منی بجٹ لانے کے حکومتی فیصلے نے عوام اور کاروباری برادری کی نیندیں اڑا دی ہیں،میاں زاہد حسین

کراچی (اُردو پوائنٹ اخبارتازہ ترین - آن لائن۔ 03 دسمبر2021ء) نیشنل بزنس گروپ پاکستان کے چیئرمین، پاکستان بزنس مین اینڈ انٹلیکچولز فور م وآل کراچی انڈسٹریل الائنس کے صدر اور سابق صوبائی وزیر میاں زاہد حسین نے کہا ہے کہ حکومت کی جانب سے چھ سو ارب روپے کا منی بجٹ لانے کے فیصلے نے عوام اور کاروباری برادری کی نیندیں اڑا دی ہیں۔ منی بجٹ آئی ایم ایف کے معاہدے کا نتیجہ ہے جس میں اقتصادی ترقی کے بجائے معاشی استحکام کو ترجیح دینے کا فیصلہ کیا گیا ہے جس کے نتیجہ میں اقتصادی سست روی جنم لے گی ،مہنگائی، غربت، بے روزگاری اور بے چینی میں اضافہ ہو گا جبکہ بہت سے کاروبار دیوالیہ ہو جائیں گے۔

میاں زاہد حسین نے کاروباری برادری سے بات چیت کرتے ہوئے کہا کہ منی بجٹ کے نتیجہ میں ترقیاتی بجٹ میں دو سو ارب روپے کی کٹوتی ہو گی جس سے عوام متاثر ہو نگے اور تین سو پچاس ارب روپے کی ٹیکس چھوٹ واپس لے لی جائے گی جس سے کاروباری لاگت اور مہنگائی مذید بڑھے گی اور اس کے بعد آئی ایم ایف کا بورڈ جنوری میں پاکستان کو ایک ارب ڈالر کی قسط ادا کرنے کے بارے میں غور کرے گا۔

(جاری ہے)

اگر ان اقدامات کے نتیجہ میں زبردست مہنگائی کے باوجود متوقع نتیجہ نہ نکلا تو آئی ایم ایف کے دبائو پردوسرے منی بجٹ کا امکان بھی موجود ہے جس میں سیلز ٹیکس کی شرح ، تنخواہوں اورپینشن و غیرہ پر ٹیکس میں اضافہ کا آپشن موجود ہے۔ میاں زاہد حسین نے کہا کہ حکومت نے چالیس شہروں میں پراپرٹی مارکیٹ میں قیمتوں کی تشخیص کی شرح میںہو شربا اضافہ کر دیا ہے جس سے ایف بی آر کے محاصل میں اضافہ ہو گا ۔

مگر رئیل اسٹیٹ مار کیٹ بیٹھ جائے گی ۔آٹو موبائل سیکٹر پر بھی نئے ٹیکس نافذ کئے جائیں گے جبکہ پانچ سو پچیس غیر ضروری اشیاء پر بھی ریگولیٹری ڈیوٹی عائد کی جائے گی تاکہ انکی درآمد کی حوصلہ شکنی کی جا سکے۔ میاں زاہد حسین نے مذیدکہا کہ نومبر کے مہینے میں تیس اشیاء کی درآمد میں گزشتہ سال نومبر کے مقابلہ میں 142 فیصد اضافہ ریکارڈ کیا گیا ہے جس میں توانائی، اسٹیل اور خام مال سرفہرست ہیں جنکی قیمتوں میں زبردست ہ*اضافہ ہوا ہے۔

گزشتہ سال نومبر کے مہینے میں تیس اشیاء کی درآمدات 287 ارب روپے تھیں جو امسال بڑھ کر 696 ارب روپے تک پہنچ گئی ہیں جبکہ نومبر میں مجموعی درآمدات 1.36کھرب روپے تک پہنچ گئی ہیں جو گزشتہ سال اسی مہینے کے دوران 686 ارب روپے تھیں۔ اقتصادی ماہرین کے بار بار کے انتباہ کے باوجود حکومت درآمدات کو کنٹرول کرنے اور روپے کے زوال کو روکنے کے لئے نتیجہ خیز اقدامات نہیں کر سکی ہے اور اب دیگر ممالک سے قرضوں کے معاہدے بھی روپے کے زوال کو روکنے میں ناکام نظر آ رہے ہیں۔