پاک افغان جوائنٹ چیمبر آف کامرس اینڈ انڈسٹری کے زیر اہتمام اجلاس، کلکٹر کسٹمز اپریزمنٹ پشاور کی تاجروں کو درپیش مسائل کے حل کی یقین دہانی

پشاور (اُردو پوائنٹ اخبارتازہ ترین - اے پی پی۔ 02 فروری2023ء) کلکٹر کسٹمز اپریزمنٹ پشاور اشفاق احمد نے پاک افغان ٹرانزٹ ٹریڈ سے وابستہ تاجروں کو درپیش مسائل کے حل اور سرحدی چیک پوسٹوں پر سامان کی کلیئرنس کی رفتار کو تیز کرنے کے حوالے سے اقدامات کرنے کی یقین دہانی کرائی ہے۔ انہوں نے یہ یقین دہانی پاک افغان جوائنٹ چیمبر آف کامرس اینڈ انڈسٹری (پی اے جے سی سی آئی)کے زیر اہتمام اسٹیک ہولڈرز کے اجلاس سے خطاب کرتے ہوئے کرائی۔

اجلاس میں پاکستان اور افغانستان دونوں جانب کے تاجروں نے شرکت کی جنہوں نے دونوں ہمسایہ ممالک کے درمیان باہمی تجارت کی ہموار آمدورفت میں رکاوٹ کا باعث بننے والے مسائل پرتفصیلی بات چیت کی۔ پاکستان سے تاجروں کے وفد کی سربراہی کوآرڈینیٹروڈائریکٹر پی اے جے سی سی آئی ضیا الحق سرحدی اورسینئر نائب صدر خالد شہزادکر رہے تھے۔

(جاری ہے)

جبکہ افغان تاجروں کے وفد کی سربراہی ڈاکٹر مخلص کر رہے تھے۔

کلکٹر کسٹم کے ہمراہ ایڈیشنل کلکٹر ہیڈ کوارٹر افنان خان اور اسسٹنٹ کلکٹر کسٹم سٹیشن طورخم یاور حیات بھی موجودتھے۔ کلکٹر کسٹمز اپریزمنٹ پشاوراشفاق احمد نے کہا کہ محکمہ کسٹم کے حکام تاجر برادری کو درپیش تمام مسائل کے حل کے لیے اپنی پوری کوشش کریں گے، اگر کوئی مسئلہ ان کے دائرہ اختیار میں نہیں آتا ہے، تو وہ اسے مختلف محکموں بشمول اسٹیٹ بینک آف پاکستان، فیڈرل بورڈ آف ریونیو، وزارت تجارت، ریلوے وغیرہ کے متعلقہ حکام کے ساتھ اٹھائیں گے۔

کلکٹر کسٹمزاشفاق احمد نے مزید کہا کہ پاکستان اور افغانستان کے درمیان باہمی تجارت سے سرحد کے دونوں طرف ہزاروں افراد مستفید ہو رہے ہیں۔ کلکٹر کسٹمز نے کہا کہ وہ تجارتی برادری کو سہولیات فراہم کرنے کے لیے انگور اڈا جنوبی وزیرستان سمیت دیگر سرحدی چیک پوسٹوں پر بھی توجہ دے رہے ہیں۔ انہوں نے کہا کہ انگور اڈا میں انٹرنیٹ، بجلی، سامان کی سکیننگ، انفراسٹرکچر اور مواصلات سمیت سہولیات کے مسائل ہیں جنہیں جلد از جلد حل کرنے کی ضرورت ہے۔

ایک افغان تاجر کی طرف سے سامان کی کلیئرنس میں تاخیر کے بارے میں اٹھائے گئے نکتہ کے جواب میں اشفاق احمد نے اجلاس کے شرکا ءکو بتایا کہ ایک جدید سکینر کی خریداری کا عمل جاری ہے اور جلد ہی طورخم میں فزیکل چیکنگ بند ہو جائے گی جس سے سامان کی کلیئرنس میں تاخیرنہیں ہو گی۔ انہوں نے دونوں ممالک کے تاجروں سے بھی کہا کہ وہ کسی بھی مسئلے کو اٹھانے کے لیے آزادانہ طور پر ان سے رابطہ کریں اور کہا کہ ان کے دفتر کے دروازے ان کے لیے ہر وقت کھلے ہیں۔

پاکستان اور افغانستان دونوں جانب کے فریقین نے اقتصادی تعلقات کے مسائل اور امکانات کا تبادلہ کیاان اٹھائے گئے مسائل میں لیبر چارجز، افغان سائیڈ پر سامان کی لوڈنگ اور ان لوڈنگ کے دوران غلط طریقے سے استعمال ہونے والے مسائل بشمول ٹرانزٹ سامان پر ٹیکس، خالی کنٹینرز کی کلیئرنس کی سست شرح، کلیئرنس اور نقل و حرکت کے لیے بارڈر کراسنگ پر محدود گھنٹے، ویزا پروسیسنگ میں تاخیر شامل ہیں۔

پاک افغان جائنٹ چیمبرکی طرف سے خالی کنٹینرز کی سست کراس بارڈر کلیئرنس کی حالیہ شکایت کے جواب میں ایڈیشنل ڈائریکٹر ٹرانزٹ ٹریڈ نوید اطہرنے بتایا کہ گزشتہ چند دنوں میں اس سے نمٹا گیا ہے اور تمام بھیڑ یا بیک لاگ کو صاف کر دیا گیا ہے۔ ایوان نے مشترکہ طور پر اس بات پر اتفاق کیا کہ دو طرفہ کوششوں کی ضرورت ہے جس میں ویزہ کی سہولت، 24 گھنٹے سرحدی آپریشنز، باہمی طور پر متفقہ مستقبل کے طریقہ کار اور تجارت کو جاری رکھنے کو یقینی بنانے کے لیے قواعد شامل ہیں۔

پاک افغان جائنٹ چیمبر کے ڈائریکٹر ضیاءالحق سرحدی نے شرکاءکو آگاہ کیا کہ اس میٹنگ کا مقصد کاروبار کرنے میں درپیش مسائل پر بات چیت کرنا ہے۔ انہوں نے کہا کہ پاک افغان جائنٹ چیمبر کے پلیٹ فارم کے تحت ہونے والی اسٹیک ہولڈرز کے اجلاسوں نے مختلف مسائل کے حل میں بہت مدد کی ہے اور پاک افغان تجارت سے وابستہ لوگوں کو آسانی فراہم کی ہے۔ انہوں نے پاک افغان جائنٹ چیمبر کے چیئرمین محمد زبیر موتی والا کا بھی شکریہ ادا کیا کہ انہوں نے ان تمام سرگرمیوں کی نگرانی کی اور مسائل کو متعلقہ محکموں اور حکام کے ساتھ حل کرنے کے لیے اٹھائے۔