داعش کی مسلمانان اسلام کو نئی اسلامی ریاست کی طرف ہجرت کی دعوت،مسلمان جلددنیا میں عزت کے ساتھ سر اٹھا کر چلیں گے‘ امیر ابو بکر البغدادی کا پہلا وڈیو پیغام، ہندوستان سے قوقاز تک وسیع خلافت کی بنیاد ڈال دی،جلد دوبارہ روم فتح کریں گے ،مسلمان نئی اسلامی ریاست کی تعمیر میں اپنا حصہ ڈالیں‘داعش کی عالم اسلام سے اپیل

جمعہ 4 جولائی 2014 06:50

بغداد(اُردو پوائنٹ اخبار آن لائن۔4جولائی۔2014ء)عراق اور شام کے کئی شہروں پر فتح کا پرچم لہرانے کے بعد شدت پسند تنظیم داعش کے امیر ابو بکر البغدادی نے دنیا بھر کے مسلمانوں سے اپیل کی ہے کہ وہ نئی اسلامی ریاست کی تعمیر میں اپنا حصہ ڈالیں۔غیر ملکی خبر رساں ادارے کے مطابق اپنے پہلے ویڈیو پیغام میں داعش کے امیر نے مسلمانان عالم کو نئی اسلامی ریاست کی طرف ھجرت کی دعوت دینے کے ساتھ ساتھ روم کی فتح کی بھی پیش گوئی ہے۔

ویڈیو پیغام میں انہوں نے مسلمانوں اورمجاھدین کو مخاطب کرتے ہوئے ان پر طاغوتی قوتوں کے خلاف جہاد میں حصہ لینے پر زور دیا۔البغدادی نے مسلمانوں سے دین کی نصرت اور غلبہ اسلام کے لیے جان ومال سمیت ہر قسم کی قربانی دینے دینے کی بھی اپیل کی۔البغدادی نے مسلمان ممالک کی افواج پر زور دیا کہ وہ دنیاوی مقاصد کے بجائے دنیا بھر کے مظلوم مسلمانوں کی مدد کے لیے جنگ کی تیاری کریں اور مسلمانوں کو ان کے سلب شدہ حقوق دلانے کے لیے داعش کی جدوجہد کا ساتھ دیں۔

(جاری ہے)

البغدادی کا مزید کہنا ہے کہ وہ وقت زیادہ دور نہیں جب مسلمان عزت کے ساتھ سر اٹھا کر چلیں گے۔ انہوں نے کہا کہ آج ہم ایک نئے عہد کا آغاز کر رہے ہیں مسلمانوں کو چاہیے کہ وہ اس عظیم مقصد کے لیے متحد ہو جائیں۔ابو بکر البغدادی نے اسلامی خلافت کے احیاء اور اسلامی اصولوں پر مبنی ریاست کے قیام کو پوری مسلم دنیا کے لیے خوشخبری قرار دیا۔ انہوں نے کہا کہ ہم ایک ایسی خلافت کی بنیاد ڈال رہے ہیں جو ہندوستان سے قوقاز تک وسیع ہو گی جس میں عرب، مصری، فرانسیسی،جرمن اور آسٹریلوی ایک پرچم تلے جمع ہوں گے۔

ابوبکر البغدادی نے نئی اسلامی ریاست کی تعمیر میں حصہ لینے کے لیے علماء ، عسکری ماہرین، ڈاکٹروں، معماروں اور دیگر پیشوں سے وابستہ ماہرین کو نئی مملکت کی طرف ھجرت کی دعوت دی۔انہوں نے کہا کہ مسلمان طاقت ور ہیں، عالم اسلام کی مسلح افواج کو اپنے خلاف دشمن سے خوف زدہ نہیں ہونا چاہیے۔ انہوں نے کہا کہ مسلمان جلد ایک مرتبہ پھر روم فتح کریں گے اور پوری زمین اللہ کے حکم سے مسلمانوں کے زیر نگیں ہو گی۔