کے سی سی آئی کا29اور30 ستمبر کو نیپرا کی عوامی سماعتوں کے بائیکاٹ کا اعلان

کراچی (اُردو پوائنٹ اخبارتازہ ترین - این این آئی۔ 28 ستمبر2021ء) کراچی چیمبر آف کامرس اینڈ انڈسٹری (کے سی سی آئی) نے 29اور30 ستمبر 2021 کو ہونے والی نیشنل الیکٹرک پاور ریگولیٹری اتھارٹی (نیپرا) کے زیر اہتمام منعقد ہونے والی عوامی سماعتوںکے بائیکاٹ کرنے کا اعلان کیا ہے کیونکہ یہ بات مشاہدے میں آئی ہے کہ ریگولیٹر کے سی سی آئی اورمداخلت کرنے والوں کی اکثریت کو عوامی سماعت کے دوران رائے دینے اور تجاویز دینے کا مناسب موقع فراہم نہیں کرتا۔

صدر کے سی سی آئی محمد ادریس نے 2 ستمبر 2021 کو منعقد ہونے والی آخری عوامی سماعت کا ذکر کرتے ہوئے کہا کہ مذکورہ سماعت کے دوران چیئرمین نیپرا نے بہت متکبرانہ طور پر غیر مہذبانہ طرزعمل اختیارکیا اور غیر کاروباری رویہ کے ساتھ کارروائی کو انجام دیا جس پر شرکاء نے سماعت کا بائیکاٹ کرتے ہوئے بڑے پیمانے پر احتجاج کیا۔

(جاری ہے)

انہوں نے کہاکہ مذکورہ عوامی سماعت کے دوران شرکاء کی جانب سے پیش کیے گئے انتہائی درست نکات کو سننے کے لیے چیئرمین نیپرا کی جانب سے بالکل بھی برداشت کا مظاہرہ نہیں کیا گیا جب عوامی سماعت میں شریک کراچی میں توانائی امور ماہر سمجھنے والے ایک ماہر کی جانب سے بعض اہم تکنیکی نکات پیش کیے گئے۔

انہیں اس حد تک روک دیا گیا کہ چیئرمین نیپرا کے حکم پر زوم کنکشن بند کردیا گیا۔ انہوں نے کہا کہ اس مسئلے کو حل کرنے کے لیے کے سی سی آئی نے سماعت دوبارہ شروع کرنے کا مطالبہ کیا لیکن رجسٹرار نیپرا نے حیلے بہانوں کے بعد دوبارہ سماعت رکھنے سے بالکل انکار کر دیا۔ اس لیے ہم نے اس مسئلے کو وفاقی وزیر توانائی حماد اظہر کے علم میں لانے اور 2 ستمبر کی نامکمل سماعت کو دوبارہ منعقد کرنے کے لیے خط لکھا لیکن بدقسمتی سے ان کی جانب سے کوئی جواب موصول نہیں ہوا۔

انہوں نے دریافت کیا کہ جب پچھلی سماعت ہی نامکمل رہی تو نیپرا کو یہ اختیار نہیں کہ کسی دوسرے معاملے پر عوامی سماعت بلائے۔نیپرا نے اگر عوامی سماعت کے شرکاء کو نہیں سننا اور صرف کے الیکٹرک کو ہی خوش کرنا ہے تو سماعت کیا فائدہ۔کیونکہ دیگر تمام سٹیک ہولڈرز کی تشویش اور تجاویز پر کوئی توجہ نہیں دی جا رہی اور ایسا لگتا ہے کہ فیصلے سماعت سے پہلے ہی ہو چکے ہوتے ہیں اور عوامی سماعت صرف دکھاوا ہوتی ہے۔

محمد ادریس نے وزیر اعظم عمران خان اور وفاقی وزیر توانائی حماد اظہر پر زور دیا کہ وہ نیپرا کی ہٹ دھرمی کا سخت نوٹس لیں اور ریگولیٹر کو احکامات جاری کیے جائیںکہ 2 ستمبر 2021 کو ہونے والی سماعت کو کالعدم قرار دینے تک کسی دوسرے معاملے پر عوامی سماعت بلانے سے گریز کیا جائے اور اس سابقہ سماعت کو دوبارہ منعقد کرنیکی نئی تاریخ کا اعلان کیا گیا ہے کیونکہ مذکورہ سماعت نامکمل اور بے سود رہی۔ انہوں نے تمام سٹیک ہولڈرز اورمداخلت کرنے والوں سے بھی اپیل کی کہ وہ 29اور 30 ستمبر 2021 کو نیپرا کی عوامی سماعتوں کا بائیکاٹ کرکے مکمل اتحاد کا مظاہرہ کریں۔