معاشی دہشت گردی پر قابو پانے کیلئے فوری اقدامات اٹھائے جائیں‘ محمد ناصر حمید خان

جمعرات 27 جولائی 2017 16:59

لاہور (اُردو پوائنٹ اخبارتازہ ترین - این این آئی۔ 27 جولائی2017ء)لاہور چیمبر آف کامرس اینڈ انڈسٹری کے نائب صدر محمد ناصر حمید خان نے کہا ہے کہ جس طرح حکومت اور پاک فوج مل کر دہشت گردی کا قلع قمع کررہے ہیں اسی طرح حکومت معاشی دہشتگردی کا بھی خاتمہ کرے جس نے صنعتی، تجارتی اور معاشی سرگرمیوں کو یرغمال بنارکھا ہے۔ ایک بیان میں محمد ناصر حمید خان نے کہا کہ حکومت اور پاک فوج مل کر دہشت گردی کے خاتمے کے لیے بہترین اقدامات اٹھارہے ہیں اور اس حوالے سے ہر فورم پر انہوں نے بے لچک موقف اختیار کیا ہے ۔

انہوں نے کہا کہ اس دہشت گردی کے ساتھ ساتھ معاشی دہشت گردی کا خاتمہ کرنا بھی ضروری ہے کیونکہ وہ معاشی عمارت کی جڑیں کھوکھلا کررہی ہے، اگر فوری اقدامات نہ اٹھائے گئے تو یہ عمارت زمین بوس ہوجائے گی۔

(جاری ہے)

لاہور چیمبر کے نائب صدر نے کہا کہ پاکستان کو تاریخ کے بلند ترین تجارتی خسارے کا سامنا ہے جبکہ برآمدات زوال پذیر ہیں، غیرملکی سرمایہ کار پاکستان میں سرمایہ کاری سے محتاط ہیں ،صنعتی شعبے کو زیادہ پیداواری لاگت سمیت بہت سے مسائل کا سامنا ہے جبکہ تاجر برادری کو صوابدیدی اختیارات کے ناجائز استعمال اور بینک اکائونٹس تک رسائی جیسے معاملات نے پریشان کررکھا ہے۔

محمد ناصر حمید خان نے کہا کہ معاشی دہشتگردی کا خاتمہ کرکے حکومت عالمی سطح پر زیادہ مضبوطی حاصل اور پاکستان مخالف عناصر کا زیادہ موثر انداز میں خاتمہ کرسکتی ہے۔ انہوں نے کہا کہ تجارتی خسارے میں اضافے اور برآمدات میں تشویشناک کمی جیسے مسائل کو نظرانداز کرتے رہنا بہت نقصان دہ ثابت ہوسکتا ہے لہذا ان پر فوری قابو پایا جائے، صنعتوں کی پیداواری لاگت میں کمی لا اور ضروری سہولیات مہیا کرکے حکومت درآمدات اور برآمدات کے درمیان عدم توازن پر قابو پاسکتی ہے۔ اسی طرح دیگر ممالک میں پاکستانی سفارتخانوں کو فعال کرکے برآمدات کو فروغ دیا جاسکتا ہے۔