بلوچستان میں شدید بارشوں کے باعث ہلاکتوں کی تعداد 22 ہوگئی

کوئٹہ /اسلام آباد(اُردو پوائنٹ اخبارتازہ ترین - این این آئی۔ 28 اپریل2024ء) بلوچستان کے دارالحکومت کوئٹہ سمیت مختلف اضلاع میں گرچ چمک کے ساتھ موسلا دھار بارش اور ژالہ باری کے دوران مختلف حادثات میں ہلاکتوں کی تعداد 22 ہوگئی۔تفصیلات کے مطابق گزشتہ روز وادی کوئٹہ میں دن بھر موسلا دھار بارش، گرج چمک کے ساتھ موسلا دھار بارش اور ژالہ باری ہوئی جس کے نتیجے میں مرکزی سڑکیں اور گلیوں میں پانی بھر گیا۔

سیلابی ریلے میں متعدد مکانات بہہ گئے جس کے باعث مختلف علاقوں میں بڑے پیمانے پر ٹریفک بلاک ہوگئی۔ایران سے مائع پیٹرولیم گیس لے جانے والا بڑا ٹینکر ضلع نوشکی میں کوئٹہ تفتان ہائی وے کے سیلابی پانی میں ڈوبنے سے الٹ گیا اور ندی میں گر گیا، سیلاب کے تیز بہاؤ نے ٹینکر مرکزی شاہراہ سے دور دھکیل دیا، جس سے ڈرائیور ٹینکر پر کنٹرول نہ رکھ سکا اور وہ بھی ندی میں جا گرے تاہم ڈرائیور اور گاڑی میں موجود دیگر افراد جان بچانے میں کامیاب رہے۔

(جاری ہے)

دریائے بولان، دریائے ناری گج مولا اور دیگر موسمی دریا میں سیلابی پانی کا تیز بہاؤ رہا کیونکہ جن علاقوں سے یہ نکلتے ہیں وہاں بھی شدید بارشیں ہو رہی تھیں۔زیارت، کوئٹہ، قلات، کان مہترزئی، پشین اور شمالی بلوچستان کے کچھ دیگر علاقوں میں درجہ حرارت گر گیا، لوگ اپنے گھروں کو گرم رکھنے اور گرم کپڑے پہننے کے لیے گیس کے ہیٹر آن کرنے پر مجبور ہوگئے۔

زیارت، پشین، قلعہ عبداللہ، قلعہ سیف اللہ، ڑوب، شیرانی، خانوزئی، ہرنائی، سبی، مستونگ، قلات، خضدار، جھل مگسی، ڈیرہ مراد جمالی، خاران، چاغی، نوشکی، واشوک، چمن، مچھ اور دیگر کئی علاقوں میں بھی شدید بارش ہوئی۔صوبائی دارالحکومت جو بارشوں کے گزشتہ دو وقفوں کے دوران بری طرح متاثر ہوا تھا، ایک بار پھر سیلاب کی نذر ہوگیا، رات بھر ہونے والی موسلا دھار بارش نے نہ صرف نشیبی علاقوں میں بلکہ کوئٹہ کے اہم علاقوں میں بھی بڑے پیمانے پر تباہی مچا دی۔

جناح روڈ، قندھاری بازار، لیاقت روڈ، پرنس روڈ، زرغون روڈ، سرکی روڈ اور گوالمنڈی سمیت مرکزی شہر کی تقریباً تمام سڑکیں بارش کے پانی میں ڈوب گئیں ادھر محکمہ موسمیات نے کوئٹہ سمیت بلوچستان کے مختلف علاقوں میں گرج چمک کے ساتھ مزید بارش کی پیشگوئی کی ہے۔دوسری جانب محکمہ موسمیات نے ملک کے بڑے حصے میں گرج چمک کے ساتھ طوفانی بارشوں اور آندھی چلنے کی پیشگوئی کی ہے، موسم کا حال بتانے والے ادارے کے مطابق لاہور سمیت پنجاب کے بیشتر اضلاع میں بارش کے ساتھ ژالہ باری کا امکان ہے اس کے علاوہ اسلام آباد اور گرد ونواح میں بھی آندھی اور بارش کا امکان ہے، خیبر پختونخوا، گلگت بلتستان اور کشمیر کے مختلف حصوں میں میں آندھی چلنے اور گرج چمک کے ساتھ طوفانی بارش اور ژالہ باری کی توقع ہے۔

محکمہ موسمیات کے مطابق ملک کے مختلف حصوں کے برعکس کراچی میں رواں ہفتے بھی گرمی کا راج رہے گا، کراچی میں رواں ہفتے گرمی کی شدت میں مزید اضافہ ہونے کا امکان ہے۔اس کے علاوہ صوبائی ڈیزاسٹر منجمنٹ اتھارٹی نے بارشوں کے باعث خیبر پختونخوا میں جانی و مالی نقصانات کی رپورٹ جاری کردی۔رپورٹ میں بتایا گیا کہ صوبے میں دیواریں، چھتیں اور آسمانی بجلی گرنے سے ایک گھر کو مکمل ،13 گھروں کو جزوی نقصان پہنچا، جانی و مالی حادثات صوبہ کے مختلف اضلاع باجوڑ ، بٹگرام، مانسہرہ، بونیر، اپر اور لویر دیر میں رونما ہوئے۔

رپورٹ کے مطابق صوبے میں تمام شاہراہیں اور لنک روڈز ہر قسم کی ٹریفک کیلئے کھلے ہیں، بارشوں کا سلسلہ 30 اپریل تک وقفے وقفے سے جاری رہنے کا امکان ہے۔مظفرآباد کی وادی نیلم میں وقفے وقفے سے جاری برفباری سے ہر شے نے سفیدی کی چادر اوڑھ لی،بالائی علاقوں شاردہ ، کیل ،گریس ویلی میں ایک سی3انچ سے زائد برف باری ریکارڈ کی گئی،شاہراہِ نیلم لینڈ سلائیڈنگ کی وجہ سے مکمل مقامات پر بند ہوگئی،ڈپٹی کمشنر نیلم نے شہریوں اور سیاحوں کو غیرضروری سفر نہ کرنے کی ہدایات کردی۔