اوورسیز پاکستانی ہمیشہ ہر مشکل گھڑی میں وطن کے ساتھ کھڑے رہے ہیں،فیصل کنڈی

پشاور(اُردو پوائنٹ اخبارتازہ ترین - این این آئی۔ 21 اگست2025ء)گورنر خیبرپختونخوا فیصل کریم کنڈی نے کہا ہے کہ اوورسیز پاکستانی ہمیشہ ہر مشکل گھڑی میں وطن کے ساتھ کھڑے رہے ہیں اور موجودہ تباہ کن سیلاب کے دوران بھی ان کا کردار نہایت اہم ہے۔ خیبرپختونخوا دہشت گردی کے بعد اب موسمیاتی تبدیلی اور تباہ کن سیلابوں کا شکار ہے، جس کے نتیجے میں ہزاروں خاندان متاثر ہوئے ہیں۔

انہوں نے اوورسیز پاکستانیوں سے اپیل کی کہ وہ ہلال احمر کے ذریعے براہِ راست متاثرہ اضلاع میں امداد بھیجیں تاکہ ضرورت مندوں تک بروقت پہنچ سکے۔ ان خیالات کا اظہارانہوں نے گذشتہ روز یورپی یونین کی کشمیر کونسل کی دعوت پر تین روزہ دورے کے دوران برسلز میں پاکستانی کمیونٹی سے بحیثیت مہمان خصوصی خطاب کرتے ہوئے کیا۔

(جاری ہے)

تقریب سے خطاب کرتے ہوئے گورنرنے کہاکہ موسمیاتی تبدیلی کے اثرات صوبے کے لیے بڑا چیلنج ہیں۔

بادل پھٹنے جیسی آفات کی پیش گوئی محکمہ موسمیات بھی نہیں کرسکتا۔ ایسے حالات میں عوام کی بحالی اور امداد کے لیے بیرون ملک پاکستانیوں کو آگے بڑھنا ہوگا۔فیصل کریم کنڈی نے کہاکہ صوبے میں روزانہ کی بنیاد پر فوجی اور پولیس اہلکار شہید ہورہے ہیں۔ دہشت گرد مذاکرات سے انکاری ہیں، اس لیے آپریشن کے سوا کوئی حل باقی نہیں۔ انہوں نے کہا کہ پیپلز پارٹی نے ماضی میں سوات آپریشن کرکے امن قائم کیا تھا اور آج بھی دہشت گردوں کو شکست دینا ناگزیر ہے۔

انہوں نے کہا کہ پاک فوج بھارت کو تین دن میں شکست دے سکتی ہے تو دہشت گردوں کو بھی شکست دینے کی صلاحیت رکھتی ہے، دہشت گرد عوام کو ڈھال بنا کر کارروائیاں کرتے ہیں۔ بھارت سے جنگ کے بعد پاکستان کی سفارتی اور سیاسی اہمیت میں اضافہ ہوا اور ’’معرکہ حق‘‘ میں قدرت نے پاکستان کا ساتھ دیا۔گورنر نے کہا کہ پاکستانی صحافیوں نے جنگ کے دوران بہترین اور ذمہ دارانہ کردار ادا کیا جبکہ چیئرمین پیپلز پارٹی بلاول بھٹو نے عالمی میڈیا پر پاکستان اور کشمیر کا مقدمہ بہترین انداز میں پیش کیا۔

فیصل کریم کنڈی نے کہا کہ محترمہ بے نظیر بھٹو نے ملک کو میزائل ٹیکنالوجی دی، آج وہی ٹیکنالوجی بھارت کے خلاف ڈھال بنی ہوئی ہے۔ انہوں نے مزید کہا کہ پاکستان مسلم امہ کا قائد ہے۔ ایران اسرائیل جنگ کے بعد ایرانی صدر نے اسلام آباد آکر شکریہ ادا کیا جبکہ امریکہ کے ساتھ تعلقات ہر سطح پر بڑھ رہے ہیں۔گورنر نے کہا کہ اوورسیز پاکستانیوں کا اعتماد بحال ہوا ہے اور انہیں چاہیے کہ سرمایہ کاری، صنعت، زراعت، معدنیات اور سیاحت میں اپنا کردار ادا کریں۔

انہوں نے بتایا کہ گورنر ہاؤس ہلال احمر کے ذریعے سیلاب متاثرین کی امداد میں سرگرم ہے جبکہ سندھ، پنجاب اور بلوچستان کی حکومتیں بھی تعاون کررہی ہیں۔ دوست ممالک بھی گورنر ہاؤس کے توسط سے امداد بھیج رہے ہیں۔پاکستانی کمیونٹی رہنماؤں نے گورنر فیصل کریم کنڈی کے دورہ برسلز کو خوش آئند قرار دیا ۔