Khawab Main Raasta Dekhna - Islamic Khawab ki Tabeer

حضرت ابن سیرین رحمتہ اللہ تعالیٰ علیہ نے فرمایا ہے کہ خواب میں رستہ دیکھنا استقامت اور دینداری کی دلیل ہے ۔ اور راہ دین میں راستی کی تلاش ہے ۔ اگر دیکھے کہ سڑک پر چلا جاتا ہے۔دلیل ہے کہ دین کے رستے پر ہے ۔ اور اگر دیکھے کہ ایک جماعت کی رہبری راہ راست پر کرتا ہے ۔ دلیل ہے کہ کسی قوم کو راہ راست اور صلاح دین پر لگائے گا ۔ اور اگر دیکھے کہ رستے میں حیران اور پریشان ہے ۔ دلیل ہے کہ دین کی راہ یا دنیا کے کام میں حیران اور پریشان ہو گا ۔ اور اگر دیکھے کہ چور اس کے سامان کو راستے سے لے گئے ہیں ۔ دلیل ہے کہ جس قدر لے گئے ہیں ۔ اسی قدر کسی کا تاوان ادا کرے گا ۔ اور اگر دیکھے کہ رستی چلتا ہے تھکتا نہیں ہے ۔ دلیل ہے کہ اپنا حق کسی سے مشکل کے ساتھ لے گا ۔ اور اگر دیکھے کہ کوئی اس کو راہ راست سے ٹیڑھے رستے پر لے گیا ہے ۔

(جاری ہے)

دلیل ہے کہ گناہ میں مشغول ہو گا اور ثواب کے رستے سے دور ہو گا ۔

اور اگر دیکھے کہ اندھیری رات میں چلتا ہے اور رستہ اس پر مشکل ہے ۔ اور اس کو گمان ہے کہ راہ راست پر ہے ۔ دلیل ہے کہ استقامت اور رہ راست پائے گا ۔ اور اگر بہت سے رستے دیکھے اور معلوم نہیں کہ کس راستے جانا ہے ۔ دلیل ہے کہ اپنے دین میں حیران ہو گا او ر بد دین لوگوں سے صحبت رکھے گا ۔ اور اگر دیکھے کہ اس پر رستہ مشکل ہے اور نہیں جانتا ہے کہ کہاں جاتا ہے ۔ اور آنحضرت صلی اللہ تعالیٰ علیہ وآلہ وا صحابہ و سلم کے فرمان کے مطابق دائیں ہاتھ کی طرف چلا تو دلیل ہے کہ راہ حق اس پر پوشیدہ ہو گا ۔ اور اگر جان بوجھ کر راہ راست سے ایک طرف کو چلا گیا ہے ۔ دلیل ہے کہ دشمن سے مکر اور حیلہ کرے گا ۔ اور اگر دیکھے کہ راہ راست پر چلتا ہے اور کسی کی عزت کی وجہ سے لوٹا ہے ۔ دلیل ہے کہ ایسا کام کرے گا کہ جس سے دین کو نقصان ہوگا ۔ اور اپنی عیش کے لیے محال باتوں میں مشغول ہو گا ۔ اور اگر دیکھے کہ رستے پر چلتا ہے اور کوئی عورت سامنے آئی ہے اور اس کی وجہ سے رستہ چھوڑ کر دوسری طرف چلا گیا ہے ۔ دلیل ہے کہ اس کے دین میں خلل پڑے گا اور دنیا پر فریفتہ ہو گا ۔ حضرت جابر مغربی رحمتہ اللہ تعالیٰ علیہ نے فرمایا ہے ۔ اگر دیکھے کہ اس کے رستے میں سبزی اور اچھے اچھے پودے ہیں ۔ تو یہ اس کی نیکی اور دین کے پاک ہونے پر دلیل ہے ۔ اور اگر دیکھی کہ کسی پوشیدہ راستے پر گمان کے ساتھ چلتا ہے ۔ دلیل ہے کہ دین میں بدعت کرے گا یا اپنے کام میں حیران ہو گا ۔ فرمان حق تعالیٰ ہے ۔ ان ھذا صراطی مستقیما فاتبعوہ(یہ میرا سیدھا راستہ ہے ۔ اس کی پیروی کرو) اور اگر دیکھے کہ کسی راستے پر سے لے گیا ہے ۔ تو یہ اس کے دین کے فساد کی دلیل ہے ۔ فرمان حق تعالیٰ ہے ۔ و قد خاب من سھا(جس نے اس کو پامال کیا وہ خسارے میں پڑا) حضرت اسماعیل اشعت رحمتہ اللہ تعالیٰ علیہ السلام نے فرمایا ہے ۔ کہ خواب میں سیدھا راستہ اسلام ہے اورٹیڑھا راستہ اس کی خلاف ہے ۔ حضرت جعفر صادق علیہ السلام نے فرمایا ہے کہ خواب میں راستہ دیکھنا پانچ وجہ پر ہے ۔ (۱)دنیا (۲)آرام (۳)نیک کام (۴)خیرو برکت(۵)آسانی اور رحمت۔