شہرقائد میں 12سے 14گھنٹوں کی بجلی کی لوڈشیڈنگ جاری ہے، ایازمیمن

بدھ 15 مئی 2024 18:50

کراچی (اُردو پوائنٹ اخبارتازہ ترین - این این آئی۔ 15 مئی2024ء) آل کراچی تاجر الائنس ایسوسی ایشن کے چیئرمین ایاز میمن موتی والا نے شہرقائدمیں شدید گرمی کے دوران کے الیکٹرک کی جانب سے مختلف علاقوںمیں بجلی کی لوڈشیڈنگ کے دورانئے میں اضافے پرتشویش کااظہارکرتے ہوئے کہا ہے کہ کراچی میں بارہ بارہ گھنٹے کی لوڈشیڈنگ بھی کی جارہی ہے جس سے شہری شدید اذیت کا شکار اور حبس و جھلسا دینے والی گرمی کی وجہ سے مختلف امراض کا شکار ہورہے ہیں، کچھ اضلاع میں تو 12سے لیکر15گھنٹوں کی بھی اعلانیہ و غیر اعلانیہ لوڈشیڈنگ کی جارہی ہے ، ان خیالات کااظہارانہوںنے اپنے جاری کردہ بیان میں کیا، ایازمیمن موتی والا نے کہا کہ بجلی کی بے انتہا لوڈشیڈنگ نے کاروبار ی طبقے کو بھی بری طرح متاثرکیا ہے کئی کئی گھنٹوں کی لوڈشیڈنگ کی وجہ سے کارخانوں اور فیکٹریوںمیں پروڈکشن اور تجارتی مراکز میں کاروباری سرگرمیاں نہ ہونے کے برابر ر ہ گئی ہیں، ایکسپورٹرز شدید مشکلات کا شکار ہیں کلائنٹس کے آرڈر پورے نہیں ہورہے جبکہ بجلی کے بلوں میںکسی بھی طرح کی کوئی کمی نہیں آرہی ہے بارہ بارہ گھنٹے کی لوڈشیڈنگ کے باوجود بھی بجلی کے بل پہلے سے بھی زیادہ آرہے ہیں، انہوںنے کہ کراچی پورے پاکستان کا واحد شہر ہے جہاں بجلی نہیں ہوتی لیکن بل بھاری بھاری اور موٹے موٹے آتے ہیں ، شہرقائدمیں لوگوں سے فی یونٹ 50روپے سے بھی اوپر چارج کیا جارہا ہے کراچی تمام اضلاع میں لوڈشیڈنگ کی جارہی ہے ملیر، گلشن، سرجانی ، اورنگی، کورنگی، لیاری ، ناظم آباد، اسکیم 33، گلستان جوہر ، گلشن حدید ، انڈسٹریل ایریاز سمیت کلفٹن میں بھی مختلف علاقوںمیں لوڈشیڈنگ جاری ہے، انہوں نے کہا کہ کراچی میں میٹرک بورڈ کے امتحانات جاری ہیں اور امتحانات کے دوران بھی مختلف امتحانی سینٹرز میں لوڈشیڈنگ کی اطلاعات موصول ہورہی ہیں، کے الیکٹرک کی نا اہلی، ناقص کارکردگی اور منصوبہ بندی نے تاریکیوں کو کراچی کا مقدر بنا دیا ہے کے الیکٹرک بے لگا م گھوڑ ا بن گیا ہے جس کے سامنے تمام حکومتیں بھی بے بس ہیں ایسا لگتا ہے کہ حکومت نے کراچی کے شہریوں کو کے الیکٹرکے رحم و کرم پر چھوڑ دیا ہے، انہوںنے مزید کہا کہ کراچی پاکستان کا اہم ترین شہر ہے جو سب سے زیادہ ٹیکسز دیتا ہے اگر اس پر توجہ نہ دی گئی اور مسائل کو حل نہ کیا گیا تو اس کے اثرات پورے پاکستان پر مزید مہنگائی، بیروزگاری اور معاشی مشکلات کی صورت میں سامنے آئیں گے۔