زرداری کی پیپلز پارٹی کا طرز سیاست۔ملکی اداروں کی بے توقیری

راولپنڈی کی نیب عدالت میں جناب آصف علی زرداری اور بلاول بھٹو کی پیشی کے موقع پر زرداری کے جیالوں نے جس گھناؤنے اور شرمناک طریقے سے ریاستی اہلکاروں پر تشدد کیا ان کی وردی کے تقدس کو پامال کیا اور زرداری کی الفت میں پولیس کو اپنی نفرت کا نشانہ بنایا زرداری و بلاول کے جیالوں کی اس بھیانک رویے کی جتنی بھی مذمت کی جائے کم ہے اسلام آباد کے نادراچوک میں مصطفی نواز کھوکھر اور اس کا جتھا پولیس اہلکاروں کی جس انداز سے بے توقیری کر رہا تھا اس کو دیکھ کر لگتا تھا کہ یہ بندہ اس ملک کے سب سے مقدس ایوان کا رکن نہیں بلکہ کوئی غنڈہ ہے جو ریاستی اہلکاروں کو اپنی نفرت کی بھینٹ چڑھا رہاہے اسی کالم کے ذریعے ہم حکومت وقت سے پر زور مطالبہ کرتے ہیں کہ زرداری اور بلاول صاحب کی پیشی کے موقع پر جن لوگوں نے افرادی قوت اور عہدے کے گھمنڈ میں ریاستی اہلکاروں کو تشدد کا نشانہ بنایا ریاست کو کم تر جان کر ریاستی اداروں کی بے توقیری کی ان کونشان عبرت بنایا جائے تاکہ آئندہ کسی بھی سیاسی جماعت کے کارکن یا کسی گروہ کے راہنماء کو یہ جرات نہ ہو کہ وہ ریاست کے عزت و وقار سے کھلواڑ کر سکے یا کسی ریاستی ادارے کی بے توقیری کر سکے یہ ہمارا ہی نہیں پوری پاکستانی قوم کا مطالبہ ہے ۔

(جاری ہے)

کیونکہ سیاسی اور ذاتی مصلحتوں کا ہی یہ ثمر ہے کہ آج ریاست خداداد پاکستان اس قدر ناتواں اور کمزور ہے کہ ۔۔۔۔ ہر ایرا غیرا نتھو خیرا ۔۔۔اٹھ کر ریاست اور اس کے اداروں کی عظمت و آبرو کوپامال کرنے کی جسارت کرتا ہے دنیا کے کسی ملک میں ایس نہیں ہوتا کہ کوئی ریاست کے وقار کو روندے اور سزاسے بچ جائے بلکہ بعض ممالک میں تو ریاست کی عظمت کی جانب انگلی اٹھانے والوں کا ایسا حشر کیا جاتا ہے کہ مدتوں وہاں کے باسیوں کے ذہنوں سے ایسی سزاؤں کا خوف نہیں نکل پاتاایسی ہی ریاستیں آج مستحکم اور پائیدار ہیں۔

۔۔اور جب تک ریاست پاکستان ملکی وقار سے کھیلنے والوں کو نشان عبرت نہیں بنائے گی اس وقت تک،،، اللّے تللّے،،ریاست کے وقار سے کھلواڑ کرتے رہیں گے۔۔
جہاں تک تعلق ہے بلاول بھٹو صاحب کے ۔۔ابا جان ۔۔زرداری صاحب کی عدالتوں میں پیشیوں کا ،ان کی دیانتداری اور ایمانداری کا ،ان کی صالح اور کرپشن سے پاک طرز حکمرانی کا ،،تو اس کے لئے ہم بی بی شہید کے بیٹے سے یہی گزارش کریں گے کہ وہ تحمل،بردباری اور متانت کا مظاہرہ کریں اگر ان کے پاپا جانی نے اپنے عہد حکمرانی میں کرپشن نہیں کی ہو گی بددیانتی کے قاعدوں کی رکھوالی نہیں کی ہو گی۔

لوٹ مار کے رواج کی پرورش نہیں کی ہوگی ،ڈاکہ زنی کے اصول نہیں اپنائے ہوں گے،تو ہم یقین اور ایمان کے ساتھ کہتے ہیں کہ جناب زرداری صاحب کا کوئی بال بھی بیکا نہیں کر سکتا،لیکن ہم تھوڑی سی آپ کو یاد دہانی کرائے دیتے ہیں کہ آپ کے ابا حضور کے عہد اقتدار میں قوم کو نہ بجلی ملتی تھی نہ پانی میسر تھا اس وقت غریب عوام کی چیخیں آسماں تک جاتی تھیں وطن عزیز میں ہر چیز ناپائد تھی ہر ادارہ کرپشن اور بد دیانتی کا اڈہ بن چکا تھا رشوت جیسا مکروہ دھندہ ۔

تحائف اور ھدیہ کا روپ دھار چکا تھا،اس دور کو قوم ایک ،،عذاب ،،کے نام سے یاد کرتی ہے جناب بلاول صاحب ۔وہ عہد آپ کے ابو جان کا ہی دور تھا جب آپ کے نانا جان،،شہید ذولفقار علی بھٹو ،، کا سیاسی فلسفہ تھر کر ریگستانوں میں گم ہوا اورمحترمہ ،،بی بی شہید ،، کا نظریہ اولیاء کرام کے شہر ملتان کے قبرستانوں میں دفن ہوا کون نہیں جانتا کہ کیسے کیسے ڈاکے اس دور میں ڈالے گئے کس کس طریقے سے قومی خزانے کو لوٹا گیا کس کس نے مال غنیمت جان کر قو م کے خون پسینے کی کمائی کو اپنے خاندانوں میں تقسیم کیا رینٹل پاور کے نام سے کون بدنام ہوا لوٹ مار،کرپشن،بددیانتی اور بئیمانی کے سارے القاب ،،سلسلہ جیلانی،،،کے کس گدی نشین کے حصے میں آئے،،
بلاول صاحب آپ سیاست کریں یہ آپ کا حق ہے کیونکہ آپ بی بی شہید کے بیٹے اور شہید وطن ذولفقار علی بھٹو کے نواسے ہیں،جس نے ہم جیسے مزدوں ،کسانوں۔

دیہاڑی داروں اور غریبوں کو بولنے کا سلیقہ دیا وڈیروں ،سرمایہ داروں اور جاگیرداروں سے اپنا حق مانگنے کاترغیب دی۔مگر خدارا اپنے ،،ابا حضور کو بے گناہ اور معصوم ثابت کرنے کے لئے ملک پاکستان اور اس کے ادادوں کی تضحیک و تذلیل نہ کریں اس مٹی نے آپ کو بہت کچھ دیا ہے ۔اس ملک کی عوام نے آپ کے ناناجان کو وزیراعظم بنایا اور پھر عزت و احترام کی مالہ آپ کی والدہ محترمہ اور ہماری بی بی شہید کے گلے میں ڈالی بھٹو خاندان سے اپنی وفا و وعقیدت کا ثبوت دیا یہی نہیں جب آپ کے ڈیڈی جان زرداری صاحب،، بھٹو خاندان ،،کا چولہ پہن کر قوم کے سامنے آئے تو پاکستانی قوم نے ان کو بھی مایوس نہیں کیا عزت و احترام کے سب سے بڑے منصب کو ان کے حوالے کر دیا کیونکہ اس نے کہاتھا کہ، اس نے اپنا حسب و نسب بھٹو خاندان سے جوڑ لیا ہے یہ اور بات ہے کہ زرداری صاحب نے اپنے اس عہد کا پا س نہیں کیا ۔

۔راہبری کے اصولوں کو ترک کر کے راہزنی کے سلیقوں کو اپنایا۔۔۔کل آپ نے جو پریس کانفرنس کی اس سے ریاست اور ریاستی اداروں سے نفرت کی بو آ رہی تھی ،آپ وزیراعظم صاحب کے بارے میں کچھ بھی کہیں قو م اس کا برا نہیں منائے گی کیونکہ سیاست میں ایسا چلتا ہے لیکن جب عمران خان ،نوازشریف صاحب کی عداوت میں اور ابا جان کی الفت میں ریاستی اداروں کے خلاف دشنام طرازی کریں گے ،تو پھر ہم بھی یہ ضرور کہیں گے۔۔۔