سرکاری غیر حتمی نتائج آنے کا سلسلہ جاری ہے۔ پنجاب کے دارالحکومت لاہور کی تمام 13 قومی اسمبلی کی نشستوں کے نتائج بھی سامنے آگئے ہیں۔ موصول ہونے والے غیر سرکاری اور غیر حتمی نتائج کے مطابق مسلم لیگ ن لاہور سے 9 جبکہ تحریک انصاف 4 نشستوں پر فتح حاصل کر پائی ہے۔

(جاری ہے)

اس سے قبل امکان ظاہر کیا جا رہا تھا کہ تحریک انصاف لاہور سے 7-8 نشستیں حاصل کرنے میں کامیاب رہے گی۔ دوسری جانب اب تک موصول ہونے والے غیر سرکاری غیر حتمی نتائج کے مطابق تحریک انصاف باآسانی وفاقی حکومت بنانے کی پوزیشن میں آگئی ہے۔ اب تک تحریک انصاف کو 119 قومی اسمبلی کی نشستوں پر برتری حاصل ہے۔ انتخابات میں اکثریت حاصل کرنے کے بعد جمعرات کے روز تحریک انصاف کے سربراہ عمران خان کی جانب سے قوم سے خطاب بھی کیا گیا۔

اپنے خطاب کے دوران عمران خان نے قوم سے اپنے منشور پر عمل کرنے کا وعدہ کیا۔ دوسری جانب گزشہ شب سے عمران خان کی اسلام آباد میں بنی گالہ رہائش گاہ میں حکومت سازی کے حوالے سے مشاورت بھی جاری ہے۔ خاص کر وفاقی کابینہ کی تشکیل کے حوالے سے تفصیلی تبادلہ خیال کیا جا رہا ہے۔ تحریک انصاف کے اکثر مرکزی رہنما اس وقت بنی گالہ میں موجود ہیں۔

اب ذرائع سے موصول ہونے والی تفصیلات کے مطابق تحریک انصاف کی وفاقی حکومت کی کابینہ کے کچھ لوگوں کے نام بھی سامنے آئے ہیں۔ واضح امکان ہے کہ شاہ محمود قریشی کو وزیر خارجہ، شفقت محمود یا عارف علوی کو اسپیکر قومی اسمبلی جبکہ شیریں مزاری کو وزیر دفاع بنائے جانے کا امکان ہے۔ جبکہ کابینہ کے مزید لوگوں کیلئے بھی متعدد ناموں پر غور جاری ہے۔

اسد عمر کے حوالے سے بھی فیصلہ کیا گیا ہے کہ انہیں وزارت خزانہ کا قلمدان سونپا جائے گا۔ جبکہ کچھ نوجوان رہنماوں کو بھی کابینہ کا حصہ بنایا جا سکتا ہے۔ دوسری جانب تحریک انصاف اور آزاد امیدواروں کے درمیان بھی معاملات طے پا رہے ہیں۔ ذرائع کے مطابق اب تک کل 14 آزاد امیدوار قومی اسمبلی کی نشستوں پر جیتنے کی پوزیشن میں ہیں۔ ان 14 آزاد امیدواروں میں سے 14 آزاد امیدوار تحریک انصاف میں شامل ہونے کی تیار ہو گئے ہیں۔ تاہم تحریک انصاف کی کوشش ہے کہ آزاد امیدوار بنا کسی شرائط کے حکومت کا حصہ بنیں۔