روشنیوں کا شہر اندھیرے اور پانی کی لپیٹ میں

پاکستان کا سب سے بڑا شہر کراچی جسے روشنیوں کا شہر بھی کہا جاتا ہے گزشتہ کچھ سالوں سے اندھیروں میں ڈوب چکا ہے ایک ایسے وقت میں جب کراچی کے رہائشی بجلی کے بحران کی وجہ سے سراپا احتجاج تھے کراچی کے باسیوں کا کہنا تھا کہ گرمی کی شدت کے دوران لوڈ شیڈنگ نے ان کی زندگی اجیرن کر رکھی ہے اور کرونا وائرس کی وجہ سے صنعتی سرگرمیاں بند ہونے کے باوجود رہائشی علاقوں میں تقریبا آٹھ گھنٹے کی لوڈشیڈنگ معمول بن چکی تھی گرمی کے ستائے لوگ مالک حقیقی سے التجا کر رہے تھے کہ اے ہمارے رب گرمی کی اسں شدت سے ہمیں نجات عطا فرما اور بارش کی صورت میں ہم پر اپنی رحمت نازل فرما چونکہ اللہ کے ہاں دیر ہے اندھیر نہیں جولائی کے شروعاتی دنوں میں کراچی میں رحمت کے بادل برسنا شروع ہوئے بارش کی وجہ سے گرمی کا زور ٹوٹ گیا پہلے پہل تو کراچی کے باسی بارش پر مسرت کا اظہار کر رہے تھے لیکن جیسے جیسے بارش کا دورانیہ بڑھتا گیا گاڑیاں کشتیوں میں اور سڑکیں اور گھر تالابوں میں تبدیل ہونے لگے اموات کا سلسلہ بارش ہونے کے باوجود نہیں تھم  سکا  کیونکہ پہلے لوگ گرمی کی شدت کے سبب مر رہے تھے تو اب بارش کی وجہ سے مختلف واقعات میں لوگ اپنی جانوں سے ہاتھ دھو بیٹھے ہیں جہاں پہلے آٹھ گھنٹے کی لوڈشیڈنگ تھی اب بارش کے سبب بجلی کے فیڈر متاثر ہونے کی وجہ سے 80 فیصد علاقوں کو بجلی کی فراہمی معطل ہو گئی
جب زیادہ بارش آتا ہے تو زیادہ پانی آتا ہے کی تھیوری پیش کرنے والے آئن سٹائن ثانی کی بہن نے حیران کن طور پر پانی کی نکاسی پر سندھ حکومت کا شکریہ ادا کیا آئن سٹائن ثانی کی بہن کا اپنی ٹویٹ میں کہنا تھا کہ "جب بارش آتی ہے تو پانی آتا ہے ساری رات سڑکوں کی نگرانی کرنے پر سندھ حکومت کا شکریہ ادا کرتی ہوں ان کا مزید کہنا تھا کہ آج سب صاف ہو گیا بد قسمتی سے ہم برساتی مینڈکوں کے مسائل حل نہیں کر سکتے جو بارش ہوتے ہی نکل آتے ہیں" لیکن اب اس خاندان کو کون یہ بات باور کروائے کہ جب زیادہ پانی آتا ہے تو اربن فلڈنگ ہوتی ہے اور جب اربن فلڈنگ ہوتی ہے تو بجلی کی فراہمی معطل ہو جاتی ہے اور بدبودار پانی لوگوں کے گھروں میں داخل ہو جاتا ہے اور جن لوگوں کے ٹیکسوں پر تم لوگ پلتے ہو ان کی زندگی اجیرن ہو جاتی ہے
لیکن پانی کے لئے ترستے کراچی کے باسیوں کے لیے آئن سٹائن ثانی نےجو انوکھا منصوبہ تیار کر رکھا تھا وہ یہ تھا کہ لوگوں کو گھروں گاڑیوں اور سڑکوں پر کئی کئی فٹ تک پانی مہیا کیا گیا اب جب سب لوگوں کو گھروں سے نکلتے ہی گردنوں تک پانی دستیاب ہے تو پانی کے بحران کے شکوے کا تو کوئی جواز ہی نہیں بنتا نالوں کے پانی کی نکاسی کے لئے بھی انوکھی منصوبہ بندی کی گئی ہے سندھ حکومت نے نالوں کے پانی کی نکاسی کے لئے لوگوں کے گھروں کا انتخاب کیا ہے اور شاہراہوں پر ٹریفک جام کے مسئلہ کو مدِ نظر رکھتے ہوئے پانی کی ایک بڑی مقدار کو گاڑیوں اور رکشوں کی راہ دکھائی گئی ہے تاکہ پانی گاڑیوں اور رکشوں کو بہا لے جائے اور مستقبل قریب میں ٹریفک جام کا مسئلہ نہ ہو
وزیر بلدیات سندھ ناصر حسین شاہ کا کہنا تھا کہ نالوں میں طغیانی کی وجہ کرونا وائرس ہے لیکن محترم سے کوئی یہ پوچھے کہ کرونا وائرس سے پہلے بھی تو کراچی میں پانی کی نکاسی کا مسئلہ رہا ہے جب کرونا وائرس کا نام و نشان تک نہیں تھا آخر کب تک سندھ کی عوام کو لوریاں دیتے رہو گے آپ لوگ؟ اور وزیر بلدیات ناصر حسین شاہ صاحب اگر جان کی امان پاؤں تو کچھ عرض کروں کہ اگر فرقہ واریت کو فروغ دینے کے لیے کرونا وائرس کے دوران آپ جلوس کی نمائندگی کر سکتے ہو تو پھر کرونا وائرس میں نالوں کی صفائی کیوں نہیں کروا سکتے؟
بہر حال بختاور بھٹو کا سندھ کی عوام کو برساتی مینڈک کہنا اخلاقیات کے منافی ہے کیونکہ یہی برساتی مینڈک الیکشن کے دوران آپ کے پیر و مرشد اور فرشتہ صفت انسان ہوتے ہیں انہی مینڈکوں کے ٹیکسوں پر آپ لوگ عیش و عشرت کی زندگی گزار رہے ہو اور بلاول ہاؤس اور سرِ محل کا خرچہ بھی یہی برساتی مینڈک اٹھا رہے ہیں
اب ضرورت اس اٙمر کی ہے کہ مستقبل قریب میں ہونے والے الیکشنز میں سندھ کی عوام ان کو باور کروا دے کہ وہ برساتی مینڈک ہیں یا پھر اشرف المخلوقات...!