پاک بھارت سیریز کے انعقاد کیا جائے ، وسیم اکرم کی مودی کو درخواست ، پاکستان ہندوستان سیریز نہ ہونے سے عالمی کرکٹ کا نقصان ہو گا، روایتی حریفوں کا مقابلہ ہمیشہ سے انتہائی شاندار رہا ہے اور میں انڈیا پاکستان کے میچ میں حصہ لینے کا خواب دیکھتے ہوئے بڑا ہوا، وسیم اکرم
کراچی(اُردو پوائنٹ اخبارآن لائن۔2اکتوبر۔2015ء) پاکستان کے سابق کپتان اور عظیم فاسٹ باوٴلر وسیم اکرم نے ہندوستانی وزیر اعظم نریندر مودی سے درخواست کی ہے کہ وہ پاکستان کا کرکٹ بائیکاٹ ختم کر کے دوطرفہ سیریز بحال کرنے میں کردار ادا کریں۔پاکستان اور ہندوستان کے درمیان 2007 کے بعد سے کوئی مکمل سیریز نہیں کھیلی گئی اور دونوں ملکوں کے درمیان رواں سال دسمبر میں متحدہ عرب امارات میں سیریز شیڈول ہے تاہم پاکستان سیریز کیلئے ہندوستان کے جواب کا منتظر ہے جو دونوں ملکوں کے درمیان موجودہ تعلقات کو بنیاد بنا کر سیریز کو ٹالنے کی کوششوں میں مصروف عمل ہے۔
سوئنگ کے سلطان وسیم اکرم نے کہا کہ میں وزیر اعظم مودی سے درخواست کرتا ہوں کہ وہ دورے کی اجازت دے دیں۔وسیم نے کہا کہ میں نے سنا ہے کہ انہوں نے اپنی کابینہ سے کہا کہ انہیں پاکستان سے کھیلنے میں کوئی مسئلہ نہیں لہٰذا کرکٹ کو ہونا چاہیے۔(جاری ہے)
انہوں نے کہا کہ میں نے اندازہ لگایا ہے کہ مودی ہندوستان کو عالمی طاقت بنانے کی کوششوں میں مصروف ہیں اور ہندوستان کرکٹ کی سپرپاور ہے تو یہ ان کی ذمے داری ہے کہ وہ باقی دنیا سے بھی تعاون کرتے ہوئے ان کی آگے بڑھنے میں مدد کریں لہٰذا مجھے امید ہے انہیں سیریز سے کوئی مسئلہ نہیں ہو گا۔
وسیم نے مزید کہا کہ پاکستان ہندوستان سیریز نہ ہونے سے عالمی کرکٹ کا نقصان ہو گا، روایتی حریفوں کا مقابلہ ہمیشہ سے انتہائی شاندار رہا ہے اور میں انڈیا پاکستان کے میچ میں حصہ لینے کا خواب دیکھتے ہوئے بڑا ہوا۔سابق کپتان نے کہا کہ پاکستان ہندوستان کے میچ سے اربوں لوگ لطف اندوز ہوتے ہیں اور اس کا اثر دنیا میں کسی بھی دو حریفوں کے درمیان ہونے والے مقابلوں سے زیادہ ہوتا ہے کیونکہ کوئی بھی ٹیم ہارنا نہیں چاہتی اور نہ ہی شائقین اپنی ٹیم کو ہارتے دیکھنا چاہتے ہیں لہٰذا میں امید کرتا ہوں کہ ہر چیز کو بالائے طاق رکھتے ہوئے کرکٹ تعلقات کو بحال کیا جائے گا۔مزید متعلقہ خبریں پڑھئیے :
متعلقہ عنوان :
