نواز شریف کی عمران خان سے ملاقات کی خبریں افواہیں ہیں، یہ کسی کی خواہش تو ہو سکتی ہے لیکن حقیقت نہیں، اسحاق ڈار

لاہور(اردوپوائنٹ اخبار تازہ ترین۔05جولائی 2025)نائب وزیراعظم ووزیر خارجہ اسحاق ڈار نے پاکستان مسلم لیگ (ن) کے سربراہ اورسابق وزیر اعظم نواز شریف کی بانی پی ٹی آئی عمران خان سے ملاقات کی خبریں پرکہا ہے کہ نواز شریف کی عمران خان سے ملاقات کی خبریں افواہیں ہیں، یہ کسی کی خواہش تو ہو سکتی ہے لیکن حقیقت نہیں،لاہور میں داتا دربار کے باہر میڈیا سے گفتگو کرتے ہوئے نائب وزیراعظم کاکہنا ہے کہ سپانسرڈ قسم کی خبریں پھیلائی جاتی ہیں۔

سب جماعتوں سے مل کر کام کرنا چاہتے ہیں۔بانی پی ٹی آئی کے حوالے سے قانون اپنا راستہ خود لے گا۔انہوں نے کہا کہ حقیقت کا اس سے کوئی تعلق نہیں۔ اگر کسی نے ماضی میں کچھ کیا ہے تو قانون کے مطابق فیصلے ہوں گے۔نواز شریف کی اڈیالہ جیل ملاقات کیلئے جانے کی بات صرف قیاس آرائی ہے۔

(جاری ہے)

کرپشن خیبرپختونخواہ سمیت جہاں بھی ہو اسے قانون کے تحت ختم ہونا چاہیے۔

پاکستان ڈیفالٹ کے کنارے کھڑا تھا اگر تبدیلی نہ آتی تو ڈیفالٹ آجاتا۔پاکستان بھارت کی جارحیت کے خلاف سرخرو ہوا، دنیا نے بھارتی جارحیت کے خلاف پاکستان کے کردار کو سراہا۔ اسرائیل کی دہشت گردی کے خلاف ایران کی سفارتی طور پر مدد کی۔ ڈیفالٹ ہوا میں اڑ گیا۔ 14 ارب ڈالر زرمبادلہ پہنچ گیا ہے۔ بھارت کے خلاف پاکستان کی کامیابی پر اللہ کے حضور سر بسجود ہیں۔

اللہ تعالی نے پاکستان کو بھارت کیخلاف فتح عطا فرمائی۔ پاکستان نے اپنے سے کئی گنا بڑے دشمن کو سبق سکھایا۔ جنگ میں پاکستان نے بھارت کے 6 لڑاکا طیارے مار گرائے۔ اللہ نے پاکستان کو دنیا میں عزت و احترام عطا فرمایا، پاکستان کی سول و عسکری قیادت نے ملک کا کامیابی سے دفا ع کیا۔پاکستان کو بہت عزت و احترام اور کامیابی ملی۔اسحاق ڈار کاگفتگوکرتے ہوئے مزید کہناتھاکہ جنگ لڑنے کی خواہش و ایجنڈا نہیں۔

امن اور خطے کی سلامتی چاہتے ہیں۔ اقتصادی ایجنڈہ ہے جس پر دن رات محنت کررہے ہیں۔ جب بھارت نے حملہ کیا تو ہم نے تمام سیاسی جماعتوں سے رابطہ کیا۔ ہماری متحد آواز پوری دنیا نے سنی، ہم سیاسی جماعتوں کے ساتھ مل کر چلنے کو تیار ہیں۔وزیرخارجہ کایہ بھی کہناتھاکہ ہمیں اپنی مسلح افواج پر فخر ہے۔ سلامتی کونسل کی صدارت پاکستان کے پاس ہے،۔پاکستان نے ایران پر اسرائیلی جارحیت کی مذمت کی۔

ایرانی ہمارے مسلمان بھائی ہیں۔ ایران نے بھرپور انداز میں پاکستان کا شکریہ ادا کیا۔ ہم اس خطے میں امن کے خواہمشند ہیں ہم اس خطے کی ترقی کے خواہاں ہیں۔ان کاکہناتھاکہ پاک بھارت سیز فائر قائم ہے۔ خطرہ تو ہر وقت ہی ہے، الرٹ رہنا ہے۔ اگر کوئی وار کرے، ملک میں دہشت گردی ہو رہی ہے۔ اس لئے تیاری کی حالت میں ہیں۔گزشتہ روز بھی 30 خوارج کو واصل جہنم کیا گیا۔

اسحاق ڈار نے کہا کہ بھارت کی مجبوری لگتی ہے اس طرح کے بیانات سے گھبراتے نہیں۔ پہلے کامیابی ملی آئندہ بھی ملے گی۔انہوں نے کہا کہ سعودی عرب سے مذاکرات سات 8 ماہ سے چل رہے ہیں۔ عام ویزوں کا معاملہ بہتر کیا ہے ان سے درخواست کی ہے کہ بلیو پاسپورٹ کو بھی رسائی دیں۔ پاکستان اب صر ف ترقی کرے گا۔ مہنگائی نیچے آئی ہے ملک میں خوشحالی آئے گی۔

عوام کو روزگار کے مواقع ملیں گے۔ پاکستان 2022 میں سخت مشکلات میں تھا۔ اگر اس وقت یہ تبدیلی نہ آتی تو ملک ڈیفالٹ ہو جاتا۔ ہم نے سیاسی طور پر نقصان اٹھایا لیکن ملک کو ہمیشہ آگے رکھا۔نائب وزیراعظم اسحاق ڈارنے کہا کہ وزیراعظم شہباز شریف دن رات کوشاں ہیں کہ ملک ترقی کی راہ پر گامزن ہو۔ دعا ہے پاکستان ہمیشہ شاد و آباد رہے آج ملکی معیشت اپنے پاؤں پر کھڑی ہو رہی ہے۔ ہمیں اپنی مسلح افواج پر فخر ہے۔ ہمارے بہادر جوان دہشتگردی کا مقابلہ کررہے ہیں۔ پاکستانی افواج خوارج کو جہنم واصل کررہی ہیں۔