کشمیر سیاسی تنازعہ ،استصواب رائے کے ذریعے حل کیا جاسکتاہے ، حریت کانفرنس

سرینگر (اُردو پوائنٹ اخبارتازہ ترین - این این آئی۔ 02 جون2025ء)غیرقانونی طورپر بھارت کے زیر قبضہ جموں وکشمیرمیں کل جماعتی حریت کانفرنس نے تنازعہ کشمیر کے پرامن حل اور بی جے پی کی بھارتی حکومت کی طرف سے چھینے گئے بنیادی حقوق کی بحالی کیلئے کشمیریوںمیں اتحاد واتفاق کی ضرورت پر زور دیا ہے۔کشمیرمیڈیاسروس کے مطابق کل جماعتی حریت کانفرنس کے ترجمان ایڈووکیٹ عبدالرشید منہاس نے سرینگر میں حریت رہنمائوں کے اجلاس کے بعد جاری کردہ ایک بیان میں کہا کہ کشمیر ایک سیاسی تنازعہ ہے جس کو اقوام متحدہ کی نگرانی میں آزادانہ اور منصفانہ استصواب رائے کے ذریعے حل کرنے کی ضرورت ہے۔

حریت ترجمان نے کشمیر کے بارے میں پاکستان کے آرمی چیف فیلڈ مارشل سید عاصم منیر کے حالیہ بیان کو سراہتے ہوئے اسے حوصلہ افزاء اور حریت پسند کشمیری عوام کے لیے امید کی کرن قرار دیا۔

(جاری ہے)

دریں اثناء سول سوسائٹی کے اراکین نے سرینگر میں منعقدہ ایک اجلاس میں کشمیری سیاسی رہنمائوں اور کارکنوں کی مسلسل نظربندی کی مذمت کی اور انسانی حقوق کی تنظیموں سے اپیل کی کہ وہ اس کا فوری نوٹس لیں۔

انہوں نے کہاکہ امن کا واحد قابل عمل راستہ مذاکرات ہیں۔ادھر جیل میں نظربند سینئر حریت رہنما شبیر احمد شاہ کی زیر قیادت ڈیموکریٹک فریڈم پارٹی نے پاکستان پیپلز پارٹی کے چیئرمین بلاول بھٹو زرداری کی قیادت میں امریکہ کادورہ کرنے والے پاکستانی وفد پر زور دیا ہے کہ وہ امریکی حکام سے اپنی ملاقاتوں میں ہزاروں کشمیری سیاسی نظربندوں کا مسئلہ اٹھائے۔

ڈی ایف پی نے وفد کے نام ایک خط میں قید تنہائی اورقانونی حقوق سے محرومی سمیت کشمیری نظربندوں کو درپیش مظالم کو اجاگرکیا۔ امریکہ میں مقیم کشمیریوں اور پاکستانی سیاسی جماعتوں کے نمائندوں نے واشنگٹن میں وائٹ ہائوس کے باہر ایک ریلی نکالی جس میں مسئلہ کشمیر پر ثالثی کی پیشکش کرنے پر صدر ڈونلڈ ٹرمپ کا شکریہ ادا کیاگیا۔ شرکا ء نے پاک بھارت کشیدگی کو کم کرنے میں صدر ٹرمپ کے کردار کی تعریف کی۔

بارش کے باوجود شرکاء نے ریلی میں شرکت کی اور اقوام متحدہ کی قراردادوں کے مطابق تنازعہ کشمیر کو حل کرنے کا مطالبہ کیا۔ کل جماعتی حریت کانفرنس آزادکشمیر شاخ کے کنوینر غلام محمد صفی کی قیادت میں آزاد جموں و کشمیر کی وادی جہلم میں کنٹرول لائن کے قریب ’’پاکستان زندہ باد‘‘ ریلی نکالی گئی۔ ریلی کے شرکاء نے مقبوضہ کشمیرکی آزادی اور پاکستان کے ساتھ الحاق کیلئے اپنے عزم کا اعادہ کیا۔

ادھر بھارت اور دنیا بھرمیں مقیم سکھ امرتسر میں سکھوں کی مقدس ترین عبادت گاہ گولڈن ٹیمپل پر بھارتی فوج کے حملے کی 41ویں برسی منا رہے ہیں۔ یہ حملہ جس کا کوڈ کا نام’’آپریشن بلیو سٹار‘‘رکھا گیا تھا، سکھ برادری کے خلاف بھارتی ریاستی دہشت گردی کی واضح مثال ہے۔بھارتی فوج نی1984میں 2اور 10جون کے درمیان ٹینکوں اور توپ خانے کی مدد سے زائرین سمیت ہزاروں سکھوں کا قتل عام کیا اور گولڈن ٹیمپل کو ملبے کا ڈھیر بنا دیاتھا۔ چار دہائیوں سے زائد کا عرصہ گزر جانے کے باوجود سکھ برادری آج بھی انصاف کا مطالبہ کررہی ہے اور علیحدہ وطن خالصتان کے حصول کیلئے جدوجہد جاری رکھنے کے لئے پرعزم ہے۔