کشمیر اقوام متحدہ کی قراردادوں کے مطابق متنازعہ مسئلہ ہے٬ آٹھ لاکھ بھارتی فوج کشمیر میں بدترین ظلم و ستم ڈھا رہی ہے‘حافظ محمد سعید

لاہور(اُردو پوائنٹ اخبارتازہ ترین - این این آئی۔ 17 اکتوبر2016ء) سابق وزیر اعظم آزاد کشمیر و مسلم کانفرنس کے سربراہ سردار عتیق احمد خان نے جماعة الدعوة کے سربراہ پروفیسر حافظ محمدسعید سے ملاقات کی جس میں کشمیریوں کی تحریک آزادی٬بھارتی مظالم اور دیگر امور پر گفتگو کی گئی۔مرکز القادسیہ چوبرجی میں ہونے والی ملاقات میں جماعة الدعوة کے مرکزی رہنما یحییٰ مجاہد٬حافظ خالد ولید بھی موجود تھے۔

اس موقع پر پروفیسر حافظ محمد سعید نے کہا کہ کشمیر اقوام متحدہ کی قراردادوں کے مطابق متنازعہ مسئلہ ہے۔ آٹھ لاکھ بھارتی فوج کشمیر میں بدترین ظلم و ستم ڈھا رہی ہے۔ کشمیریوں کے گھروں میں گھس کر خواتین کی عصمتیں تار تار کی جارہی ہیں۔سینکڑوں نوجوانوں کی آنکھیں ضائع ہو چکی ہیں ۔

(جاری ہے)

کشمیر کا مسئلہ عوامی سطح پر اٹھانے کی ضرورت ہے تاکہ حکومت اس مسئلہ کو ٹھنڈا نہ ہونے دے۔

انہوں نے کہا کہ آج کشمیر میں آزادی کی جنگ لڑنے والوں کو دہشت گردی قراردیا جارہا ہے۔ ہمیں اپنا موقف دنیا کو سمجھانا ہے ۔ ہمیں حالات کے رخ کو نہیں دیکھنا بلکہ یہ دیکھنا ہے کہ ہمیں حالات کو کس رخ پر لے کر جانا ہے۔ کشمیریوں کا حق بہت زیادہ ہے۔ طلباء نے آزادی کی خاطر امتحانات دینے سے انکار کر دیا۔ کرفیو کی وجہ سے تمام کاروبار بند ہے۔

انہوںنے کہاکہ آسیہ اندرابی سمیت پوری حریت قیادت گرفتار ہے۔ خوفناک مقدمات بنائے جارہے ہیں۔حکومت کو ان گرفتاریوں کی مذمت کرنی اور اس مسئلہ کو پوری قوت سے اٹھانا چاہیے۔کشمیر کی جیلوں میں جگہ ختم ہے۔ انڈیا کی جیلیں کشمیریوں سے بھری جارہی ہیں۔ اس سلسلہ میں مضبوط مئوقف دنیا کے سامنے پیش کیا جانا چاہیے ۔انہوں نے کہا کہ کشمیری پاکستان کے جھنڈے اٹھا کر کھڑے اور کلمہ طیبہ کے نعرے لگا رہے ہیں۔

پاکستانی پرچم میں شہداء کو دفن کر رہے ہیں۔تحریک آزادی کشمیر کو نتیجہ خیز بنانے کیلئے عملی اقدامات کرنے چاہئیں۔ مسلم کانفرنس کے سربراہ ٬سابق وزیر اعظم آزاد کشمیر سردار عتیق احمد خان نے کہا کہ اس وقت ہندوستان کا سارا دبائو سری نگر میں ہے۔ہمیں یہ دبائوکشمیر کے دوسرے حصوں میں بھی بڑھانا ہو گا۔ کشمیریوں کو حق خودارادیت سے کوئی محروم نہیں رکھ سکتا۔

اقوام متحدہ اپنی قراردادوں پر عملدرآمد کروائے٬ نہتے اور معصوم کشمیریوں کے ساتھ بھارتی فورسز خون کی ہولی کھیل رہی ہیں۔ سرینگر میں کشمیر بنے گا پاکستان کے نعروں سے بھارت بوکھلاہٹ کا شکار ہے۔انہوں نے کہا کہ پاکستان میں دو قسم کی لابی موجود ہیں ایک لابی پاکستان کو پاکستان کے نقطہ نظر سے اور دوسری پاکستان کو ہندوستان کے نقطہ نظر سے دیکھتی ہے۔

انتہائی افسوس کی بات ہے کہ ہمارے ہاں فیشن ہو گیا ہے کہ ایسی زبان بولی جائے جس سے بھارت کو اچھا پیغام جائے۔انہوں نے کہا کہ حافظ محمد سعید کو تمام عدالتوں نے طویل قانونی جنگ کے بعد بری کیاہے۔ان پر کوئی الزام ثابت نہیں کر سکا۔انڈیا کی طرف سے الزامات لگائے جاتے ہیں جو فرضی سرجیکل سٹرائیک کرنے والا ملک ہے۔دنیا میں سب سے زیادہ انتہا پسند بھارت میں پائے جاتے ہیں۔

لوگ بابری مسجد٬گولڈن ٹیمپل ٬سانحہ گجرات کو کیوں بھول گئے٬انتہا پسند ہندو تنظیموں نے مسلمانوں کا جینا محال کر رکھا ہے اس پر کیوں خاموش ہیں۔انہوں نے کہا کہ حکومت نے کشمیر کے حوالہ سے جو وفد بیرون مماک بھیجے وہ شرمندگی کا باعث بنے ہیں۔انہوں نے کہا کہ بھارت پوری دنیا میں سے صرف ایک شخص حافظ سعید سے ڈرتا ہے میں انہیں خراج تحسین پیش کرتا ہوں۔

حافظ سعید ملک کا عظیم سرمایہ ہیں۔انکی سماجی خدمات کسی سے ڈھکی چھپی نہیں۔سندھ و بلوچستان کے دور دراز علاقوں میں 70سالوں سے جہاں حکومت پانی نہیں پہنچا سکی حافظ سعید کی جماعت وہاں کنویں بنا رہی ہے۔پاکستان میں بھارتی زبان بولنے والا فیشن ختم ہونا چاہئے۔انہوں نے کہا کہ حافظ محمد سعید نے کشمیر اور پاکستان کے اندرونی و بیرونی محاذ پر بے پناہ قربانیاں دی ہیںہم انہیں خراج تحسین پیش کرتے ہیں۔